ފަހި ދިރިއުޅުން ކޯޕަރޭޝަން (އެފްޑީސީ) އިން އިމާރާތްކުރާ ފްލެޓްތަކުގެ ރަޖިސްޓްރީ ކަންތައްތަކުގައި މާލެ ސިޓީ ކައުންސިލުން ޚިދުމަތް ނުދީ ބަހަނާ ދައްކަމުންދާ ކަމަށް ބުނެ، އެ ކޯޕަރޭޝަންގެ މެނޭޖިންގ ޑިރެކްޓަރު ހަމްދާން ޝަކީލް، ކައުންސިލަރު ފާތިމަތު ޒަހިއްޔާއަށް ވަރުގަދަ ރައްދެއް ދެއްވައިފިއެވެ.
މި މައްސަލަ އުފެދިފައިވަނީ ހުޅުމާލެ އުތުރު ދާއިރާގެ މާލެ ސިޓީ ކައުންސިލް މެންބަރު ފާތިމަތު ޒަހިއްޔާ، އެފްޑީސީން ސިޓީ ކައުންސިލަށް އެއްބާރުލުން ނުދޭ ކަމަށް ބުނެ ސޯޝަލް މީޑިއާގައި ކަންބޮޑުވުން ފާޅުކުރެއްވުމާ ގުޅިގެންނެވެ. ޒަހިއްޔާ ތުހުމަތު ކުރެއްވި ގޮތުގައި، ފްލެޓްތަކުގައި ރަޖިސްޓްރީވުމަށް އެދި ހުށަހަޅާ ފަރާތްތަކުގެ މަސައްކަތް ލަސްވަނީ އެފްޑީސީން ދޭންޖެހޭ މަޢުލޫމާތުތައް ނުލިބޭތީއެވެ. އަދި އެ ކޯޕަރޭޝަނަށް ފޮނުވި ސިޓީއަކަށް ޖަވާބު ނުލިބޭ ކަމަށްވެސް އޭނާ ވިދާޅުވިއެވެ.
މި ކަމާ ގުޅިގެން އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް ވިދާޅުވީ މާލެ އާއި ހުޅުމާލޭގެ ހުރިހާ ތަނެއްގައިވެސް ރަށްވެހިކަން ޖެއްސުމަށް ބޭނުންވަނީ އިމާރާތުގެ ވެރިފަރާތުގެ އިއުތިރާޒެއް ނެތް ކަމުގެ ލިޔުމެއް ކަމަށެވެ. އަދި އެފްޑީސީގެ ފްލެޓްތަކުގެ ކުލީވެރިންނަށް ބޭނުންވާ އެފަދަ ލިޔުންތައް މިހާރު ދޫކޮށްފައިވާނެ ކަމުގެ ޔަގީންކަން އޭނާ ދެއްވިއެވެ.
ކައުންސިލަށް އެ ލިޔުންތަކުގެ ސައްހަކަން ކަށަވަރު ކުރެވޭނެ އިންތިޒާމުތައް ހަމަޖައްސާފައިވާކަން ފާހަގަކުރައްވަމުން ހަމްދާން ވިދާޅުވީ، ކިއުއާރް ކޯޑެއް މެދުވެރިކޮށް ލިޔުންތައް ވެރިފައި ކުރެވޭނެ ކަމަށެވެ. އަދި މިކަމަށް ޚާއްޞަ ފޯކަލް ޕޮއިންޓެއްވެސް ކަނޑައަޅާފައިވާނެ ކަމަށް އޭނާ ވިދާޅުވިއެވެ. ހަމްދާން އިތުރަށް ވިދާޅުވި ގޮތުގައި، ޚިދުމަތް ދިނުމަށް ބޭނުންވާ ހުރިހާ އިންތިޒާމެއް ހަމަޖެހިފައި ވަނިކޮށް، ސިޓީ ކައުންސިލުން އެ މަސައްކަތް ނުކޮށް ހިފަހައްޓަނީ ރައްޔިތުންނަށް އޮޅުވާލުމަށްޓަކައެވެ. މިއީ ޚިދުމަތް ނުދީ ހުރުމަށްޓަކައި ކައުންސިލުން ދައްކާ ބަހަނާއެއް ކަމަށްވެސް އޭނާ ވަނީ ވިދާޅުވެފައެވެ.
ކިޔުންތެރިންގެ ހިޔާލު