“މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޓަރީ ބިލު” ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ފާސްކޮށްފިއެވެ.
އެ ބިލް ފާސްކޮށްފައި ވަނީ ސަރުކާރުގެ ފަރާތުން އެ ބިލަށް ހުށަހެޅި އިސްލާހުތަކާއެކު އެވެ.
ބިލަށް އިސްލާހުތަކެއް ހުށަހަޅައި ކޮމިޓީން ބިލު ފާސްކުރަން ކޮމިޓީ ބައްދަލުވުން މިއަދު ފެށީ، މެންދުރު 11:15 ގައެވެ.
އެ ވަގުތުގައި 72 އިސްލާހެއް ބިލަށް ހުށަހެޅިއެވެ.
މި އިސްލާހުތައް ހުށަހެޅީ، ކޮމިޓީގެ ނާއިބު މުގައްރިރު ކެލާ ދާއިރާގެ މެންބަރު އަބްދުﷲ ޝަރީފެވެ.
އޭނާ ހުށަހެޅި އިސްލާހުތަކުގެ ތެެރެއިން ނޫސްވެރިން ފާހަގަކުރި ކަންބޮޑުވުންތައް ހިމެނެއެވެ.
އެ ކޮމިޝަނުގައި ރައީސުލްޖުމްހޫރިއްޔާގެ އެއްވެސް މެންބަރަކު ނުތިބޭގޮތަށް ވެސް ވަނީ އިސްލާހު ގެނެސްފައެވެ.
އެ މަސައްކަތް ހުރިހާ ނަމާދު ގަޑިތަކަކަށް މެދުކެނޑިއެވެ. ކޮމިޓީ ނިމުނީ ހަވީރު ގާތްގަނޑަކަށް 5:30 ގަ އެވެ.
އެ ބިލް ފާސްކުރަން ފެނޭތޯ ވޯޓަށް އެހި ގަޑީގައި ކޮމިޓީގައި ތިބި ނޫސްވެރިންނާއި އެމްޑީޕީގެ މަޖިލިސް މެންބަރުން ވަނީ މުޒާހަރާކޮށްފައެވެ.
ކޮމިޝަންގެ މެންބަރުންގެ ސިފަތަކުގެ ތެރެއަށް ސިޔާސީ ޕާޓީއެއްގެ މެންބަރަކަށްނުވުމާއި، ކޮމިއުނިކޭޝަނާއި މީޑިއާގެ ހިދުމަތްދޭ ދާއިރާގެ ވިޔަފާރީގެ ހިއްސާއެއް އޮތް ފަރާތަކަށް ނުވުންވެސް ވަނީ ހިމަނައިފައެވެ.
މީޑިއާތަކުން ކޮމިޝަނަށް މެންބަރުން އިންތިހާބުކުރަން އޮތް ގޮތްވެސް ވަނީ އިސްލާހުކޮށްފައެވެ.
އެގޮތުން މި އިންތިހާބުގައި ވޯޓުލެވޭނީ ފަސް އަހަރުވެފައިވާ ބްރޯޑްކާސްޓަރުންނާއި މީޑިއާތަކާއި އެތަންތަނުގައި މަސައްކަތްކުރާ ނޫސްވެރިންކަމަށް އޮތްތަން ބަދަލުކޮށް، އިންތިހާބުގައި ލެވޭނީ ތިން އަހަރު ވެފައިވާ، ރަޖިސްޓްރީ ކޮށްފައިވާ ބްރޯޑްކާސްޓަރުންނާއި މީޑިއާތަކަށް އެއްވޯޓު ކަމަށް ވަނީ ކަނޑައަޅައިފައެވެ.
ކިޔުންތެރިންގެ ހިޔާލު