އީރާނުން ދެމުންގެންދާ ހަމަލާތަކުން ގަތަރު، ކުވައިތު އަދި ޔުނައިޓެޑް އަރަބް އެމިރޭޓްސް – ޔޫއޭއީ ދިފާއުކުރަން ފަރަންސޭސިވިލާތުން މެޑިޓަރޭނިއަން ކަނޑަށް ހަނގުރާމައިގެ މަނަވަރުތަކާއި، ހަތިޔާރާއި ސިފައިން ފޮނުވަން ނިންމައިފިއެވެ.

މިކަން ހާމަކުރީ ފަރަންސޭސި ރައީސް އިމެނުއެލް މެކްރޮން، ހަނގުރާމައާ ގުޅޭގޮތުން ގައުމާ މުޚާތަބުކޮށް ދެއްކި ވާހަކައިގައެވެ.

ފަރަންސޭސި ރައީސް ބުނީ، ފަރަންސޭސި ކަނޑުގެ ސިފައިންގެ އެންމެ ބޮޑު މަނަވަރު “ޗާރލްސް” މެދުއިރުމައްޗަށް ދިއުމަށް އޭނާ މިހާރު އަމުރުކޮށްފައިވާ ކަމަށެވެ.

މީގެއިތުރުން، ބޮންއަޅާ ޖެޓުތަކާއި، އެންޓި-އެއަރ ސިސްޓަމްތަކާއި، އެއަރ ރާޑަރުތައް މިހާރު ސަރަހައްދުގައި ރުކުރުވާލަމުން ގެންދާ ކަމަށްވެސް ފަރަންސޭސި ރައީސް މެކްރޮން ބުނެފައި ވެއެވެ.

މެދުއިރުމަތީގެ ގައުމުތަކަށް ހަމަލާ ދިނުމަށް އީރާނުން ފޮނުވަމުންދާ ޑްރޯންއާއި، މިސައިލްތައް ވައްޓާލުމަށް ފަރަންސޭސިވިލާތުން ފޮނުވި އެއަރ ޑިފެންސް ސިސްޓަމްތައް ބޭނުން ކުރާނޭ ކަމަށްވެސް ފަރަންސޭސި ރައީސް ބުނެފައި ވެއެވެ.

އޭނާ ބުނީ، ގަތަރު، ކުވައިތު، ޔޫއޭއީގެ އިތުރުން، އުރުދުން އަދި އިރާގާއެކު ފަރަންސޭސިވިލާތުން ދިފާއީ އެއްބަސްވުންތަކެއް ހަދާފައިވާ ކަމަށާއި، އެ އެއްބަސްވުންތަކަށް ފަރަންސޭސިވިލާތުން އަމަލުކުރާނޭ ކަމަށެވެ. އެގައުމުތަކާއެކު ފަރަންސޭސިވިލާތް ދެމިއޮންނާނޭ ކަމަށެވެ.

ހަނގުރާމައިގެ ލަޝްކަރެއް މެދުއިރުމަތިން މެޑިޓަރޭނިއަން ކަނޑަށް ފޮނުވާކަން ފަރަންސޭސި ރައީސް މި އިއުލާންކުރީ، އެމެރިކާއާއި އިސްރާއީލާ ދެކޮޅަށް އީރާނުން ކުރަމުންދާ ހަނގުރާމައިގެ ތެރެއަށް ނުވަނުމަށް އީރާނުން ޔޫރަޕްގެ ގައުމުތަކަށް އިންޒާރު ދީފައި ވަނިކޮށެވެ.

އީރާނުގެ މިއިންޒާރުތައް އައިސްފައިވަނީ “ދިފާއީ ހަރަކާތެއްގެ ގޮތުން” އީރާނުގެ މިސައިލްތައް ވައްޓާލުމުގައި ބައިވެރިވުމަށް ފަރަންސޭސިވިލާތް، ޖަރުމަނުވިލާތް އަދި އިނގިރޭސިވިލާތުން ނިންމައި އެކަން ހާމަކުރުމާ ގުޅިގެންނެވެ.

ޔޫރަޕްގެ ބައެއް ގައުމުތަކުން ގެންދަނީ، އީރާނަށް ހަމަލާ ދިނުމަށް އެމެރިކާ ސިފައިންނަށް އެހީތެރިކަންވެސް ފޯރުކޮށްދެމުންނެވެ.

އެގޮތުން، އެގައުމުތަކުގެ އަސްކަރީ ބޭސްތައްވެސް ބޭނުން ކުރުމުގެ ހުއްދަ ދީފައި ވެއެވެ.

އެމެރިކާގެ ރައީސް ޑޮނަލްޑް ޓްރަމްޕްވަނީ، އީރާނަށް ހަމަލާ ދިނުމުގައި ޔޫރަޕްގެ ގައުމުތަކުން ވެދޭ އެހީތެރިކަމާއި، ކުރާ ތާއީދަށް ތައުރީފްވެސް ކޮށްފައެވެ.