ކުރީގެ ސަރުކާރުން 2021 ވަނަ އަހަރު ދޫކުރި 500 މިލިއަން ޑޮލަރުގެ ސޮވެރިން ސުކޫކް (އިސްލާމީ ބޮންޑް) ކާމިޔާބުކަމާއެކު އަނބުރާ ދެއްކުމަކީ ބައިނަލްއަގުވާމީ އިންވެސްޓަރުންގެ މެދުގައި ރާއްޖޭގެ އިގްތިސާދަށް އޮތް އިތުބާރު ވަރަށް ބޮޑަށް އިތުރުވެގެންދިޔަ ކަމެއް ކަމަށް އިގްތިސާދީ ތަރައްގީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.

ސައީދު ވިދާޅުވީ ރާއްޖެއިން ދަރަނި ނުދެއްކި “ޑިފޯލްޓް” ވެދާނެ ކަމަށް ބައިނަލްއަގުވާމީ މީޑިއާތަކުން ބުނަމުންދިޔަ ދަނޑިވަޅެއްގައި، މި ދަރަނި އަދާކުރުމަކީ ގައުމަށް ލިބުނު ބޮޑު ކާމިޔާބީއެއް ކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު އެންމެ އިސްކަމެއް ދެއްވި އެއް ކަމަކީ މި ސުކޫކް ދެއްކުމެވެ.

މިއަހަރުގެ އޭޕްރީލް 8 ވަނަ ދުވަހަށް މުއްދަތު ހަމަވާ މި ސުކޫކް، ސަރުކާރުން ވަނީ އޭޕްރީލް 2 ވަނަ ދުވަހު ދައްކާ ޚަލާޞްކޮށްފައެވެ. މި ފައިސާ ދައްކާފައިވަނީ ދައުލަތުގެ ރިޒާވާއި ސޮވެރިން ޑިވެލޮޕްމަންޓް ފަންޑް (އެސްޑީއެފް) ބޭނުންކޮށްގެންނެވެ.

މިނިސްޓަރު ސައީދު ވިދާޅުވީ، މި ދަރަނި ދެއްކުމުން ރާއްޖެއަކީ މާލީ ގޮތުން އިތުބާރު ހިފޭ ގައުމެއްކަން މުޅި ދުނިޔެއަށް ސާބިތުވެގެންދިޔަ ކަމަށެވެ.

“މީގެ ސަބަބުން ރާއްޖޭގައި އިންވެސްޓްކުރަން ބޭނުންވާ ފަރާތްތަކަށާއި، މިހާރު ވެސް އިންވެސްޓްކޮށްފައިވާ ބޭރުގެ ފަރާތްތަކާއި ދިވެހި ވިޔަފާރިވެރިންނަށް ވެސް ބޮޑު އިތުބާރެއް ލިބިގެންދިޔަ،” މިނިސްޓަރު ވިދާޅުވިއެވެ.

4. ބައިނަލްއަގުވާމީ މީޑިއާގެ ސަމާލުކަންމީގެ ކުރިން ބައެއް ރިޕޯޓްތަކުގައި ރާއްޖޭގެ އިގްތިސާދީ ހާލަތު އަވަށްޓެރި ސްރީލަންކާގެ ހާލަތާ އެއްގޮތްވެދާނެ ކަމަށް ބުނެ ކަންބޮޑުވުން ފާޅުކޮށްފައިވެއެވެ. ނަމަވެސް، ދަރަނި އަދާކުރުމާ ގުޅިގެން މިހާރު މީޑިއާތަކުން ރާއްޖެއާ މެދު ޕޮޒިޓިވްކޮށް ރިޕޯޓްކުރަމުންދާ ކަމަށާއި، މިއީ އިންވެސްޓަރުންނަށް ލިބުނު ވަރަށް ބޮޑު ހިތްހަމަޖެހުމެއް ކަމަށް މިނިސްޓަރު ފާހަގަކުރެއްވިއެވެ.

މިނިސްޓަރު ސައީދު ވިދާޅުވީ ރައީސް މުޢިއްޒުގެ އެންމެ ބޮޑު އެއް ކާމިޔާބީއަކީ ގައުމު ޑިފޯލްޓުން ސަލާމަތްކޮށް، ބައިނަލްއަގުވާމީ މައިދާނުގައި ރާއްޖޭގެ އަގު ހިފެހެއްޓެވުން ކަމަށެވެ.