މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަސައްކަތުގެ ސަބަބުން ދިމާވެފައިވާ ޓްރެފިކް ތޮއްޖެހުން ކުޑަކުރުމަށްޓަކައި، ޗާންދަނީ މަގާއި ބޮޑުތަކުރުފާނު މަގު ގުޅޭ ސަރަހައްދު ވަގުތީ ގޮތުން ދެކޮޅަށް ދުއްވޭ ގޮތަށް މާލޭ ސިޓީ ކައުންސިލުން ބަދަލުކޮށްފިއެވެ.
މާލޭ ސިޓީ ކައުންސިލުގެ މީޑިއާ އޮފިޝަލް ވިދާޅުވި ގޮތުގައި، މި ސަރަހައްދުގެ ޓްރެފިކް ފްލޯއަށް މި ބަދަލު ގެނައީ ބޮޑުތަކުރުފާނު މަގު ބަންދުކުރުމާ ގުޅިގެން މަގުތަކުގައި ޓްރެފިކް ތޮއްޖެހުން ބޮޑުވެ، އާންމުންނަށް ދަތިތަކާ ކުރިމަތިލާން ޖެހުމުންނެވެ. މިކަމާ ގުޅިގެން ފުލުހުންގެ ޓްރެފިކް މެނޭޖްމަންޓް ޑިޕާޓްމަންޓުން ދިން އިރުޝާދުގެ މަތިން މި ބަދަލު ގެނެސްފައި ވަނީ ވަގުތީ ފިޔަވަޅެއްގެ ގޮތުންނެވެ. މި ބަދަލާއެކު އޯކިޑު މަގުން ނިކުމެ، ޗާންދަނީ މަގުން ބޮޑުތަކުރުފާނު މަގަށް ދަތުރުކުރެވޭނެ އިންތިޒާމު މިހާރު ވަނީ ހަމަޖެހިފައެވެ.
ބޮޑުތަކުރުފާނު މަގު ޒަމާނީ ފެންވަރަށް ތަރައްގީކުރުމުގެ މަސައްކަތުގެ ދަށުން، ހެންވޭރު ފެރީ ޓާމިނަލުން ފެށިގެން ރަސްމީ ފާލަމާ ހަމައަށް އެ މަގު ބަންދުކޮށްފައިވަނީ މި އަހަރުގެ މާޗު މަހުގެ 23 ވަނަ ދުވަހުއެވެ. މި މަޝްރޫއު ހިންގަމުން އަންނަ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މައުލޫމާތު ދޭ ގޮތުގައި، މަގު ފުޅާކުރުމާއި ތާރު އެޅުމުގެ މަސައްކަތްތައް ބާރު ދުވެލީގައި ކުރިއަށް އެބަދެއެވެ.
މި ސަރަހައްދުގައި ކުރިއަށްދާ މަސައްކަތްތައް މުޅިން ނިންމާ، މިހާރު ބަންދުކޮށްފައިވާ ސަރަހައްދު އާންމުންނަށް އަލުން ހުޅުވާލުމަށް އަމާޒު ހިފާފައިވަނީ އަންނަ ޖުލައި މަހުގެ 26 ވަނަ ދުވަހުގެ ކުރިންނެވެ. އެހާތަނަށް ޓްރެފިކްގެ މި ބަދަލުތައް ދެމިއޮންނާނެ ކަމަށާއި، މަސައްކަތްތައް ނިމުމުން މަގުތަކުގެ ޓްރެފިކް އާންމު ހާލަތަކަށް ބަދަލުވެގެންދާނެ ކަމަށް ކަމާބެހޭ ފަރާތްތަކުން މައުލޫމާތު ދެއެވެ.
ކިޔުންތެރިންގެ ހިޔާލު