ޑިޖިޓަލް މާހައުލުގެ ތެރޭގައި ކުޑަކުދިންނަށް ކުރިމަތިވާ ނުރައްކާތައް ދަނީ އިތުރުވަމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ކުޑަކުދިންގެ ދުވަސް ފާހަގަކުރުމުގެ ގޮތުން ފޮނުއްވި ޚިޠާބެއްގައި ރައީސް ވިދާޅުވީ، ޒަމާނީ ޓެކްނޮލޮޖީއާއި ޑިޖިޓަލް އާލާތްތަކުގެ ސަބަބުން ބައެއް ކުދިންނަށް ދާއިމީ އަސަރުތަކެއް ކޮށްފާނެ ފަދަ ނުރައްކާތަކާ ކުރިމަތިލާން ޖެހިފައިވާ ކަމަށެވެ.
މި މުނާސަބަތަކީ ކުދިންގެ ދުޅަހެޔޮކަމާއި ކުރިއެރުމަށް މަގުފަހިކޮށްދިނުމަށް ބެލެނިވެރިންނާއި މުދައްރިސުން އާ ގޮތްތަކެއް ހޯދުމަށް ވިސްނަންވީ ވަގުތެއް ކަމުގައި ރައީސް ވިދާޅުވިއެވެ.
ކުދިން ބޮޑުވަމުން އަންނަ އިރު އެކުދިންނަށް ބޭނުންވާ ލޯތްބާއި، އިރުޝާދާއި، އެހީތެރިކަން ފޯރުކޮށްދިނުމަކީ ގޭތެރެއިންނާއި ސްކޫލުތަކުން ބޮޑެތި މީހުން އަދާކުރަންޖެހޭ ޒިންމާއެއް ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ، މިއަދުގެ ކުދިންނަކީ މާދަމާ ގައުމު ހިންގާނެ ޒުވާނުން ކަމަށްވާއިރު، އެކުދިންނަކީ އިސްލާމީ ރިވެތި އުސޫލުތަކާއި ދިވެހިވަންތަ އާދަކާދަތަކަށް އަހުލުވެރި، އަޚްލާޤު ރަނގަޅު ބަޔަކަށް ހެދުމަށް އެންމެން ގުޅިގެން މަސައްކަތްކުރަން ޖެހޭ ކަމަށެވެ.
ކުދިންނަކީ ގައުމުގެ މުސްތަގުބަލު ކަމަށާއި، ތަޢުލީމު ލިބޭނެ ފުރުސަތުތަކާއި ރަނގަޅު ތަރުބިއްޔަތު ފޯރުކޮށްދިނުމަކީ ސަރުކާރާއި މުޖުތަމަޢުގެ ވެސް ޒިންމާއެއް ކަމަށް ރައީސް ވިދާޅުވިއެވެ. އަދި ރާއްޖޭގެ ހުރިހާ ކުދިންނަށް ސިއްހީ ޚިދުމަތާއި ތަޢުލީމީ ފުރުސަތުތައް ފޯރުކޮށްދިނުމަށް ސަރުކާރުން ދޭ އަހަންމިއްޔަތު އެމަނިކުފާނު ތަކުރާރުކުރެއްވިއެވެ.
ސްކޫލު ނިޒާމުގެ ތެރެއިން ލިބެން ހުރި ފުރުސަތުތަކުގެ ފައިދާ ހުރިހާ ދިވެހި ކުދިންނަށް ލިބޭނެކަން ކަށަވަރުކުރުމަށް ސަރުކާރުން މަސައްކަތް ކުރަމުންދާ ކަމަށް ރައީސް ވިދާޅުވިއެވެ. އަދި ކުދިންނަށް ކުރާ އަނިޔާތަކުން އެކުދިން ރައްކާތެރިކޮށް، ރައްކާތެރި މާހައުލެއް ގާއިމުކޮށްދިނުމަކީ ސަރުކާރުގެ އެންމެ މުހިންމު އިސްކަމެއް ދޭ ކަންތައްތަކުގެ ތެރޭގައި ހިމެނޭ ކަމެއް ކަމަށް އެމަނިކުފާނު ފާހަގަކުރެއްވިއެވެ.
ކިޔުންތެރިންގެ ހިޔާލު