އާންމުންގެ ކަންބޮޑުވުންތަކާ ގުޅިގެން ހުޅުމާލޭގެ މަގުތަކުގައި ހަރުކޮށްފައިވާ ސްޕީޑް ބްރޭކަރުތައް ނަގައިފިއެވެ.
މި ސްޕީޑް ބްރޭކަރުތަކުގެ ސަބަބުން އުނދަގޫތައް ކުރިމަތިވާކަމުގެ ޝަކުވާ އާއްމުންގެ އެތައް ބަޔަކު ދިޔައީ ކުރަމުންނެވެ. މިކަމާ ގުޅިގެން މީސްމީޑިއާގެ އެކި މަންސަތަކުގައި އަދި ތަފާތު އެކި ބައްދަލުވުންތަކުގައި ވެސް ރައްޔިތުންގެ ޝަކުވާތައް ވަނީ ހުށަހަޅާފައެވެ. އެގޮތުން އުސްކޮށް، ހަނިކޮށް ހަދާފައިވާ މި ބްރޭކަރުތަކުން މަޑުން ފޭބިއަސް ގައިގެ އެކި ތަންތަނަށް ތަދުވާ ކަމަށް ގިނަ ބަޔަކު ބުނެފައިވެއެވެ. އަދި ދާދި ފަހުން މާލޭގެ އަވަށްތަކުގެ ރައްޔިތުންނާ އެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭއްވެވި ބައްދަލުވުންތަކުގައި ވެސް މި ކަންބޮޑުވުން ފާޅުކޮށްފައިވެއެވެ.
މިދިޔަ ސެޕްޓެމްބަރު މަހު، ހުޅުމާލޭގެ 1 ވަނަ އަދި 2 ވަނަ ފިޔަވަހީގައި ހަރުކުރި ސްޕީޑްބްރޭކަރުތަކަކީ ދިވެހިރާއްޖޭގައި އެކްސިޑެންޓްތަކުގެ އަދަދު އިތުރުވުމާ، ކާރުބާރުބޮޑުވުމާއި ދުއްވާ ފަރާތްތަކުގެ ސްޕީޑް ދަށްކުރުމަށްޓަކައި ހައުސިންގް ޑެވެލޮޕްމަންޓް ކޯޕަރޭޝަން (އެޗްޑީސީ) އިން ކުރެއްވި މަސައްކަތެކެވެ. ތިރީހަށްވުރެން ގިނަ ބްރޭކަރުތައް ހަރުކޮށްފައިވާއިރު، މި ބްރޭކަރުތައް ހަރުކުރުމުގެ ބޭނުމަކީ މަގުތަކަކީ އެންމެންނަށް ރައްކާތެރި ތަނަކަށް ހެދުންކަމުގައި މައުލޫމާތު ދީފައިވެއެވެ.
ރައްޔިތުންގެ ސަލާމަތަށްޓަކައި އެޗްޑީސީން އަންނަނީ ގިނަ މަސައްކަތްތަކެއް ކުރަމުންނެވެ. އޭގެތެރޭގައި، ޓްރެފިކް ފްލޯއަށް ބަދަލުތައް ގެނައުން ހިމެނެއެވެ. އަދި މަގުތަކުގެ އެންމެ ބާރު ބޮޑު ހިސާބުތަކުގައި ރައުންޑަބައުޓު ހެދުމާއި ބައެއް މަގުތައް އެއް ކޮޅަށް ދުއްވޭ ގޮތަށް ބަދަލުކުރުން ވެސް ފާގަކޮށްލެވެއެވެ.
ކިޔުންތެރިންގެ ހިޔާލު