މާލޭގެ މަޖީދީމަގުގައި އިމާރާތްކުރަމުންދިޔަ ތަނަކުން ދެ ބިދޭސީ މަސައްކަތްތެރިޔަކު ވެއްޓުނު ހާދިސާއާ ގުޅިގެން، ސަލާމަތީ ފިޔަވަޅުތައް އަޅާފައިނުވާތީ އެ ކަމުގައި އިހުމާލުވި ފަރާތްތައް މާލެ ސިޓީ ކައުންސިލުން 5000 ރުފިޔާއިން ޖޫރިމަނާކޮށްފިއެވެ.
މާލޭގެ މަޖީދީމަގުގައި އިއްޔެ ހިނގި މި ނުރައްކާތެރި ހާދިސާގައި ދެ މީހަކަށް ވަނީ އަނިޔާވެފައެވެ. މި ހާދިސާގައި އަނިޔާވެފައިވަނީ އުމުރުން 22 އަހަރުގެ ނޭޕާލް ފިރިހެނަކަށާއި އުމުރުން 39 އަހަރުގެ ބަންގްލަދޭޝް ފިރިހެނަކަށެވެ. މި ދެ މީހުންނަށް ފަރުވާ ދިނުމަށް ވަގުތުން މާލޭގެ މައި ހޮސްޕިޓަލަށް ވަނީ ގެންގޮސްފައެވެ. އެ ހޮސްޕިޓަލުން ފަރުވާ ދިނުމަށްފަހު އޭގެތެރެއިން އެކަކު މިހާރު ދޫކޮށްލާފައިވާއިރު، ދެވަނަ މީހާއަށް އަދިވެސް އަންނަނީ ވޯޑުގައި ފަރުވާ ދެމުންނެވެ.
މި މައްސަލައާ ގުޅިގެން މާލެ ސިޓީ ކައުންސިލުން މިއަދު ބުނީ، މި ހާދިސާ ހިނގަން މެދުވެރިވީ އިމާރާތުގައި މަސައްކަތްކުރިއިރު، ސަލާމަތީ ފިޔަވަޅުތައް ރަނގަޅަށް ނާޅައި މަސައްކަތް ކުރުމުގެ ސަބަބުން ކަމަށެވެ. އެހެންކަމުން، އާންމު އިޖުތިމާއީ މިންގަނޑާ ޚިލާފަށް ރައްކާތެރިކަމުގެ ފިޔަވަޅުތައް ނާޅައި މަސައްކަތް ކުރުމުން، މި ކަމުގައި އިހުމާލުވި ފަރާތްތައް 5000 ރުފިޔާއިން ޖޫރިމަނާކޮށްފައިވާ ކަމަށް އެ ކައުންސިލުން ވަނީ ހާމަކޮށްފައެވެ. ޖޫރިމަނާކުރިކަން އަންގައި ދިން ޗިޓުން ވެސް މިކަން ވަނީ ކަށަވަރުވެފައެވެ.
މި ނުރައްކާތެރި ހާދިސާއާ ގުޅިގެން އިތުރަށް ބަލަންޖެހޭ ކަންކަން ދިވެހި ފުލުހުންގެ ޚިދުމަތުން އަންނަނީ ބަލަމުންނެވެ. އިމާރާތްކުރާ ތަންތަނުގައި ސަލާމަތީ ގޮތުން އަޅަންޖެހޭ ފިޔަވަޅުތައް ނާޅައި މަސައްކަތްކުރުމަކީ މީހުންގެ ފުރާނައަށް ނުރައްކާވާފަދަ ކަންކަން ކުރިމަތިވެދާނެ ކަމަކަށްވާތީ، މިފަދަ މައްސަލަތައް ކަމާބެހޭ އިދާރާތަކުން އަންނަނީ ވަރަށް ސީރިއަސްކޮށް ތަހުގީގުކުރަމުންނެވެ.
ކިޔުންތެރިންގެ ހިޔާލު