ޒުވާން ޚަތީބުން ބިނާކުރުމުގެ މަސައްކަތަކީ މިއަދުގެ ހާލަތަށް ބަލާއިރު ފަސްޖެހުމެއްނެތި ކުރިއަށް ގެންދަންޖެހޭ އަސާސީ މަސައްކަތެއް ކަމަށާއި، އެ މަސައްކަތް ހުއްޓިއްޖެނަމަ ދީނީ ގޮތުން ހީނުކުރާވަރުގެ ގެއްލުންތަކަކާ ކުރިމަތިލާންޖެހިދާނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޒުވާން ޚަތީބުން ތަމްރީންކުރުމުގެ ހަތަރު ވަނަ ބުރުގެ ނިމުން ފާހަގަކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖޭގެ އެކި ރަށްރަށުގައި އިމާމުން މަދުވުމާއި، ޚުޠުބާ ކިޔާނެ ފަރާތްތައް ނެތުމުގެ ސަބަބުން ދިމާވާ ގޮންޖެހުންތަކަށް ހައްލު ހޯދުމަށް މިނިސްޓްރީން ހާއްސަ އިސްކަމެއް ދީގެން މަސައްކަތްތަކެއް ކުރަމުންދާ ކަމަށެވެ. އެގޮތުން ޚަތީބުން ބިނާކުރުމަކީ ދީނީ ވާޖިބެއް އަދާކުރުމުގެ ގޮތުން ކުރަންޖެހޭ މުހިންމު މަސައްކަތެއްކަން އޭނާ ފާހަގަކުރެއްވިއެވެ.
އިމާމުކަމާއި، ބަންގި ގޮވުމާއި، ދީނުގެ ޙުކުމްތައް ބަޔާންކުރުމަކީ ވަރަށް މަތީ ދަރަޖައިގެ މަސްޢޫލިއްޔަތުތަކެއް ކަމަށް މިނިސްޓަރު ސިފަކުރެއްވިއެވެ. މި މަސައްކަތުގައި ހަރަކާތްތެރިވާ ފަރާތްތަކަކީ ތަފާތު މާތް ބައެއްކަން ފާހަގަކުރައްވައި، ޚަތީބުންގެ ފޭރާމާއި، ސުލޫކާއި، މުއާމަލާތުކުރުމުގެ ހުނަރަކީ އެހެން މީހުންނަށް ނަމޫނާއަކަށް ވާންޖެހޭނެ ކަމަށް އޭނާ ވިދާޅުވިއެވެ. މިނިސްޓަރު އިތުރަށް ވިދާޅުވީ ޚަތީބުކަމަށް ވުރެ ވަކިން ބޮޑު ޝަރަފުވެރި މަސްޢޫލިއްޔަތެއް ނެތް ކަމަށެވެ.
ޚަތީބުންނަށް ނަސޭހަތްތެރިވަމުން މިނިސްޓަރު ޝަހީމް ވަނީ ޚުޠުބާ ކިޔުމުގެ ކުރިން އެކަމަށް ފުރިހަމައަށް ތައްޔާރުވުމުގެ މުހިންމުކަން ފާހަގަކުރައްވާފައެވެ. ގަޑިއަށް ކަމޭހިތުމާއި، ފަރުވާތެރިކަމާއެކު ޚުޠުބާ ކިޔުމަށް ސަމާލުކަން ދިނުމަށް އެދިވަޑައިގަންނަވަމުން، ހަދީސްތަކާއި އާޔަތްތައް ކިޔުމުގައި ތަޖުވީދުގެ ހަމަތަކަށް އިސްކަންދިނުމަށް ޚަތީބުންނަށް އިރުޝާދު ދެއްވިއެވެ.
ކިޔުންތެރިންގެ ހިޔާލު