ލުބުނާނުގެ ހިޒްބުﷲގެ ހަމަލާތައް ވަރުގަދަވެ، އިސްތިއުމާރީ އިސްރާއީލު އަސްކަރިއްޔާގެ ފޯކަސް ލުބުނާނަށް ހުއްޓިއްޖެއެވެ.

ހިޒްބުﷲ މުޖާހިދުން ގެންދަނީ އިސްރާއީލުގެ އުތުރުގެ ރަށްތަކަށް ވަރުގަދަ ހަމަލާތަކެއް ދެމުންނެވެ. އަދި ލުބުނާނުގެ އިމާ ގާތުގައި ހަދާފައިވާ އިސްތިއުމާރީ ސިފައިންގެ މަރުކަޒުތަކާއި، އަސްކަރީ ޕޯސްޓްތަކަށްވެސް ވަރުގަދަ ހަމަލާތަކެއް ދެމުން އެބަ ގެންދެއެވެ.

ކްފަރް ޔުވަލްގައި ހުންނަ އިސްތިއުމާރީ ސިފައިންގެ މަރުކަޒަށް ހިޒްބުﷲ މުޖާހިދުން ބުރާސްފަތި ދުވަހު ހަމަލާ ދީފައިވަނީ ގައިޑެޑް މިސައިލް ބޭނުންކޮށްގެންނެވެ.

ހިޒްބުﷲއިން ނެރުނު ބަޔާނެއްގައި ބުނެފައިވަނީ، މިސައިލުން ހަމަލާދިނީ އިސްރާއީލުގެ ނަފްޓަލީ އަސްކަރީ ބޭހަށް ކަމަށެވެ.

މީގެއިތުރުން، ލުބުނާނުގެ ދެކުނަށް އަރާތިބި އިސްތިއުމާރީ ސިފައިންގެ އަސްކަރީ ވެހިކަލްތަކެއް  ޖަމާވެފައި ތިބި ތަނަކަށްވެސް ވަރުގަދަ ހަމަލާތަކެއް ދީފައިވާކަން ހިޒްބުﷲއިން ވަކިން ނެރުނު ބަޔާނެއްގައި ބުނެފައި ވެއެވެ.

މި ހަމަލާގައި ޓެރަރިސްޓުންގެ އެތައް ސިފައިން މަރުވެ، އެމީހުންގެ ހަތިޔާރާއި، ތަންތަނަށް ބޮޑެތި ގެއްލުންތައް ދެވިފައިވާ ކަމަށް ހިޒްބުﷲއިން ބުނެއެވެ.

މިއީ، އިސްތިއުމާރީ ސިފައިން ލުބުނާނުގެ ސިޓީތަކަށާއި، އަވަށްތަކާއި އަދި ވެރިރަށް ބެއިރޫތުގެ ދެކުނުގެ އަވަށްތަކަށް ދެމުންގެންދާ އުދުވާނީ ހަމަލާތަކުގެ ބަދަލު ހިފުމުގެގޮތުން ދެވުނު ހަމަލާތަކެއް ކަމަށް ހިޒްބުﷲއިން ނެރުނު ބަޔާނުގައި ބުނެފައި ވެއެވެ.

އިސްތިއުމާރީ ޓެރަރިސްޓުން ގެންދަނީ ބެއިރޫތުގައި އާންމުން ދިރިއުޅޭ އެތައް އިމާރާތަކަށް ބޮންއަޅައި ބިމާހަމަކުރަމުންނެވެ.

ހިޒްބުﷲއިން އިސްރާއީލަށް ދެމުންގެންދާ ހަމަލާތައް އިތުރަށް ވަރުގަދަވެ، އިސްތިއުމާރީ ބާރުގެ އުތުރުގެ ހިސާބުތަކުން މީހުން ހުސްކުރަމުންދާ ކަމަށްވެސް ޚަބަރުތައް ބުނެއެވެ.

ރިޕޯޓްތައް ބުނާގޮތުގައި، ހިޒްބުﷲއިން އިސްތިއުމާރީ އިސްރާއީލަށް ރޮކެޓާއި، މިސައިލުން ހަމަލާތައް ދޭން މިފެށީ، އިސްރާއީލުން ލުބުނާނަށް ވަރުގަދަ ވައިގެ ހަމަލާތަކެއް ދިނުމަށް ތައްޔާރު ވަމުންދަނިކޮށް އެމީހުންނަށް ވުރެން ކުރިންނެވެ.

މިކަމާހެދި އިސްތިއުމާރީ އަސްކަރިއްޔާއަށް ސިހުން ލިބިގެން ދިޔަކަމަށް ޚަބަރުތައް ބުނެއެވެ.

އިސްތިއުމާރީ އިސްރާއީލުން މިހާރު ގެންދަނީ ހިޒްބުﷲގެ ތަންތަން ކަމަށް ބުނެ ލުބުނާނުގެ ހުރިހާ ހިސާބަކަށް ބޮންއަޅަމުންނެވެ.

ހިޒްބުﷲއިން ކެނޑިނޭޅި ވަރުގަދަ ހަމަލާތަކެއް ދެމުން ގެންދިއުމާއި، އަދި އެ ހަމަލާތަކުގައި އިސްރާއީލަށް ބޮޑެތި ގެއްލުންތައް ލިބެމުންދާތީ، އިސްތިއުމާރީ އަސްކަރިއްޔާގެ ހުރިހާ ފޯކަސްއެއް މިހާރު ހުއްޓިފައިވަނީ ލުބުނާނަށް ކަމަށް ވެއެވެ.

އިސްތިއުމާރީ އަސްކަރިއްޔާގެ ޓެރަރިސްޓު ޗީފް އޮފް ސްޓާފް އިޔާލް ޒާމިރު މިހާރުވަނީ، ލުބުނާނުގެ ދެކުނަށް އަރާ ތިބި ސިފައިން ހިފައިގެންތިބި ލުބުނާނުގެ ބިމުގެ ސަރަހައްދު އިތުރަށް ފުޅާކުރުމަށް އަމުރު ކޮށްފައެވެ.

އިސްތިއުމާރީ ބާރުން ބުރާސްފަތި ދުވަހުވަނީ، ލުބުނާނުގެ ދެކުނުގެ އެތައް ރަށަކުން އާންމުން ފައިބައިގެން ދިއުމަށް އަމުރުކޮށް، އިންޒާރުދީ، މުހުލަތުވެސް ދީފައެވެ. މިކަމާހެދި، ލުބުނާނުގެ އެތައްހާސް ބަޔަކު މަގުމަތިވަމުންދާ ކަމަށް ލުބުނާނުން ބުނެއެވެ.

އިސްރާއީލުގެ އަސްކަރިއްޔާއިން މިހާރު ދަނީ، ލުބުނާނު – އިސްރާއީލު ވަކިކުރާ އިމަށް ހަނގުރާމައިގެ ޓޭންކާއި، އިތުރު ހަތިޔާރާއި ސިފައިންވެސް ޖަމާކުރަމުންނެވެ.