ފީފާ ވޯލްޑް ކަޕްގެ ނޮކް އައުޓު ބުރުގައި މިރޭ ބްރެޒިލުން ޖަޕާނާ ދެކޮޅަށް ފަސޭހަ ވިސްނުމެއްގައި މެޗަށް ނުކުމެއްޖެނަމަ ބްރެޒިލަށް ދެރައެއް ލިބިދާނެކަމަށް އެޓީމުގެ ކެޕްޓަން މާކީނިއޯސް ބުނެފިއެވެ.
ރޭ، ވޯލްޑް ކަޕްގައި މި ދެ ޓީމުން ވާދަކުރާ މެޗުގެ ކުރިން އެންމެ ގިނަ ބަޔަކު ދައްކަނީ މިދިޔަ އަހަރުގެ އޮކްޓޫބަރު މަހު ކުޅުނު އެކުވެރިކަމުގެ މެޗުގެ ވާހަކައެވެ. އެ މެޗުގައި ބްރެޒިލުން ދެ ގޯލު ޖަހާފައި ވަނިކޮށް ޖަޕާނުން ވަނީ ފަހަތުން އަރައި 3-2 އިން މޮޅުވެފައެވެ. މިރޭގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައިވެސް ގިނަ ބަޔަކު ވަނީ އެކަމަށް އިޝާރާތްކޮށް ސުވާލުކޮށްފައެވެ.
އެއަށް ޖަވާބުދެމުން މާކީނިއޯސް ބުނީ އެއީ ވަރަށް ގިނަ ކަންކަން ދަސްވި މެޗެއްކަމަށާއި، ހާމަވީ ފާއިތުވި ތަނުގައި ބްރެޒިލް ބައިނަލްއަޤްވާމީ ފުޓުބޯޅާގައި އޮތްގޮތްކަމަށެވެ. މިހާރު ކުރިއަށްދާ ފީފާ ފުޓްބޯޅަ މުބާރާތާ ހަމައަށް ވަރަށް ވަރަށް ގިނަ ޓެސްޓުތަކެއް ކުރެވި، ޓީމަށް އެންމެ ރަނގަޅު އަދި ފައިދާހުރި ގޮތް ކޯޗު ބަލަމުންދާކަމަށްވެސް މާކީނިއޯސް ބުންޏެވެ.
އަހަންނަށް އެއްވެސް އިރެއްގައި ބްރެޒިލް މެޗުތައް ބަލަން ދަނޑު ބޭރުގައި އިންނަން ފަސޭހައެއް ނޫން.
ބްރެޒިލްގެ ކެޕްޓަން މާކީނިއޯސް ބުންޏެވެ.
ކެޕްޓަން ބުނީ ޖަޕާނަކީ މޮޅު ޓީމެއްކަމަށާއި، ވިސްނުންތެރިކަމާއެކު ތަފާތު ދައްކާ ޓީމެއްކަމަށެވެ. އަދި ޖަޕާނަކީ ފަސޭހަ ޓީމެއް ނޫންކަމަށާއި ރަނގަޅަށް ވިސްނުން ނުބަހައްޓައިފިއްޔާ ދެރައެއް ލިބިދާނެކަމަށްވެސް އޭނާ ބުންޏެވެ.
އޭނާ ބުނީ ބްރެޒިލުން ގްރޫޕް ސްޓޭޖުގައި ކުޅުނު ފަހު މެޗުގައި ސްކޮޓްލެންޑް އަތުން 3-0 އިން މޮޅުވިއިރު، ޓީމެއްގެ ގޮތުގައި އެޤައުމަށްވެސް ތަފާތު ދެއްކުނުކަމަށެވެ. މިހާރު ދެވަނަ ބުރު ފެށިފައިވާއިރު މިހާރު އެއީ މުޅިން އައު މުބާރާތެއްގެ ގޮތުގައި އޭނާ ސިފަކުރިއެވެ. އަދި ގްރޫޕް ސްޓޭޖުގައި ހިނގައިދިޔަ ހުރިހާ ކަމެއްވެސް އެއީ މާޒީކަމަށްވެސް އޭނާ ބުންޏެވެ.
ފަސް ފަހަރު ވޯލްޑް ކަޕްގެ ޗެމްޕިއަންކަން ނަގާފައިވާ ބްރެޒިލުން އެންމެ ފަހުން މި މުބާރާތް ކާމިޔާބުކުރީ 2002 ވަނަ އަހަރުއެވެ. ބްރެޒިލާ ދެކޮޅަށް މިހާތަނަށް ޖަޕާން ކުޅުނު 14 މެޗުގެ ތެރެއިން މޮޅުވީ އެންމެ މެޗަކުންނެވެ.
ކިޔުންތެރިންގެ ހިޔާލު