ރާއްޖޭގެ ސިޔާސީ މައިދާނުގައި ވާދަވެރި ސިޔާސީ އިދިކޮޅު ޕާޓީއެއް ނެތުމަކީ ލިބޭ އުނިކަމެއްކަމަށް ޕީއެންސީގެ ނައިބު ރައީސް އަދި އިޤްތިޞާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ޕީއެންސީން ބޭއްވި ނޫސްވެރިންގެ ބައްދަލުވުމުގައި ސަޢީދު ވިދާޅުވީ، ރާއްޖޭގެ ސިޔާސީ މައިދާނުގައި މިވަގުތު ޕީއެންސީއާ ވާދަކޮށްލާނެ ޕާޓީއެއް ނެތުމަކީ ލިބޭ ވަރަށް ބޮޑު އުނިކަމެއްކަމަށެވެ. ވަޒީރު ވިދާޅުވީ ރައީސް ޑރ. މުހައްމަދު މުއިއްޒު ޕާޓީގެ ލީޑަރަކަށް ވަަޑައިގެންނެވި ހިސާބުން ޕާޓީ ވަރުގަދަކުރުމުގެ މަސައްކަތް ފެއްޓެވިކަމަށާއި، އެ މަސައްކަތުގެ ނަތީޖާއެއްގެ ގޮތުން މިވަގުތު ރާއްޖޭގައި އޮތް އެންމެ ބޮޑު ސިޔާސީ ޕާޓީއަކީ ކޮންގްރެސް ޕާޓީ ކަމަށެވެ.
ސަރުކާރަށް އެބެފުޅުންގެ އަޑު އަހަންޖެހޭ ވަރުގެ ވާދަވެރި ޕާޓީއެއް ނުފެނޭ. މުޅިންވެސް ފެންނަނީ އެތެރޭގެ ހަމަނުޖެހުމާހެދި އުޅޭ އަޑުތައް. އެއް ބޭފުޅަކު އަނެއްބޭފުޅަކަށް އޮންނަ ސިޔާސީ މައްސަލަތަކުގެ ތެރޭގައި އާއްމު ރައްޔިތުން ތާށިވާ މަންޒަރު މި ފެންނަނީ.
ވަޒީރު ސަޢީދު ވިދާޅުވިއެވެ.
ސަޢީދު ވަނީ ރާއްޖޭގެ ސިޔާސީ ޕާޓީތަކުގެ ކިބައިން ތަސައްވުރު ފުދިފައިވާތަންވެސް ނުފެންނަކަމަށް ސިފަކުރައްވާ ވާހަކަފުޅު ދައްކަވާފައެވެ. އަދި ސިޔާސީ ވާދަވެރި ޕާޓީއެއް ނެތުމަކީ ޑިމޮކްރަސީގެ ހަޔާތުގައި ލިބޭ ހިތާމައެއްކަމަށްވެސް ސަޢީދު ވިދާޅުވިއެވެ.
ކިޔުންތެރިންގެ ހިޔާލު