ރާއްޖޭގެ ގައުމީ އެއާލައިން މޯލްޑިވިއަން އިން ވޭތުވެދިޔަ އެއް އަހަރު ދުވަހުގެ ތެރޭގައި ހައްޖާއި އުމްރާގެ ދަތުރުތަކަށް ޚާއްސަކޮށްގެން 26 ފްލައިޓެއް ކާމިޔާބުކަމާއެކު އޮޕަރޭޓްކޮށް، 6000 އަށްވުރެ ގިނަ ފަސިންޖަރުންނަށް ޚިދުމަތް ފޯރުކޮށްދީފިއެވެ.
މޯލްޑިވިއަންގެ ތަފާސްހިސާބުތަކުން ދައްކާގޮތުގައި، މިދިޔަ އަހަރުގެ މެއި މަހުން ފެށިގެން މިއަހަރުގެ މެއި މަހުގެ ނިޔަލަށް ޖުމްލަ 6073 ފަސިންޖަރުން ވަނީ އެ އެއާލައިން މެދުވެރިކޮށް ހައްޖާއި އުމްރާގެ އަޅުކަމަށް ދަތުރުކޮށްފައެވެ. މީގެ ތެރޭގައި މިއަހަރުގެ ހައްޖުގެ އަޅުކަމަށް 1016 ހައްޖާޖީންނާއެކު ދަތުރުކުރި ޚާއްސަ ހަތަރު ފްލައިޓް ހިމެނެއެވެ. މި ދަތުރުތަކަކީ ސީދާ ރާއްޖެއިން ސައުދީ އަރަބިއްޔާއަށް ކުރެވޭ ދަތުރުތަކަކަށް ވުމުން، ހައްޖު ކޯޕަރޭޝަނާއި އެހެނިހެން ޖަމާއަތްތަކަށް އަދި ދަތުރުވެރިންނަށް ވަރަށް ބޮޑު ފަސޭހައެއް ލިބިގެންދެއެވެ.
ދިވެހި ހައްޖާޖީންނާއި އުމްރާވެރިންގެ މެދުގައި ގައުމީ އެއާލައިނަށް އޮންނަ މަގުބޫލުކަން ދުވަހެއް ދުވަހަކަށް އަންނަނީ އިތުރުވަމުންނެވެ. މިކަމުގެ މައިގަނޑު ސަބަބަކީ އަމިއްލަ ގައުމުގެ އެއާލައިނެއްގައި ދަތުރުކުރުމުން ފަސިންޖަރުންނަށް ލިބޭ ހިތްހަމަޖެހުމާއި ގާތްކަމެވެ. ހާއްސަކޮށް ދިވެހި މުވައްޒަފުންގެ ފަރާތުން ފެންނަ އޯގާތެރިކަމާއި، ގްރޫޕް ދަތުރުތަކަށް ހާއްސަކޮށްގެން ފަރުމާކޮށްފައިވާ ހިދުމަތްތަކުގެ ސަބަބުން ދަތުރުވެރިންނަށް ބޮޑު ލުޔެއް ލިބިގެންދެއެވެ.
ބުމޯލްޑިވިއަން އިން ހާމަކޮށްފައިވާ ގޮތުގައި އެ ކުންފުނީގެ އެންމެ ބޮޑު އަމާޒަކީ ދަތުރުވެރިންނަށް ރައްކާތެރި، އިތުބާރު ހުރި އަދި ގަޑިއަށް ފަރުވާތެރި އޮޕަރޭޝަނެއް ފޯރުކޮށްދިނުމެވެ. މުޖުތަމައަށް ބޭނުންވާ މިފަދަ މުހިންމު ޚިދުމަތްތައް ފޯރުކޮށްދިނުމުގައި ކުންފުނި އަބަދުވެސް ދެމިއޮންނާނެކަމުގެ ޔަގީންކަން އެ އެއާލައިނުން ދެއެވެ. އަދި ފަސިންޖަރުންގެ ފަރާތުން ލިބޭ އެއްބާރުލުމާއި އިތުބާރު، ކުންފުނިން ވަރަށް ބޮޑަށް ބަލައިގަނެއެވެ.
ކިޔުންތެރިންގެ ހިޔާލު