ލެސީމިއާ ޕޭޝަންޓުންނަށް ބޭނުންވާ، ބޯންމެރޯ ޓްރާންސްޕްލާންޓަށް 2.5 މިލިއަޔަން ރުފިޔާ ޒަކާތު ފަންޑުން އެންސްޕާއަށް ފޯރުކޮށްދީފިއެވެ.
މޯލްޑިވްސް ޒަކާތު ހައުސްއިން ބުނީ ތެލަސީމިއާ ކުދިންގެ ބޯންމެރޯއަށް ކަނޑައަޅާފައިވާ ފައިސާ ނޭޝަނަލް ސޯޝަލް ޕްރޮޓެކްޝަން އެޖެންސީ، އެންސްޕާއަށް މިހާރު ފޯރުކޮށްދީފައިވާކަމަށެވެ. މި ފައިސާ ޒަކާތު ހައުސްއިން އެންސްޕާއަށް ފޯރުކޮށްދީފައިމިވަނީ 21 ފެބްރުއަރީ 2024ގައި، އިސްލާމީ ކަންތައްތަކާ ބެހޭ ވުޒާރާއާއި، ސިއްޙަތާއި ބެހޭ ވުޒާރާއާއި ދެމެދު ސޮއިކުރައްވާފައިވާ އެއްބަސްވުމުގެ ދަށުންނެވެ.
މޯލްޑިވިއަން ބްލަޑް ސާވިސަސް ތެލަސީމިއާ ސެންޓަރުގައި 651 ފަރާތެއް ވަނީ ތެލަސީމިއާ ޕޭޝަންޓުންގެ ގޮތުގައި ދަފްތަރުކޮށްފައެވެ. މި ދަފުތަރުގައި އެންމެ ގިނައީ 11 އަހަރާއި 20 އަހަރާ ދެމެދުގެ ކުދިންނެވެ. މި އުމުރުފުރާގެ 215 ކުދިން ތިބިއިރު، ދެވަނައަށް އެންމެ ގިނައީ 21 އަހަރާއި 30 އަހަރާ ދެމެދުގެ މީހުންނެވެ.
ފާއިތުވި ތިން އަހަރަށް ބަލާއިރު، 2023 ވަނަ އަހަރު 11 މީހުން، 2024 ވަނަ އަހަރު 18 މީހުން އަދި 2025 ވަނަ އަހަރުގެ މިހާތަނަށް 11 މީހުންނާއެކު ޖުމްލަ 40 ކުދިން އަލަށް ދަފްތަރުގައި ހިމެނިފައިވެއެވެ.އަތޮޅުތަކަށް ބަލާއިރު، އާބާދީގެ ނިސްބަތުން ތެލެސީމިއާ ބަލި ތަހައްމަލުކުރާ މީހުން އެންމެ ގިނައިން ތިބީ ނ. އަތޮޅުގައެވެ. އެ އަތޮޅުގެ 13 ރަށަކުން 53 މީހުން ދަފްތަރުގައި ހިމެނޭއިރު، މިއީ ކޮންމެ ރަށަކަށް އެވްރެޖްކޮށް 4 މީހުންނެވެ. އަދި 18 މީހުންނާއެކު ތެލެސީމިއާ މީހުން ދެވަނައަށް އެންމެ ގިނައީ، ފ. އަތޮޅުގައެެވެ. 43 މީހުންނާއެކު މި ލިސްޓުގެ ތިންވަނައިގައި އޮތީ، ލ. އަތޮޅެވެ.
ތަފާސްހިސާބުތަކަށް ބަލާއިރު، ވ. އަތޮޅުގައި ތެލެސީމިއާގެ އެއްވެސް މީހަކު ނެތްއިރު، ދެވަނައަށް އެންމެ މަދީ މ. އަތޮޅެވެ. އެއީ، އެންމެ 3 މީހުންނެވެ.
ތެލަސީމިއާ ހުންނަ ފަރާތްތަކަށް އެހީ ފޯރުކޮށްދިނުމުގެ ތަޞައްވުރާއެކީ، ސަރުކާރުން ވަނީ މާލެ ސިޓީ ގްރޫޕް އޮފް ހޮސްޕިޓަލްސްގެ ދަށުން މޯލްޑިވިއަން ބްލަޑް ސާވިސަސްގެ ޚިދުމަތްތައް ހުޅުމާލޭ އޮރެންޖު ހިޔާގައި ދޭން ފަށާފައެވެ. އަދި ތެލަސީމިއާ ފަރުވާ ދިނުމަށް ޚާއްޞަ ހޮސްޕިޓަލެއް ތަރައްޤީ ކުރުމުގެ މަސައްކަތްވެސް މިހާރު އަންނަނީ ކުރަމުންނެވެ.
ކިޔުންތެރިންގެ ހިޔާލު