ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލ. އަތޮޅުގެ ރައްޔިތުންނަށް ވެވަޑައިގެންނެވި ވައުދުފުޅާ އެއްގޮތަށް، އެ އަތޮޅުގެ އިސްދޫ-ކަލައިދޫގައި ދެވަނަ އެއާޕޯޓެއް ތަރައްގީކުރަން ސަރުކާރުން ނިންމައިފިއެވެ.
އިސްދޫ-ކަލައިދޫއަކީ ބިން ބޮޑު ރަށަކަށްވުމާއެކު، އާބާދީ އެއްފަސްކުރުމުގެ ސިޔާސަތުގެ ދަށުން ތަރައްގީގެ ފުޅާ ފުރުސަތުތައް އޮތް ރަށެކެވެ. މީގެ އިތުރުން، އެ ސަރަހައްދަކީ ގުދުރަތީ ރީތިކަން ލިބިފައިވާ ގިނަ ރަށްތަކެއް ހިމެނޭ ސަރަހައްދަކަށްވާތީ، ފަތުރުވެރިކަން ކުރިއެރުވުމަށް އެއާޕޯޓެއް އޮތުމަކީ ބޮޑު ބާރަކަށް ވެގެންދާނެއެވެ.
ހައްދުންމަތީގެ އެންމެ އުތުރަށް އޮންނަ އިސްދޫ-ކަލައިދޫން މިހާރު ލ. ކައްދޫ އެއާޕޯޓަށް ދަތުރުކުރުމަށް ގާތްގަނޑަކަށް 45 މިނިޓު ހޭދަވެއެވެ. އަދި އެ ސަރަހައްދުގެ ދަނބިދޫއާއި މައިބާދޫގެ ރައްޔިތުންނަށް ވެސް ކައްދޫއަށް ދިއުމަށް ދިގު ދަތުރެއް ކުރަންޖެހެއެވެ. އިމާރާތްކުރުމާއި ބިނާރާއި ގެދޮރުވެރިކަމާ ބެހޭ ވުޒާރާއިން ބުނާ ގޮތުގައި، މި އާ އެއާޕޯޓުގެ ސަބަބުން އެ ތިން ރަށުގެ ރައްޔިތުންނަށް ދަތުރުފަތުރުގެ ގޮތުން ބޮޑެތި ލުއިތަކެއް ލިބިގެންދާނެއެވެ.
މުޅި ރާއްޖެ ވައިގެ ދަތުރުފަތުރުގެ ވިއުގައަކުން ގުޅައިލުމަކީ ރައީސް ޑރ. މުޢިއްޒުގެ މުހިއްމު ތަސައްވުރެކެވެ. މި މަސައްކަތުގެ ދަށުން އިގުތިސާދީ ގޮތުން ފައިދާހުރި ސަރަހައްދުތަކުގައި އެއާޕޯޓުތައް ތަރައްގީކުރުމުގެ މަސައްކަތް މި ސަރުކާރުން އަންނަނީ ކުރަމުންނެވެ. މިގޮތުން، މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ހަވާލުކޮށްގެން، ބައެއް ރަށްރަށުގައި ބިން ހިއްކުމުގެ މަސައްކަތް ނިންމައި އަމަލީ މަސައްކަތްތައް ވެސް މިހާރު ވަނީ ފެށިފައެވެ.
ގައުމުގެ މާލީ ހާލަތު ހުރި ގޮތުން ކުރިމަތިވާ ގޮންޖެހުންތަކާއެކު ވެސް، ރައްޔިތުން ބޭނުންވާ މިފަދަ އުމްރާނީ ތަރައްގީގެ މަޝްރޫއުތައް ހުއްޓުމެއްނެތި ކުރިއަށްގެންދިއުމަށް ސަރުކާރުން އަންނަނީ މަގުފަހިކުރަމުންނެވެ.
ކިޔުންތެރިންގެ ހިޔާލު