މިންގަނޑުތަކާ ޚިލާފަށް ކާބޯތަކެތި ބަންދުކޮށް، ލޭބަލްކުރާނަމަ ބޮޑު އަދަދުތަކުން ޖޫރިމަނާ ކުރެވޭގޮތަށް މޯލްޑިވްސް ފުޑް އެންޑް ޑްރަގް އޮތޯރިޓީން ޤަވާއިދެއް އެކުލަވާލާ އާންމުކޮށްފިއެވެ.
އެމްއެފްޑީއޭއިން އާންމުކޮށްފައިވާ ކާބޯތަކެތި ބަންދުކުރުމާއި ލޭބަލްކުރުމުގެ ގަވާއިދުގައި ރާއްޖެއަށް އެތެރެކޮށް، ރާއްޖޭން ބޭރުކުރާ ކާބޯތަކެތީ ބާވަތްތަކާއި ރާއްޖޭގައި ވިއްކާ ބާވަތްތައް ބަންދުކޮށް، ލޭބަލްކޮށްފައި ހުންނަންވާނެގޮތް ތަފްސީލުކޮށް ވަނީ ބަޔާންކޮށްފައެވެ.އައު ގަވާއިދުގައި ބަޔާންކޮށްފައިވާ ގޮތުގައި ކާބޯތަކެތި ބަންދުކުރަންވާނީ ކާބޯތަކެތި ބަންދުކުރުމަށް ޚާއްޞަކޮށްފައިވާ ފުޑް ގްރޭޑަޑް މެޓީރިއަލްތަކުގައެވެ. އަދި ކާބޯތަކެތި އެޅުމަށް ޚާއްޞަކޮށްފައިވާ ކަންވާރު ނޫން ކަންވާރުތަކާއި އެއްފަހަރު ބޭނުންކުރުމަށްފަހު އުކާލަން ހަދާފައި ހުންނަ ޕޮލިއިތެލިން ޓެރެފްތަލޭޓް ނުވަތަ ޕެޓް ފުޅިފަދަ ޕްލާސްޓިކް ފުޅީގައި ކާބޯތަކެތި ބަންދުކުރުމަކީ މަނާކަމެއް ކަމަށްވެސް ވަނީ ބަޔާންކޮށްފައެވެ.
ކާބޯތަކެތި އިމްޕޯޓްކޮށް އެކްސްޕޯޓް ކުރާ ފަރާތްތަކާއި ކާބޯތަކެތި ބަންދުކޮށް ލޭބަލް ކުރާފަރާތެއްގެ އިހުމާލުން އާންމު ސިއްޙަތަށް ނުރައްކަލެއް ކުރިމަތިވެއްޖެނަމަ އެ ފަރާތަކަށް ކާބޯތަކެތީގެ ރައްކާތެރިކުރުމުގެ ޤާނޫނުގެ ދަށުން ދޫކޮށްފައިވާ ލައިސަން ނުވަތަ ރަޖިސްޓްރޭޝަން ހިފެހެއްޓުމާއި ބާތިލުކުރުމުގެ ބާރު މި ގަވާއިދުގެ ދަށުން މޯލްޑިވްސް ފުޑް އެންޑް ޑްރަގް އޮތޯރިޓީއަށް ލިބެއެވެ. އަދި އެމީހެއްގެ އަމިއްލަ ނަމުގައި ނުވަތަ އޭނާގެ ފަރާތުން އެހެން މީހަކު މެދުވެރިކޮށް، އަސްލު އޮޅޭގޮތަށް ލޭބަލްކޮށްފައިވާ ކާބޯތަކެތި ދިވެހިރާއްޖެއަށް އެތެރެކުރުމާއި ވިޔަފާރީގެ ބޭނުމަށް އުފައްދައި ލޭބަލްކޮށް ބަންދުކުރުމަކީ ކުށެއް ކަމަށްވެސް ވަނީ ބަޔާންކޮށްފައެވެ.
