ހުއްދަ ނެތި ޓްރާންސްޕޯޓުގެ ހިދުމަތްތައް ކުޅުދުއްފުށި ސިޓީގައި މެދުކަނޑާލީ އެލްޖީއޭގެ ބްރާންޗުން ކަމަށާއި އެ ހިދުމަތްތައް ކުރިޔެކޭ އެއްގޮތަށް އަލުން ފެށުމަށް އަންގާފައިވާ ކަމަށް އެ އިދާރާގެ ސީއީއޯ މުހައްމަދު ނިމާލް ވިދާޅުވެއްޖެއެވެ.
މިދިޔަ ބުދަ ދުވަހުން ފެށިގެން ކުޅުދުއްފުށި ސިޓީގައި ދެމުން އައި ޓްރާންސްޕޯޓުގެ ހިދުމަތްތައް އެ ރަށުގައި ހުންނަ ލޯކަލް ގަވަމަންޓް އޮތޯރިޓީ (އެލްޖީއޭ)ގެ ބްރާންޗުން ވަނީ މެދުކަނޑާލައިފަ އެވެ. ލާމަރުކަޒީ ގާނޫނަށް އައި ބަދަލުތަކާ ގުޅިގެން ކަމަށް ބުނެ އެ ބްރާންޗުން ނިންމި މި ނިންމުމާ ގުޅިގެން ސިޓީގައި ލައިސަންސް ދޫކުރުން ފަދަ މުހިންމު ހިދުމަތްތައް ވަނީ ހުއްޓުމަކަށް އައިސްފަ އެވެ. ކުޅުދުއްފުށީގެ ޑެޕިއުޓީ މޭޔަރު އަހްމަދު އަބްދުﷲ ވެސް ވަނީ އެލްޖީއޭގެ ބްރާންޗުގެ އެ އެންގުމާއެކު ރައްޔިތުންނަށް ދެމުން ދިޔަ ޓްރާންސްޕޯޓުގެ ހިދުމަތްތައް ހުއްޓިފައިވާކަން ކަށަވަރުކޮށްދެއްވައިފައެވެ.
މިކަމާ ގުޅިގެން އެލްޖީއޭގެ ސީއީއޯ މުހައްމަދު ނިމާލް މިއަދު ވިދާޅުވީ، ކުޅުދުއްފުށީ ބްރާންޗުން އެފަދަ ނިންމުމެއް ނިންމީ މައި އިދާރާގެ އެއްވެސް ހުއްދައެއް ނެތި ކަމަށެވެ. އަދި އެ ހިދުމަތްތައް ހުއްޓާލުމަށް ބްރާންޗަށް އެއްވެސް އިރެއްގައި އަންގާފައި ނުވާނެ ކަމަށް އޭނާ ފާހަގަކުރެއްވި އެވެ. އެހެންކަމުން، ކުރިޔެކޭ ވެސް އެއްގޮތަށް ޓްރާންސްޕޯޓުގެ ހިދުމަތްތައް އަލުން ފެށުމަށް މިހާރު އަންގާފައިވާނެ ކަމަށް ނިމާލް ވިދާޅުވިއެވެ.
ނިމާލް ވިދާޅުވި ގޮތުގައި އެލްޖީއޭގެ ބްރާންޗަކަށް އެފަދަ ނިންމުމެއް އަމިއްލައަށް ނިންމުމުގެ އެއްވެސް ގާނޫނީ ބާރެއް ލިބިގެން ނުވެ އެވެ. އަދި ހިދުމަތެއް ހުއްޓާލަން ޖެހޭ ހާލަތެއްގައި އެކަން އަންގާނީ ސީދާ މައި އިދާރާއިން ލިޔުމުން ކަމަށާއި، ކުޅުދުއްފުށީ ބްރާންޗުން މިކަން ކުރީ މައި އިދާރާއާ އެއްވެސް މަޝްވަރާއެއް ކުރުމެއް ނެތި ކަމަށް އޭނާ ވިދާޅުވި އެވެ. މި ހިދުމަތް މެދުކަނޑާލިކަން އެލްޖީއޭގެ މައި އޮފީހަށް އެނގުނީ ވެސް ބްރާންޗުން އެކަން އާންމުކޮށް އިއުލާންކުރި ފަހުންކަން ފާހަގަކުރެވުނެވެ.
ކިޔުންތެރިންގެ ހިޔާލު