ގްރޫޕް ސީގެ އެއްވަނަ ޓީމުގެ ގޮތުގައި ބްރެޒިލް އަދި ދެ ވަނަ ޓީމުގެ ގޮތުގައި މޮރޮކޯ ވޯލްޑް ކަޕް ފުޓްބޯޅަ މުބާރާތުގެ ދެވަނަ ބުރުން ޖާގަ ހޯދައިފިއެވެ.
މިހާރު ކުރިއަށްދާ ވޯލްޑް ކަޕް ފުޓްބޯޅަ މުބާރާތުގައި ރޭ ގްރޫޕްގެ އެއްވަނަ ބްރެޒިލުން ކަށަވަރުކުރީ ސްކޮޓްލޭންޑުގެ މައްޗަށް 0-3އިން ކުރި ހޯދައިގެންނެވެ. މޮރޮކޯގެ ފަހު މެޗު އެ ގައުމުން ކާމިޔާބު ކުރީ މުޅިން އަލަށް ވޯލްޑް ކަޕުގައި ވާދަކުރި ހައިޓީއާ ވާދަކޮށް ފަހަތުން އަރައި 4-2 އިންނެވެ. މިއާއެކު ހަތް ޕޮއިންޓުން މި ދެ ގައުމު އެއްވަރުވެ ބްރެޒިލަށް އެއްވަނަ ލިބުނީ ލަނޑުގެ ތަފާތުންނެވެ. ސްކޮޓްލޭންޑުން ހެދި ގޯސްތަކުގެ ފައިދާ ނަގައި ބްރެޒިލަށް ފުރަތަމަ ދެ ގޯލު ޖަހައިދިނީ ވިނީޝިއުސް ޖޫނިއާއެވެ. މި ދެ ގޯލާއެކު މި މުބާރާތުގައި އޭނާ ޖެހި ގޯލުގެ އަދަދު ވަނީ 4އަށް އަރާފައެވެ. ބްރެޒިލްގެ ތިންވަނަ ގޯލު ޖެހީ މަތިއަސް ކޫނާއެވެ. މި މެޗުގައި ވިނީޝިއުސް ޖެހި ލަނޑެއް ރެފްރީ ގަބޫލުނުކުރިއެވެ. އަދި މެޗުގައި ހެޓްރިކް ހަދަން ވެސް އޭނާއަށް ފުރުސަތު ފަހިވެގެން ދިޔަކަން ފާހަގަކޮށްލެވެއެވެ.
މި މެޗު ނިމެން 15 މިނެޓަށްވެފައިވަނިކޮށް، ބްރެޒިލަށް އެންމެ ގިނަ ލަނޑު ޖަހާދީފައިވާ ޒުވާން ކުޅުންތެރިޔާ ނޭމާވެސް ކުޅެން ނިކުތެވެ. ނޭމާ ދަނޑަށް އެރި ވަގުތަކީ މުޅި ސްޓޭޑިއަމް އަޑުން ގުގުމާލި ވަގުތެކެވެ. މިއީ 2023 ވަނަ އަހަރުގެ ފަހުން ގައުމީ ޖާޒީގައި ނޭމާ ކުޅުނު ފުރަތަމަ މެޗެވެ.
ބްރެޒިލް އަތުން ބަލިވުމާއި ގުޅިގެން ސްކޮޓްލެންޑަށް ދެ ވަނަ ބުރަށް ދިއުމުގެ ފުރުސަތު ވަނީ ވަރަށް ބޮޑަށް ހަނިވެފައެވެ.
ކިޔުންތެރިންގެ ހިޔާލު