ލިއޮނަލް މެސީގެ ހެޓްރިކާ އެކު، 3-0 އިން އަލްޖީރިއާ ބަލިކޮށް ފީފާ ވޯލްޑްކަޕްގައި އާޖެންޓީނާގެ ފަށުން ގަދަކޮށްފިއެވެ.
މިއަދު ހެނދުނު އަލްޖީރިއާއާ ދެކޮޅަށް ކަންސަސް ސިޓީ ސްޓޭޑިއަމްގައި ކުޅުނު މެޗުގައި އަޖެންޓީނާގެ ތިން ލަނޑުވެސް ޖެހީ ކެޕްޓަން މެސީއެވެ. ގައުމީ ޓީމަށް ކުޅުނު 200 ވަނަ މެޗުގައި ޖެހި ތިން ލަނޑު ވެގެންގޮސްފައިވަނީ ވޯލްޑްކަޕްގައި މެސީގެ ފުރަތަމަ ހެޓްރިކަށެވެ. އަދި ވޯލްޑްކަޕްގެ ތާރީޚުގައި އެންމެ ގިނަ ލަނޑު ޖަހައިގެން ލިސްޓްގެ ކުރީގައި އޮތް ޖަރުމަނުގެ މިރޮސްލާވް ކްލޯސާގެ ރެކޯޑާވެސް މެސީ ވަނީ އަރާ ހަމަކޮށްފައެވެ. އެއީ 16 ލަނޑު ހަމަކޮށްގެންނެވެ.
މީގެއިތުރުން ހަވަނަ ވޯލްޑްކަޕެއްގައި ކުޅުނު ފުރަތަމަ ކުޅުންތެރިޔާގެ ޝަރަފްވެސް މެސީއަށް ވަނީ ލިބިފައެވެ. މިޝަރަފް ލިބުނީ ގައުމީ ޖަރޒީގައި ކުޅުނު 200 ވަނަ މެޗުގައެވެ. މިރޭ ޕޯޗްގަލް ކުޅޭ މެޗުން ރޮނަލްޑޯއަށްވެސް އެޝަރަފް ލިބޭނެއެވެ.
މެޗު ފަށައިގެން 4 ވަނަ މިނެޓުގައ މެސީ ގޯލެއް ޖެހިއެވެ. ނަމަވެސް އެ ގޯލް ނިންމީ އެފްސައިޑް ގޯލަކަށެވެ. އޭގެ ފަހުން އަލްޖީރިއާގެ ފަރެޝް ޖެހި ގޯލުވެސް ވަނީ އޮފްސައިޑްކަމަށް ނިންމާފައެވެ. މެޗުގެ 17 ވަނަ މިނެޓުގައި އާޖެންޓީނާއިން ލީޑު ނެގީ އޭރިއާބޭރުން ގޯލުގެ މަތީ ކަނަށް މެސީ އަމާޒުކޮށްލި ބޯޅައާއެކު ޖެހި ގޯލުންނެެވެ. އެ ބޯޅަ ގޯލަށް ވަނީ އަލްޖީރިއާގެ ގޯލުގައި ހުރި ފްރާންސްގެ ކުރީގެ ތަރި ޒިނެދިން ޒިދާންގެ ދަރިފުޅު، ލޫކަ ޒިދާން އަތުގައި ޖެހިފައެވެ. މެޗުގެ 60 ވަނަ މިނިޓްގައި މެސީ ވަނީ އާޖެންޓީނާގެ ދެ ވަނަ ލަނޑު ޖަހައިދީފައެވެ. އަދި ހެޓްރިކް ހަދަން މެޗުގެ 66 ވަނަ މިނިޓްގައި ފޮނުވާލި ބޯޅަ ކީޕަރު ޒިދާން ވަނީ ހުއްޓުވައިފައެވެ. މެސީ ވަނީ 76 ވަނަ މިނިޓްގައި އޭރިއާ ރޮނގުކައިރިން ލިބުނު ބޯޅައެއް ގޯލުގެ ތިރީ ކަނަށް ފޮނުވާލައިގެން ހެޓްރިކް ހަދާފައެވެ.
ކިޔުންތެރިންގެ ހިޔާލު