ރާއްޖޭގެ އިގުތިޞާދު އިތުރު ހަރުފަތަކަށް ގެންދިއުމަށްޓަކައި ހަމައެކަނި ފަތުރުވެރިކަމަށް ބަރޯސާވެގެން ތިބެވެން ނެތްކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
ދައުލަތުގެ މީޑިއާ ޕީއެސްއެމުން ގެނެސްދިން ޕްރޮގްރާމެއްގައި ވާހަކަދައްކަވަމުން މިނިސްޓަރު ސަޢީދު ވިދާޅުވީ، ފަތުރުވެރިކަމަކީ ރާއްޖެއަށް އެންމެ ބޮޑު އާމްދަނީއެއް ލިބޭ މައި ސިނާއަތް ކަމުގައިވިޔަސް، ގައުމުގެ އިގުތިޞާދު އިތުރު ހަރުފަތަކަށް ގެންދިއުމަށްޓަކައި އެހެން ދާއިރާތަކަށްވެސް އިންވެސްޓުކުރަން ޖެހޭ ކަމަށެވެ. މިގޮތުން، ރާއްޖޭގެ އިގުތިޞާދު ސިންދަފާތުކުރުމަށްޓަކައި ކުރެވޭ މަސައްކަތްތަކުގެ ތެރެއިން، 2030ވަނަ އަހަރުގެ ކުރިން ރާއްޖޭގެ އުފެއްދުންތެރިކަމުގެ 15 އިންސައްތައަކީ ޑިޖިޓަލް ޚިދުމަތްތަކުން ލިބޭ އާމްދަނީއަށް ހެދުމަށް އަމާޒުކޮށްފައިވާ ކަމަށް އޭނާ ފާހަގަކުރެއްވިއެވެ. އަދި ސަރުކާރަށް ތިން އަހަރުވުމުގެ ކުރިން ޒަމާނީ ކްރިއޭޓަރު ހަބެއް ގާއިމުކޮށް، ޒުވާނުންނަށް އިތުރު ފުރުސަތުތަކާއި ވަސީލަތްތައް ފަހިކޮށްދެއްވާނެ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރު މިފަދައިން ވިދާޅުވެފައިވަނީ، އުރީދޫގެ އެހީތެރިކަމާއެކު ރާއްޖެއަށް ޕޭޕަލްގެ ޚިދުމަތް ރަސްމީކޮށް ތަޢާރަފުކޮށްފައިވާ ދަނޑިވަޅެއްގައެވެ. ޕޭޕަލްއަކީ އަމިއްލަ ފަރުދުންނާއި ވިޔަފާރިތަކަށް ރައްކާތެރިކަމާއެކު އޮންލައިންކޮށް ފައިސާ ފޮނުވުމާއި ބަލައިގަތުމުގެ ފުރުސަތު ހުޅުވާލައިދޭ ބައިނަލްއަގުވާމީ ޑިޖިޓަލް ޕޭމަންޓް ޕްލެޓްފޯމެކެވެ. މީގެ ސަބަބުން، ބޭންކް އެކައުންޓް ނުވަތަ ކާޑުގެ މައުލޫމާތު ސީދާ ހިއްސާނުކޮށް، އީކޮމާސް ވިޔަފާރިތަކާއި އޮންލައިން މުޢާމަލާތްތައް ފުޅާދާއިރާއެއްގައި ކުރުމުގެ މަގު ދިވެހިންނަށް ފަހިވެގެންދާނެއެވެ. މިއީ ޑިޖިޓަލް އިގުތިޞާދެއް ބިނާކުރުމަށް އެޅުނު ވަރަށް މުހިންމު ފިޔަވަޅެއްކަމަށް ސަރުކާރުން ދެކެއެވެ.
އިގުތިޞާދު ސިންދަފާތުކުރަން ޖެހިފައިވާކަން މިނިސްޓަރު ފާހަގަކުރެއްވިއިރު، މެދުއިރުމަތީގައި ހިނގަމުންދާ ހަނގުރާމަތަކުގެ ސަބަބުން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ވަނީ 5 އިންސައްތަ ދަށްވެފައެވެ. ފަތުރުވެރިކަމާބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކާގޮތުގައި، މި އަހަރުގެ މިހާތަނަށް ރާއްޖެއަށް އައިސްފައިވަނީ 994,901 ފަތުރުވެރިންނެވެ. އެއް މިލިއަން ފަތުރުވެރިން ހަމަކުރުމަށް އަދި 5,099 ފަތުރުވެރިން ބޭނުންވާއިރު، މިދިޔަ އަހަރުގެ މި މުއްދަތުގައި ރާއްޖެއަށް ވަނީ އެއް މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައެވެ. ފަތުރުވެރިން އަންނަ މިންވަރު މަދުވުމުގެ ސަބަބުން ގައުމަށް ވަންނަ ބޭރު ފައިސާގެ މިންވަރު ދަށްވެ، މިއީ އިގުތިޞާދަށް ކުރިމަތިވެފައިވާ ބޮޑު ގޮންޖެހުމެކެވެ.
ކިޔުންތެރިންގެ ހިޔާލު