ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ މެންބަރުކަމަށް ގއ. ދާންދޫ، އަމާޒު، ޒައިނާ އަބްދުﷲ އައްޔަންކުރައްވައިފިއެވެ.
ޒައިނާ އަބްދުﷲ އަކީ ބޭންކިން އަދި ފައިނޭންސްގެ ދާއިރާގައި 10 އަހަރަށް ވުރެ ގިނަ ދުވަހުގެ ތަޖުރިބާ ލިބިވަޑައިގެންފައިވާ ފަންނީ ބޭފުޅެކެވެ. ހާއްސަކޮށް ކޯޕަރޭޓް ފައިނޭންސް، އިސްލާމިކް ބޭންކިން އަދި ދައުލަތުގެ ކުންފުނިތަކުގެ ގަވާނަންސްގެ ދާއިރާއިން އޭނާއަށް ލިބިވަޑައިގެންފައިވާ ތަޖުރިބާގެ އަލީގައި، ބޯޑުގައި ބޭންކިން ދާއިރާ ތަމްސީލުކުރާ މެންބަރުގެ ގޮތުން މުހިންމު މަސައްކަތްތަކެއް ކުރައްވާނެ ކަމަށް ބެލެވެއެވެ. ޕީސީބީއަށް އައްޔަންކުރެއްވުމުގެ ކުރިން، ޒައިނާ އަދާކުރެއްވީ މޯލްޑިވްސް އިސްލާމިކް ބޭންކް (އެމްއައިބީ) ގެ ހެޑް އޮފް ކޯޕަރޭޓް ޕްރޮސެސިންގެ މަގާމެވެ.
ޒައިނާ ވަނީ މީގެ ކުރިން ވެސް ޕްރައިވެޓައިޒޭޝަން ބޯޑުގެ ސީނިއަ އޮފިސަރެއްގެ މަގާމު އަދާކުރައްވާފައެވެ. އެ މުއްދަތުގެ ތެރޭގައި ދައުލަތުގެ ކުންފުނިތަކުގެ މަސައްކަތްތައް މޮނިޓާކޮށް، އިވެލުއޭޓް ކުރުމުގައި އޭނާ މުހިންމު ދައުރެއް އަދާކުރެއްވި އެވެ. މީގެ އިތުރުން، ކުންފުނިތަކުގެ މާލީ ބަޔާންތަކާއި ބަޖެޓުތަކުގެ އިތުރުން ބިޒްނަސް ޕްލޭންތައް ދިރާސާކުރުމާއި، ކުންފުނިތަކުގެ ހިންގުން ހަރުދަނާކުރުމަށް ބޭނުންވާ އިދާރީ މަސައްކަތްތައް ރޭވުމުގައި އޭނާ އިސްކޮށް މަސައްކަތް ކުރެއްވިއެވެ.
ޒައިނާގެ ތައުލީމީ ފެންވަރަށް ބަލާއިރު، އޭނާ ވަނީ މެލޭޝިއާގެ އިންޓަނޭޝަނަލް ސެންޓާ ފޯ އެޑިޔުކޭޝަން އިން އިސްލާމިކް ފައިނޭންސް (އިންސީފް) އިން މާސްޓާ އޮފް އިސްލާމިކް ފައިނޭންސް ޕްރެކްޓިސް ހާސިލުކުރައްވާފައެވެ. މީގެ އިތުރުން އިންޑިއާގެ ޔުނިވަސިޓީ އޮފް ޕޫނޭ އިން ބެޗްލާ އޮފް ކޮމާސްގެ ދާއިރާއިން މަތީ ތައުލީމު ހާސިލުކުރައްވާފައިވެއެވެ.
ކިޔުންތެރިންގެ ހިޔާލު