މި ކުށަށް އަރައިގަންނަ ފަރާތްތައް 10،000 ރުފިޔާ އާއި 750،000 ރުފިޔާއާ ދެމެދުގެ އަދަދަކުން ޖޫރިމަނާކޮށް، އެ މީހެއްގެ ރަޖިސްޓްރީ ނުވަތަ ލައިސަން ހިފެހެއްޓޭނެއެވެ. އެގޮތުން، ފުރަތަމަ ފަހަރަށް 10،000 ރުފިޔާއިން ޖޫރިމަނާކޮށް ލައިންސަން 7 ދުވަހަށް ހިފަހައްޓާއިރު ދެވަނަ ފަހަރަށް 100،000 ރުފިޔާއިން ޖޫރިމަނާކޮށް ލައިސަން 15 ދުވަހަށް އަދި ތިންވަނަ ފަހަރަށް އެފަދަ ކުށެއް ކޮށްފިނަމަ 750،000 ރުފިޔާއިން ޖޫރިމަނާކޮށް ލައިސަން ނުވަތަ ރަޖިސްޓްރީ ބާތިލުކުރެވޭނެއެވެ. މީގެ އިތުރުން އަސްލު އޮޅޭގޮތަށް ލޭބަލް ކުރުމުގެ ސަބަބުން މީހެއްގެ ސިއްޙަތަށް ގެއްލުމެއް ލިބިއްޖެނަމަ ނުވަތަ ފުރާނައަށް ނުރައްކާވެއްޖެނަމަ އެ އަމަލެއް ކުރި މީހަކު 1،000،000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާކުރުމުގެ ބާރުވެސް އެމްއެފްޑީއޭއަށް ލިބިގެންވެއެވެ.
ގަވާއިދުގައި ބަޔާންކޮށްފައިވާ މިންގަނޑާ ޚިލާފަށް ކާބޯތަކެތި ލޭބަލްކުރުމަކީވެސް ކުށެކެވެ. މި ކުށަށް ފުރަތަމަ ފަހަރަށް އަރައިގަންނަ މީހާ 10،000 ރުފިޔާއިން ޖޫރިމަނާކުރާއިރު ދެވަނަ ފަހަރަށް 100،000 ރުފިޔާއިން، 3 ވަނަ ފަހަރަށް 500،000 ރުފިޔާއިން އަދި 4ވަނަ ފަހަރަށް ކުށަށް އަރައިގެންފިނަމަ 750،0000 ރުފިޔާއިން ޖޫރިމަނާ ކުރެވޭނެއެވެ.
މީގެ އިތުރުން 5ވަނަ ފަހަރަށް ކުށް ތަކުރާރުކޮށްފިނަމަ 1،000،000 ރުފިޔާއިން އެ މީހަކު ޖޫރިމަނާކުރުމުގެ އިތުރުން ލައިސަންސް ނުވަތަ ރަޖިސްޓްރީ ބާތިލްކުރެވޭނެކަމަށްވެސް އައު ޤަވާއިދުގައިވެއެވެ.
ޖޫރިމަނާކުރެވޭ ޢަދަދުތައް
- ފުރަތަމަ ފަހަރަށް 5،000 ރުފިޔާގެ ޖޫރިމަނާއެއް
- 2ވަނަ ފަހަރަށް 25،000 ރުފިޔާގެ ޖޫރިމަނާއެއް
- 3ވަނަ ފަހަރަށް 50،000 ރުފިޔާގެ ޖޫރިމަނާއެއް
- 4ވަނަ ފަހަރަށް 75،000 ރުފިޔާގެ ޖޫރިމަނާއެއް
- 5ވަނަ ފަހަރަށް 100،000 ރުފިޔާގެ ޖޫރިމަނާއެއް
މީގެ ކުރިން އަމަލުކުރަމުން އައި ބަންދުކުރި ކާބޯތަކެތި ލޭބަލްކުރުމުގެ ޤައުމީ މިންގަނޑު ވަނީ އައު ޤަވާއިދާ ގުޅިގެން އުވާލާފައެވެ. ގަވާއިދަށް ވަގުތުން އަމަލުކުރަން ފެށި ނަމަވެސް ލޭބަލްތަކާއި ޕެކޭޖިންތައް އައު ގަވާއިދަށް ފެއްތުމަށް 6 މަސް ދުވަހުގެ މުއްދަތެއް ވަނީ ދީފައެވެ.
ކިޔުންތެރިންގެ ހިޔާލު