މިހާރު ކުރިއަށްދާ ދުނިޔޭގެ ތައްޓަށްކުޅޭ ފުޓްބޯޅާ މުބާރާތުގައި މިރޭ މޮރޮކޯއާ ދެކޮޅަށް ބްރެޒިލް ކުޅޭ މެޗުގައި، އެޤައުމުގެ ތަރި ނޭމާ ޖޫނިއަރ ނުފެންނާނެކަން ކަށަވަރުވެއްޖެއެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ބްރެޒިލްގެ ކޯޗު ބްރެޒިލްގެ ކޯޗު ކާލޯ އަންޗެލޮޓީ ބުނީ އަނިޔާއިން ސަލާމަތްވެ ކުޅުމަށް ނޭމާ އަދި ތައްޔާރު ނޫންކަމަށެވެ.
އުމުރުން 34 އަހަރުގެ ކުޅުންތެރިޔާއަށް އަނިޔާވީ ސަންތޯސްއަށް ކުޅެމުންދަނިކޮށް މިދިޔަ މަހުއެވެ. ނޭމާގެ ފައިގެ ކުޑަކޅުވާ މަސްގަނޑަށް އަނިޔާވެފައިވާއިރު، އޭނަ އަދިވެސް އެއްކޮށް ފިޓު ނޫންކަމަށް ކޯޗު ބުންޏެވެ. އެހެންކަމުން ގްރޫޕް ‘ސީ’ ގައި ނިއު ޖާޒީގައި މިރޭ ކުޅޭ މެޗުގެ ސްކޮޑުން އޭނާ ނުފެންނަނެކަން ކޯޗު ވަނީ ކަށަވަރުކޮށްދީފައެވެ.
ކޯޗު ބުނީ އޭނާ އެންމެ ބޮޑަށް ވިސްނަނީ ކުޅުންތެރިންގެ ސިއްހަތަށްކަމަށާއި، ނޭމާގެ ހާލު ރަނގަޅުވަމުން އައިނަމަވެސް އޭނާ އަދި އެއްކޮށް ފިޓު ނުވާކަމަށެވެ.
އަންޗެލޯޓީ މީގެ ކުރިން ވެސް ބުނަމުންދިޔައީ 100 ޕަސެންޓް ފިޓްނޫން ކުޅުންތެރިއަކު ޓީމަށް ނުނަގާނެ ކަމަށެވެ. ނަމަވެސް ތަފާތު ސަބަބުތަކާއި ފިއްތުންތަކާހުރެ ނޭމާ ގައުމީ ޓީމަށް ނެގީ މި ޕޮލިސީ އަށް ބަދަލު ގެނައުމަށްފަހުއެވެ.
ނޭމާ އެންމެ ފަހުން ގައުމީ ޓީމަށް ކުޅުނީ 2023 ވަނަ އަހަރު އެވެ. އަނިޔާގެ ސަބަބުން އޭނާއަށް އެފަހުން ޖާގަ ލިބިފައިނުވާއިރު ބްރެޒިލްގެ ސަންޓޯސްއަށް މީގެ ހައެއްކަ މަސް ކުރިން ބަދަލުވުމަށްފަހު އޭނާ ދިޔައީ ވޯލްޑް ކަޕަށް ފިޓްވޭތޯ މަސައްކަތް ކުރަމުންނެވެ. ނަމަވެސް ރިއޯޑިޖެނީރޯގައިވާ ބްރެޒިލްގެ ފުޓްބޯޅަ ފެޑަރޭޝަނުގެ ރަސްމީ ޓްރޭނިން ކޮމްޕްލެކްސްގައި ފެށި ފަރިތަކުރުންތަކަށް ހާޒިރުވުމާއެކު އޭނާ ގެންދިޔައީ އެ ސިޓީގެ ހޮސްޕިޓަލަކަށެވެ. އަމިއްލަ ހެލިކޮޕްޓަރުގައި ޓްރޭނިން ކޭމްޕަށް ހާޒިރުވުމަށް ފަހު އޭނާ ހޮސްޕިޓަލަށް ދާން ޖެހުނީ ކުޑަކަޅުވާ އަށް ހާނިއްކަވެފައިވާތީވެ ސްކޭން ހެދުމަށެވެ.
މީގެ ކުރިން މިކަމާ ބެހޭ ގޮތުން ސުވާލު ކުރުމުން ނޭމާ ބުނެފައިވަނީ އޭނާގެ ކުޑަކަޅުވާގެ ތަދު ފިލައިފި ކަމަށެވެ. “ކޮން މައްސަލައެއް. އެއްވެސް މައްސަލައެއް ނެތް. އަހަރެން މިހުރީ ވޯލްޑް ކަޕް ކުޅެން ތައްޔާރަށް،” ނޭމާ ބުންޏެވެ.
ކިޔުންތެރިންގެ ހިޔާލު