ދިވެހި ފިލްމީ ދާއިރާގެ މަޝްހޫރު، އަޙްމަދު ނިމާލު މިއަދު ހެނދުނުގެ ވަގުތެއްގައި ނިޔާވެއްޖެއެވެ. އުމުރުން 62 އަހަރުގެ ނިމާލު ނިޔާވީ، ސްޓްރޯކެއް ޖެހިގެން އައި.ޖީ.އެމް.އެޗް ހޮސްޕިޓަލުގައި ފަރުވާދެމުން ދަނިކޮށެވެ.
ނިމާލަށް ސްޓްރޯކެއް ޖެހުނީ މިދިޔަ ޑިސެމްބަރު މަހުގެ 31 ވަނަ ދުވަހުގެ ރޭގައެވެ. އެންމެ ފުރަތަމަ އޭނާއަށް ފަރުވާ ދީފައިވަނީ އޭ.ޑީ.ކޭ ހޮސްޕިޓަލުގައެވެ. ނަމަވެސް ޖެހިގެން އައި ދުވަހު އޭނާ ވަނީ އައި.ޖީ.އެމް.އެޗަށް ބަދަލުކުރެވިފައެވެ. ނިޔާވިއިރު އޭނާ ގެންދިޔައީ އެ ހޮސްޕިޓަލުގައި ފަރުވާ ހޯދަމުންނެވެ.
އަޙްމަދު ނިމާލަކީ ދިވެހި ފިލްމީ ދާއިރާގައި ފާހަގަކޮށްލެވޭ ފަންނާނެކެވެ. އޭނާއަކީ ހަމައެކަނި މޮޅު އެކްޓަރެއް ނޫނެވެ. އޭނާއަކީ ކުޅަދާނަ ޑައިރެކްޓަރެއް، އެޑިޓަރެއް، ލިޔުންތެރިއެއް އަދި ޕްރޮޑިއުސަރެއްގެ ގޮތުގައިވެސް ދާއިރާއަށް ގިނަގުނަ ޚިދުމަތްތަކެއް ކޮށްދީފައިވާ ފަރާތެކެވެ. ނިމާލު ވަނީ ދިވެހި ސިނަމާއަށް ގިނަ ފިލްމުތަކެއް އުފައްދައިދީ، ގިނަ ބައެއްގެ މަގުބޫލުކަން ހޯދާފައެވެ.
ކިޔުންތެރިންގެ ހިޔާލު