ވެރިކަން ހިންގާ، ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ކޮންގްރެސް އަންނަ އޮކްޓޯބަރު މަހު ބޭއްވުމަށް ނިންމައިފިއެވެ.
އަންނަ އޮކްޓޯބަރު މަހުގެ ތެރޭގައި ޕީއެންސީގެ ކޮންގްރެސް ބޭއްވުމަށް އެ ޕާޓީގެ ލީޑާޝިޕުން ނިންމަވާފައިވާކަން އިއުލާންކުރެއްވީ، އާޓިފިޝަލް ބީޗުގައި މިރޭ ބޭއްވި ޕީއެންސީގެ “ދަ ގްރޭޓާ އައްޑޫ އިވެންޓް” ގައި އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
“ކުރިއަށްއޮތް ދުވަސްތަކަކީ މި ޕާޓީ އިތުރަށް ވަރުގަދަވެގެންދާނެ ދުވަސްތައް. އެގޮތުން މިއަހަރުގެ އޮކްޓޯބަރު މަހުގެ ތެރޭގައި އިރާދަކުރެއްވިއްޔާ ޕާޓީގެ ކޮންގްރެސް ބާއްވާނަން، އެގޮތަށް މިހާރު އޮންނާނީ ލީޑާޝިޕުން ނިންމާފައި. އެހެންވީމާ އެ ކޮންގްރެސްއަކީ ވެސް އަޅުގަނޑުމެންގެ ތެރޭގައި ސިޔާސީގޮތުން ކުރިއަށްދިއުމަށްޓަކައި ބޭނުންވާ ފަރާތްތަކަށް ވަރަށް މުހިންމު ފުރުސަތެއް، ވަރަށް ފުޅާ ފުރުސަތެއް އެ ލިބިގެން އަންނަނީ،” އެ މަނިކުފާނު ވިދާޅުވިއެވެ.
ރައީސް ވިދާޅުވީ ކުރިއަށްއޮތް ކޮންގްރެސްއަށް ތައްޔާރުވުމަށްޓަކައި މިހާރުއްސުރެ ޕީއެންސީއާ އިތުރު ފަރާތްތައް ގުޅުމަށާއި، މިހާރު ތިބި ފަރާތްތަކުން ވެސް އިތުރަށް މަސައްކަތްކުރުމަށާއި، ކެމްޕޭނުގައި ވެސް އިތުރަށް ހިތްވަރުލައިގެން ނުކުމެ މަސައްކަތްކުރުމަށާއި، މިހާރު އެކި ސަބަބުތަކާ ހުރެ އެކި ކަހަލަ ކުދި ހިތްހަމަނުޖެހުމުގައި ގޭގައި ތިބި ފަރާތްތަކުން ވެސް ނުކުމެ މަސައްކަތްކުރުމަށް އެދިވަޑައިގަންނަވާ ކަމަށެވެ.
“މި ކޮންގްރެސްއަކީ ވަރަށް އިންސާފުވެރިކަމާއެކު އަޅުގަނޑުމެން ބާއްވާނެ ދެފުށްފެންނަ ވަރަށް ފުރިހަމަ ކޮންގްރެސްއަކަށް އިރާދަކުރެއްވިއްޔާ ވާނެ. މި ޕާޓީ ކަންކަން ކުރަމުންދާނީ އަބަދުވެސް ކަންކަން ކުރަމުންދާގޮތަށް، ވަރަށް އޯގަނައިޒްކޮށް، ވަރަށް ތަރުތީބުން ދެފުށްފެންނަ ގޮތަށް. އަޅުގަނޑު އެދެނީ އަޅުގަނޑުމެންގެ ފިކުރުގައި ތިބި ހުރިހާ ރައްޔިތުން އަތުކުރި އޮޅާލައިގެން މިހާރު ނުކުންނަން،” އެ މަނިކުފާނު ވިދާޅުވިއެވެ.
ރައީސް އިތުރަށް ވިދާޅުވީ ޕީއެންސީއަކީ ވަކި މީހެއްގެ އެއްޗެއް ނޫން ކަމަށާއި އެ ޕާޓީއަކީ ހުރިހާ މެންބަރުންގެ ޕާޓީއެއް ކަމުން، ޕީއެންސީން ޕްރޮމޯޓުކުރާނީ ޕާޓީ ކަމަށެވެ. އަދި ޕީއެންސީއަކީ ޕާޓީ ނިޒާމަށް ފުރިހަމައަށް ތަބާވާ، ޕާޓީ ނިޒާމު ކުރިއެރުވުމަށްޓަކައި މަސައްކަތްކުރާ، ޑިމޮކްރަސީއަށް ލޯބިކުރާ ޕާޓީއެއް ކަމަށް އެ މަނިކުފާނު ވިދާޅުވިއެވެ.
ކިޔުންތެރިންގެ ހިޔާލު