ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބާއްވާ އެޓޯލް ޗެމްޕިއަންޝިޕް ފުޓުބޯޅަ މުބާރާތުގައި ބައިވެރިވުމުގެ ފުރުސަތު އިތުރުކޮށްފިއެވެ.

އެ މުބާރާތަކީ އެފްއޭއެމްއިން އަލަށް އެކުލަވާލި ރާއްޖޭގެ ފުޓުބޯޅަ ލީގުގެ އޮނިގަނޑުގެ ދަށުން ރާއްޖޭގެ ތިން ރީޖަނެއްގައި މިއަހަރު ފަށާ މުބާރާތެކެވެ.

އެފްއޭއެމްއިން އެޓޯލް ޗެމްޕިއަންޝިޕްގައި ބައިވެރިވުމަށް ފުރަތަމަ ފުރުސަތު ހުޅުވާލީ މިދިޔަ މަހުގެ ފަހުކޮޅުގައެވެ. އެފަހަރު ފުރުސަތު ހުޅުވާލީ މިމަހުގެ އެއްވަނަ ދުވަހުގެ ނިޔަލަށެވެ.

އެ މުބާރާތުގައި ބައިވެރުވުމަށް ފުރުސަތު ހުޅުވާލީ ރަށްރަށުގެ ކައުންސިލުން ބައިވެރިކުރާ ޓީމެއް ނުވަތަ ރަށްރަށުގެ ކައުންސިލުން އެންޑޯސްކުރާ ޓީމުތަކަށް އެކަންޏެވެ.

އެފްއޭއެމްއިން މިއަދު ނެރުނު އިއުލާނުގައި ބުނީ އެފަހަރުގެ ފުރުސަތުގައި ގިނަ ޓީމުތަކަކުން ބައިވެރިވެފައިވީ ނަމަވެސް، ކައުންސިލާއި ކައުންސިލުން އެންޑޯސް ކޮށްފައިވާ ކްލަބުތަކުން ބައިވެރިވި ބައެއް ރަށްރަށުގެ ކްލަބުތަކުން އިތުރު ފުރުސަތަކަށް އެދެމުންދާ ކަމަށެވެ.

އެހެންކަމުން އެފްއޭއެމްއިން ވަނީ މުބާރާތުގައި ބައިވެރިވުމުގެ ފުރުސަތު، މިމަހުގެ 11 ގެ ނިޔަލަށް އިތުރުކޮށް، ކައުންސިލުން އެންޑޯސް ނުކުރާ ކްލަބުތަކަށްވެސް ބައިވެރިވުމުގެ ފުރުސަތު ހުޅުވާލައިފައެވެ. އެގޮތަށް އެއް ރަށަކުން ދެ ޓީމު ބައިވެރިވާ ނަމަ، ތިންވަނަ ޑިވިޝަނަށް ފުރުސަތު ދޭނީ ގުރު ނަގައިގެން ކަމަށްވެސް އެފްއޭއެމްއިން ބުންޏެވެ.

އެފްއޭއެމްއިން ނެރުނު އިއުލާނުގައި ބުނީ އިއުލާނުގައިވާ ފޯމު ކަނޑައެޅިފައިވާ މެއިލްއަށް މުއްދަތުގެ ކުރިން މެއިލް ކުރުމުން މުބާރާތުގައި ބައިވެރިވެވޭނެ ކަމަށެވެ.

އެޓޯލް ޗެމްޕިއަންޝިޕް ފުޓުބޯޅަ މުބާރާތުގައި ބައިވެރިވުމަށް: https://gazette.gov.mv/iulaan/358548