ގަތަރުގައި ލިކުއިފައިޑް ނެޗުރަލް ގޭސް (އެލްއެންޖީ) ޕްރޮސެސްކުރާ ސައިޓްގައި އިއްޔެ ހިނގި ނުރައްކާތެރި ހާދިސާއަކީ ބަޔަކުދިން ހަމަލާއެއް ނޫން ކަމަށާއި، އެއީ އެކްސިޑެންޓެއް ކަމަށް ގަތަރު ސަރުކާރުގެ އެނަޖީ މިނިސްޓަރ ސައާދު އަލް ކާބީ ވިދާޅުވެއްޖެއެވެ.
އޭނާ ވިދާޅުވީ، އެއީ ބަޔަކުދިން އުދުވާނީ ހަމަލާއެއް ނުވަތަ އެނޫންވެސް އެ ބާވަތުގެ ކަމެއް ނޫން ކަމަށާއި، އެއީ ހިނގި އެކްސިޑެންޓެއް ކަމަށެވެ.
ހަމަ އެއާއެކު، އެކްސިޑެންޓް ހިނގަން މެދުވެރިވި ސަބަބުން ހޯދުމަށް ތަހްގީގު ފަށާފައިވާ ކަމަށްވެސް، ގަތަރު ސަރުކާރުގެ އެނަޖީ މިނިސްޓަރ ސައާދު އަލް ކާބީ ވިދާޅުވިއެވެ.
ބާރުގަދަ ގޮވުންތަކެއް އިއްޔެ ގޮވާފައިވަނީ ގަތަރުގައި ލިކުއިފައިޑް ނެޗުރަލް ގޭސް (އެލްއެންޖީ) ޕްރޮސެސްކުރާ މައި ސައިޓް ކަމަށްވާ ރަސް ލައްފާންގައެވެ. ގޮވުންތަކާއެކު އެ ސައިޓްގެ ބަރްޒާން ނަމަކަށްކިޔާ ގޭސް ފެސިލިޓީގައި ވަރުގަދައަށް އަލިފާން ރޯވެ އަނދަން ފެށިއެވެ.
މިހާދިސާގައި ގާތްގަނޑަކަށް 13 މީހުން މަރުވެ، 66 މީހުން ޒަޚަމްވެފައިވާ ކަމަށް، ގަތަރު ސަރުކާރުން ހާމަކޮށްފައި ވެއެވެ. މިނިސްޓަރ އެނަޖީ މިނިސްޓަރ އަލް ކާބީ ވިދާޅުވީ، މަރުވި 13 މީހުންނަކީ ސައިޓްގައި މަސައްކަތް ކުރާ ޕާކިސްތާން އަދި އިންޑިއާ ރައްޔިތުން ކަމަށެވެ.
އެލްއެންޖީ ގޭސް ސައިޓް ހާދިސާއާ ގުޅިގެން ގަތަރުއެނަޖީ އިން ނެރުނު ބަޔާނެއްގައި ބުނެފައިވަނީ، ބާރުގަދަ ގޮވުމެއް ގޮވާފައިވަނީ ސައިޓްގެ މަސައްކަތް ފެށިތަނާ ކަމަށެވެ.
ހާދިސާ ހިނގުމާއެކު ރެސްކިއު ޓީމުތައް ވަގުތުން ހަރަކާތްތެރިވާން ފެށި ކަމަށާއި. އެ ތަނުގައި ރޯވި އަލިފާންވެސް މިހާރު ކޮންޓްރޯލް ކުރެވިފައިވާ ކަމަށް ބުނެފައި ވެއެވެ.
ކިޔުންތެރިންގެ ހިޔާލު