އައްޑޫ ހިތަދުއާއި ހުޅުމީދޫ ގުޅުވާލާ ބުރިޖުގެ ސާވޭއާއި ޑިޒައިން ހަދަން ޗައިނާ ކުންފުންޏަކާ މިއަދު ހަވާލުކޮށްފިއެވެ.

މި މަސައްކަތް ހަވާލުކުރީ، ޗައިނާގެ ޓީވައިލިން އިންޓަނޭޝަނަލް އިންޖިނިއަރިން ކޮންސަލްޓިން ކޮމްޕެނީއާއެވެ.

ކޮންސްޓްރަކްޝަން މިނިސްޓްރީގައި މިއަދު ބޭއްވި ރަސްމިއްޔާތެއްގައި އެ މިނިސްޓްރީގެ ފަރާތުން އެ އެއްބަސްވުމުގައި ސޮއިކުރެއްވީ މިނިސްޓަރު ޑރ. އަބްދުﷲ މުއްތަލިބެވެ. އަދި، ޗައިނާ ކުންފުނީގެ ފަރާތުން ސޮއިކުރެއްވީ، އެ ކުންފުނީގެ ޗައިނާ ބްރާންޗްގެ ރައީސް ޗެން ޝިއައޯހޫއެވެ.

ކޮންސްޓްރަކްޝަން މިނިސްޓްރީން ބުނީ، މި އެއްބަސްވުމުގެ ދަށުން ބުރިޖުގެ ސާވޭތައް ހެދުމާއި ޑިޒައިން ތައްޔާރުކުރުމާއި ފަންނީ ކަންކަމާއި ޓެންޑަރިންނަށް ބޭނުންވާ ލިޔުންތައް ތައްޔާރުކުރާނެ ކަމަށެވެ.

މި މަސައްކަތަށް ކޮންސަލްޓަންޓެއް ކަނޑައެޅީ ފިނޭންސް މިނިސްޓްރީގެ އުސޫލުތަކާ އެއްގޮތަށް ކަމަށް މުއްތަލިބު ވިދާޅުވިއެވެ. މި މަޝްރޫއު ކުރިއަށް ގެންދާނީ އެންމެ ފައިދާ ހުރި ގޮތަށް ކަމަށާއި މި މަޝްރޫއާ ގުޅުވައި ރައްޔިތުންނާ މަޝްވަރާކުރާނެ ކަމަށް މިނިސްޓަރު ވިދާޅުވިއެވެ.

މި މަސައްކަތް ހަވާލުކުރީ، 1،025،000 ޑޮލަރަށް، ހަ މަސް ތެރޭގައި ނިންމާގޮތަށެވެ.

އައްޑޫ ހުޅުމީދު އާއި ހިތަދުއާ ދެމެދު ބްރިޖެއް އެޅުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.