ނޫސްވެރިކަމުގެ މިނިވަންކަމުގެ ނަމުގައި އަބުރާ ބެހުމާއި ގާނޫނުތަކާ ހިލާފު އަމަލުތައް ހިންގުން ބަލައިނުގަނެވޭނެ ކަމަށް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މިނިސްޓަރު މުހައްމަދު ސައީދު ވިދާޅުވެއްޖެއެވެ.
އެކްސް ގައި ކުރެއްވި ޕޯސްޓެއްގައި މިނިސްޓަރު ވަނީ ނޫސްވެރިކަމުގެ މިނިވަންކަމަކީ ޑިމޮކްރަސީގެ މުހިންމު އެއް އަސާސް ކަމަށާއި، މި ސަރުކާރުން މީޑިއާތަކަށް މިނިވަންކަމާއެކު މަސައްކަތް ކުރުމުގެ ފުރުސަތު ފަހިކޮށްދީފައިވާކަން ފާހަގަކުރައްވާފައެވެ. ނަމަވެސް، ނޫސްވެރިކަމުގެ މިނިވަންކަމުގެ ނަމުގައި ބައެއް މީޑިއާތަކުން އަމިއްލަ ފަރުދުންނަށް ހަމަލާ ދިނުމާއި، ދޮގު ވާހަކަތައް ފެތުރުމާއި، ގާނޫނީ އަދި ޝަރުއީ ހަމަތަކާ ހިލާފަށް އަމަލުކުރުމަކީ ނޫސްވެރިކަމުގެ އަހުލާގީ މިންގަނޑުތައް ދަށްވެގެންދާ ކަމެއް ކަމަށް އެމަނިކުފާނު ވިދާޅުވިއެވެ.
މިނިސްޓަރު ސައީދު ވިދާޅުވީ ޕްރެސް ކޮންފަރެންސްތަކަކީ ޒިންމާދާރުކަމާއެކު މައުލޫމާތު ފޯރުކޮށްދިނުމަށް ބާއްވާ ބައްދަލުވުންތަކެއް ކަމަށެވެ. އެއީ ހެކި ނެތި ތުހުމަތުތައް ކުރުމަށާއި، ގާނޫނާ ހިލާފުވުމަށާއި، ކޯޓުތަކުގެ ގަދަރު ކުޑަކުރުމަށް ބޭނުންކުރާ ފުރުސަތުތަކަކަށް ހަދައިގެން ނުވާނެ ކަމަށެވެ. އަދި ޑިމޮކްރަޓިކް މުއައްސަސާތަކުގެ ތެރޭގައި ހިފަހައްޓަންޖެހޭ ޕްރޮފެޝަނަލް ހަމަތަކަށް އިހުތިރާމް ކުރުމުގެ މުހިންމުކަން އެމަނިކުފާނު ފާހަގަކުރެއްވިއެވެ.
މީގެ އިތުރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކޮންމެ ހަފުތާއަކު ނޫސްވެރިންނާ ބައްދަލުކުރައްވައި، ހުޅުވާލެވިފައިވާ މާހައުލެއްގައި އެއްވެސް ހުރަހެއް ނެތި ޖަވާބުދާރީވަމުން ގެންދެވުމަކީ ސަރުކާރުގެ ސާބިތުކަމާއި މައުލޫމާތު ލިބުމުގެ ހައްގަށް އިހުތިރާމް ކުރާކަމުގެ ރަނގަޅު މިސާލެއް ކަމަށް މިނިސްޓަރު ވިދާޅުވިއެވެ.
މި ފުރުސަތުތަކުގެ ބޭނުން ހެޔޮގޮތުގައި ހިފައި، ގާނޫނީ އުސޫލުތަކާއި ނޫސްވެރިކަމުގެ އަހުލާގީ ޒިންމާތައް އަދާކުރުމަށް ރާއްޖޭގެ ހުރިހާ ނޫސްވެރިންނަށް މިނިސްޓަރު ގޮވާލެއްވިއެވެ.
ކިޔުންތެރިންގެ ހިޔާލު