ރޯދަ މަސް ނިމުމުގެ ކުރިން ޓެކްސީލައިންގެ ޚިދުމަތް ފެށުމަށް މަސައްކަތް ކުރަމުންދާ ކަމަށް ދަތުރުފަތުރާއި، މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު ވިދާޅުވީ، މި ޚިދުމަތް ފެށުމަށް ބޭނުންވާ ޓެކްސީތައް މިހާރު ރައްޖެ ގެނައުމުގެ މަގުމަތީގައިވާ ކަމަށެވެ.

ސަރުކާރުގެ ފަރާތުން މާލޭގައި ޓެކްސީގެ ޚިދުމަތް ދިނުމަށް ނިންމަވައި، ޓެކްސީލައިން ޤާއިމްކުރުމަށް ޙަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީއާއެވެ. މިއީ، ޓެކްސީ ހޯދުމުގައި ދިމާވާ ދަތިތައް ޙައްލު ކޮށްދިނުމަށާއި، ޒަމާނީ ޓެކްސީ ޚިދުމަތެއް ތަޢާރަފްކޮށް މިހާރު ދެމުންދާ ޓެކްސީ ޚިދުމަތުގެ ފެންވަރު ރަނގަޅު ކުރުމަށް ބާރު އެޅުމަށް ސަރުކާރުން ތަޢާރަފް ކުރާ ޚިދުމަތެކެވެ.

” އެހެންވީމަ ހުޅުވާލަމުން ގެންދާނީ ވަކި މިންގަނޑެއް ތެރޭގައި. އެކަމަކު ޓެކްސީލައިން އިފްތިތާޙްކޮށް ލިމިޓެޑް ސާވިސްތަކެއް ތަޢާރަފް ކުރުމަށް މަސައްކަތް ކުރަނީ މިމަހުގެ 18 ގައި. އީދަށް މިކަންތައް ފެށޭތޯ މަސައްކަތް ކުރަނީ. އިރާދަ ކުރެއްވިއްޔާ މިހާރު މިއޮތް ތާވަލާއި އެއްގޮތަށް މިކަންތައް ކުރެވޭތޯ ބަލަނީ. ” ވަޒީރު

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޚިދުމަތް ފެށުމަށް ވަމުންދާ ތައްޔާރީތަކާއި ގުޅޭގޮތުން ޕީއެސްއެމްއިން ކުރި ސުވާލަކަށް ޖަވާބު ދެއްވަމުން ވަޒީރު އަމީން ވިދާޅުވީ، ޓެކްސީ ޚިދުމަތް ފެށުމަށް ތައްޔާރު ކުރާ ޓެކްސީތައް ރާއްޖޭގެ މާޙައުލާއި ގުޅޭނެހެން ބަދަލުތަކެއް ގެނެސް ނިމިފައިވާ ކަމަށެވެ. އަދި ޓެކްސީތަކަށް ބަދަލު ގެނެސްފައިވަނީ ރާއްޖެއަކީ ޖަޒީރާ ރަށްތަކަށް އެކުލެވޭ ޤައުމަކަށްވެފައިވާ ޓެކްސީ އޮޕަރޭޓް ކުރަން ޖެހެނީ މޫދާއި ކައިރި ސަރަހައްދެއްގައި ކަމުން، އިލެކްޓްރޯނިކް ވަސީލަތްތަކަށް އެކަމާއި ގުޅޭ ބަދަލުތައް ގެންނަން ޖެހޭތީ ކަމަށެވެ.

މި ބަދަލުތަކާއެކު 3 މޮޑެލްއެއްގެ ޓެކްސީ ތައްޔާރުކުރެވީ ދެ ބެޗެއްގެ ތެރެއިން ރާއްޖެ ގެނައުމުގެ މަސައްކަތް ކުރަމުންދާ ކަމަށް ވަޒީރު ވިދާޅުވިއެވެ. މީގެ ތެރެއިން އެއް ބެޗު ގެންނަނީ ތައިލޭންޑުންނެވެ. އެ ޤައުމުން އެ މޮޑެލްގެ 60 ކާރު ގެންނައިރު، ބާކީ ކާރުތައް ގެންނަނީ ޗައިނާއިންނެވެ. ޗައިނާއިން ދެ މޮޑެލްއެއްގެ ކާރު ގެންނާނެ ކަމަށް ވަޒީރު ވިދާޅުވިއެވެ.

” އަޅުގަނޑަށް އެމްޓީސީސީން ލިބިފައިވާ މައުލޫމާތަކީ މިމަހުގެ 11 ވަނަ ދުވަހު އެއްބެޗު މާލެ އަންނާނެ. ދެވަނަ ބެޗު އަންނަނީ ޗައިނާއިން. މިއަދު އަޅުގަނޑު މައުލޫމާތު ސާފުކޮށްލިން، ހުކުރު ދުވަހު ލިބޭނެ ދެވަނަ ބެޗުގެ އެރައިވަލް ޑޭޓެއް. ” ވަޒީރު މުޙައްމަދު އަމީން

ވަޒީރު ވަނީ، ސަރުކާރާއި އެމްޓީސީސީން ގުޅިގެން މި ޚިދުމަތް ރޯދަމަސް ނިމުމުގެ ކުރިން ފެށުމަށް މަސައްކަތް ކުރަމުންދާ ކަމަށް ވިދާޅުވެފައެވެ. އަދި ޚިދުމަތް ދޭން ފަށާނީ މަރުޙަލާތަކަކަށް ބަހާލައިގެން ވަކި މިންގަނޑެއްގެ ތެރެއިން ކަމަށް ވިދާޅުވިއެވެ.

ސަރުކާރުން ވަނީ، ޓެކްސީލައިން ޚިދުމަތަށް 150 ކާރު ގެނައުމަށް ނިންމާފައިވާ ކަމަށް ވިދާޅުވެފައެވެ. މި ޚިދުމަތް ފެށުމަށް ތައްޔާރުވަމުން އަންނައިރު، ޚިދުމަތް ދިނުމަށް ޑްރައިވަރުން ނެގުމުގެ މަސައްކަތްވެސް އެމްޓީސީން ވަނީ ކޮށްފައެވެ. ޓެކްސީލައިންގެ ޚިދުމަތް ދިނުމަށްޓަކައި 407 ޑްރައިވަރުން ބޭނުންވެއެވެ. އޭގެ ތެރެއިން 122 ޑްރައިވަރުން ހޯދަނީ، ޕާޓްޓައިމްކޮށް މަސައްކަތް ކުރާ ގޮތަށެވެ. އަދި ބާކީ 285 ޑްރައިވަރުން ހޯދަނީ، ފުލްޓައިމްކޮށް މަސައްކަތް ކުރާ ގޮތަށެވެ.