ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް ކުރެވޭ އެމެރިކާ ޑޮލަރުގެ މުޢާމަލާތްތައް އިތުރުވުމަކީ ވިޔަފާރީގެ ހަރަކާތްތައް އިތުރުވެފައިވާކަން އަންގައިދޭ ކަމެއްކަމަށް އިޤްތިޞާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން، ބޭރު ފައިސާ ލިބުމުގެ ދަތިކަމުގެ ސަބަބުން ކުދި ވިޔަފާރިތަކަށް ދިމާވާ ދަތިތައް ހައްލުކުރުމަށް އަޅަމުންދާ ފިޔަވަޅުތަކާ ގުޅޭގޮތުން ނޫސްވެރިން ކުރި ސުވާލުތަކަށް ސަޢީދު ޖަވާބުދެއްވިއެވެ.
ބީއެމްއެލްއިން ނެރެފައިވާ ތަފާސްހިސާބުތަކަށް އަލިއަޅުއްވާލައްވަމުން ވަޒީރު ވިދާޅުވީ، ވިޔަފާރިތަކަށާއި ރާއްޖެއިން ބޭރަށް ކުރާ މުޢާމަލާތްތަކަށް ބޭންކުން ވިއްކި ޑޮލަރުގެ މިންވަރު މިދިޔަ އަހަރާ އަޅާބަލާއިރު އިތުރުވެފައިވާ ކަމަށެވެ.
“ބައެއްފަހަރު ހަމަ މި ނޫސްވެރިން ސުވާލުކުރޭ ވިޔަފާރިތައް ދަށަށް ދަނީތޯ،” ސަޢީދު ވިދާޅުވިއެވެ.
“ނަމަވެސް، މި އަދަދުތަކުން އަންގައިދެނީ ވިޔަފާރިތައް ކުރިއަރަމުން އަންނަކަން. ޑޮލަރަށް އޮތް ޑިމާންޑު ބޮޑުވަމުން އަންނަކަމާއި، އަދި މުޢާމަލާތްކުރެވޭ މިންވަރުވެސް އަންނަނީ އިތުރުވަމުން.”
ސައީދު އިތުރަށް ވިދާޅުވީ ބޭރު ފައިސާއަށް އޮންނަ ޑިމާންޑު އިތުރުވުމުގެ ސަބަބުން ބޭންކަށް ވަންނަ ޑޮލަރުގެ ފްލޯއަށް ބާރުބޮޑުވާކަމަށާއި، އަދި އިތުރަށް ބޭރު ފައިސާ ހޯދުމަށް މަސައްކަތްތަކެއް ކުރަންޖެހިފައިވާ ކަމަށެވެ.
މިދިޔަ ހަފުތާގައި ބީއެމްއެލްއިން އާންމުކުރި ތަފާސްހިސާބުތަކަށް ބަލާއިރު، މިއަހަރުގެ އޭޕްރީލް މަހުގެ ނިޔަލަށް ބޭރަށް ފައިސާ ފޮނުވުމަށާއި ބޭރުގެ މުޢާމަލާތްތަކަށް ބޭންކުން ވަނީ 296 މިލިއަން އެމެރިކާ ޑޮލަރު ވިއްކާފައެވެ. އޭގެ ބަދަލުގައި، މިދިޔަ އަހަރުގެ މުޅި ޖުމްލަ ޑޮލަރު ވިއްކި މިންވަރު ހުރީ 566 މިލިއަން އެމެރިކާ ޑޮލަރުގައެވެ.
ތަފާސްހިސާބުތަކުން ދައްކާގޮތުގައި، 2025 ވަނަ އަހަރު މަހެއްގެ މައްޗަށް އެވްރެޖްކޮށް 47 މިލިއަން އެމެރިކާ ޑޮލަރު ވިއްކާފައިވާއިރު، މިއަހަރުގެ ފުރަތަމަ ހަތަރު މަސްދުވަހުގެ ތެރޭގައި އެވްރެޖްކޮށް މަހެއްގެ މައްޗަށް ވިއްކި ޑޮލަރުގެ މިންވަރު ވަނީ 74 މިލިއަން އެމެރިކާ ޑޮލަރަށް އަރާފައެވެ.
މިދިޔަ މުޅި އަހަރު ދުވަހުގެ ތެރޭގައި ޑެބިޓް އަދި ކްރެޑިޓް ކާޑުގެ މުޢާމަލާތްތަކަށް 390 މިލިއަން އެމެރިކާ ޑޮލަރު ދޫކޮށްފައިވާއިރު، މިއަހަރުގެ އޭޕްރީލް މަހުގެ ނިޔަލަށް ބީއެމްއެލްއިން ވަނީ ކާޑުގެ މުޢާމަލާތްތަކަށް 160 މިލިއަން އެމެރިކާ ޑޮލަރު ދޫކޮށްފައެވެ. މަހެއްގެ މައްޗަށް ކާޑުން ކުރެވޭ މުޢާމަލާތްތަކުގެ އެވްރެޖް ވަނީ މިދިޔަ އަހަރުގެ 33 މިލިއަން ޑޮލަރުން މިއަހަރު 40 މިލިއަން ޑޮލަރަށް އިތުރުވެފައެވެ.
ޓެލެގްރާފިކް ޓްރާންސްފަރސް (ޓީޓީ) އަށް ބަލާއިރު، މިދިޔަ މަހުގެ ނިޔަލަށް ބޭންކުން ވަނީ 136 މިލިއަން އެމެރިކާ ޑޮލަރު ފޯރުކޮށްދީފައެވެ. އެއީ މަހެއްގެ މައްޗަށް އެވްރެޖްކޮށް 34 މިލިއަން އެމެރިކާ ޑޮލަރެވެ. މިދިޔަ އަހަރު، ޓީޓީގެ ގޮތުގައި ޖުމްލަ 175 މިލިއަން އެމެރިކާ ޑޮލަރު ދޫކޮށްފައިވާއިރު، އެއީ މަހެއްގެ މައްޗަށް އެވްރެޖްކޮށް 15 މިލިއަން އެމެރިކާ ޑޮލަރެވެ.
ކިޔުންތެރިންގެ ހިޔާލު