ވޯލްޑްކަޕް ފުޓްބޯޅަ މުބާރާތުގެ ނޮކްއައުޓްގެ 32ގައި ކްރޮއޭޝިއާ ބަލިކޮށް ޕޯޗުގަލް ގަދަ 16އަށް ދަތުރުކޮށްފިއެވެ.
ޕޯޗުގަލް ގަދަ 16އަށް ދަތުރުކުރީ މެޗުގެ 1-1 ން އެއްވަރުވެގެން ނިމެން ދަނިކޮށް، އިތުރު ވަގުތުގެ ގޮތުގައި ދެއްކި 10 މިނިޓްގެ ތެރެއިން ތިންވަނަ މިނިޓްގައި ގޮންކާލޯ ރާމޯސް ޖެހި ލަނޑުން މޮޅުވެގެންނެވެ. ރަފައެލް ލެއާއޯ އަރިމަތިން ނެގި ހުރަސް ގޮންކާލޯ ރާމޯސް ބޮލުން ގޯލަށް ފޮނުވާލީ ގްވާޑިއޯލް އާއި ޕޮންގްރަސިޗް ކައިރީގައި ވިއްދާފައި ތިއްބާ ބޮލުން ޖަހައެވެ. އިތުރު ވަގުތު 10 މިނިޓް ދެއްކި ނަމަވެސް އޭގެ އެއްގުނަ އިތުރަށް ކުޅުނު މެޗުގެ އިތުރު ވަގުތުގެ 13 ވަނަ މިނިޓްގައި ގްވާޑިއޯލް ލަނޑެއް ޖަހާ ނަތީޖާ ހަމަހަމަކުރިއެވެ. ނަމަވެސް ކްރޮއޭޝިޔާގެ ބެންޗާއި، ސަޕޯޓަރުން އުފާފާޅުކުރަމުން ދަނިކޮށް، ވީއޭއާރުން ބަލާ އޮފްސައިޑް ކަމަށް ނިންމިއެވެ. ވީއޭއާރު ރެފްރީ ބެލިއިރު މެޗުގެ އިތުރު ވަގުތުގައި ކުޅެން ނިކުއިން ޑިފެންޑަރު ގްވާޑިއޯލަށް ބޯޅަ ލިބުނީ ވަރަށް ބޮޑަށް އޮފްސައިޑްގައި ހުރި އިގޯ މަޓޮނޮވިޗް ފައިގަ ޖެހިފައެވެ.
ދެވަނަ ހާފް ފަށައިގެން 8 ވަނަ މިނިޓްގައި ފުރަތަމަ ލީޑް ނެގީ ކްރޮއޭޝިޔާއިންނެވެ. އޭރިޔާ ތެރޭގައި ހުރެ ބޯޅަ ކޮންޓްރޯލް ކޮށްލުމަށްފަހު ގޯލްގެ ދުރުކަނަށް ޕެރިސިޗް ފޮނުވާލި ބޯޅަ ހުއްޓުވަން ކީޕަރަށް އެއްވެސް ކަމެއް ނުކުރެވުނެވެ. ޕޯޗްގަލް އިން ނަތީޖާ ހަމަހަމަ ކުރީ ޕެނަލްޓީއަކުން ރޮނާލްޑޯއެވެ. ކޯނަރު ނެގިއިރު އޭރިޔާ ތެރެއިން ބޮލުން ޖަހަން އެރި ރެނާޓޯ ގައިގަ ހިފާ ވައްޓާލުމުން ރެފްރީ ޕެނަލްޓީ ދިނީވެސް ދަނޑުގެ އަރިމަތީގައި ހުރި މޮނީޓަރުން ބެލުމަށްފަހު އެވެ. ޕެނަލްޓީން ރޮނާލްޑޯ ކާމިޔާބުކުރި ލަނޑަކީ ވަރލްޑްކަޕް ނޮކްއައުޓް މެޗެއްގައި ރޮނާލްޑޯގެ ފުރަތަމަ ލަނޑެވެ. މިމުބާރާތުގައި ތިންވަނަ ލަނޑެވެ. ޕެނަލްޓީގެ ކުރިން ރޮނާލްޑޯ ޖެހި ރީތި ލަނޑެއްވެސް ވީއޭއާރުން ބެލުމަށްފަހު އޮފްސައިޑް ކަމަށް ނިންމިއެވެ. ރޮނާލްޑޯގެ ހަށިގަނޑުގެ ބައެއް އޮފްސައިޑް މަގާމްގައި އޮތްތައް ޓެކްނޮލޮޖީގެ އެހީގައި ފެނެއެވެ. ކްރޮއޭޝިޔާގެ ސްޗިޗް ޖެހި ލަނޑެއްވެސް އޮފްސައިޑް ކަމަށް ނިންމީ ކުޅުންތެރިޔާގެ ހަށިގަނޑުގެ ބައެއް އޮފްސައިޑް މަގާމްގައި އޮތުމުން، ވީއޭއާރުން ބެލުމަށްފަހު އެވެ. މެޗުގައި ކްރޮއޭޝިޔާއިން ޕޯޗްގަލް ގޯލަށް ވައްދާލި ތިން ބޯޅައެއް އޮފްސައިޑް ކަމަށް ނިންމިއެވެ.
މުބާރާތުގެ ގަދަ 16ގައި ޕޯޗުގަލް ނިކުންނާނީ ސްޕެއިންނާ ދެކޮޅަށެވެ.
ކިޔުންތެރިންގެ ހިޔާލު