ރައީސް ޑރ. މުހައްމަދު މުއިއްޒު ހުރިހާ ކައުންސިލުތަކާ ބައްދަލުކުރައްވައިފިއެވެ.
ނ. އަތޮޅުގެ ރަށްތަކަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން ވެލިދުއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް މިރޭ ވިދާޅުވީ މީގެ ކުރިން ކުރެއްވި ދަތުރުފުޅުގައި ހުރިހާ ރަށަކަށް ވަަޑައިގެންނެވެން ނެތުމުން އެންމެ ކައިރީގައިވާ ރަށަކަށް ވަޑައިގެން ބައްދަލުކުރެއްވުމަށް ކައުންސިލުތަކަށް ދައުވަތު ދެއްވާފައިވާނެ ކަމަށެވެ.
އެގޮތުން ގާތްގަނޑަކަށް ހުރިހާ ރަށެއްގެ ކައުންސިލުތަކާ އޭރު ބައްދަލުކޮށް ނިންމުނު ކަމަށާއި ބައްދަލުނުކުރެވި އޮތީ ވެލިދޫ ކައުންސިލާއި އެހެން ރަށެއްގެ ކައުންސިލާ އެކަނި ކަމަށެވެ. އަދި އޭރުގައި ކައުންސިލުގެ ނިންމުމަކަށްވީ އެ މަނިކުފާނު ވަލިދުއަށް ވަޑައިނުގަންނަވާ ނަމަ، ބައްދަލުކުރަން ނުދިއުމަށް ކަމަށް ރައީސް ވިދާޅުވިއެވެ.
ރައީސް ވިދާޅުވީ އެއީ އެ މަނިކުފާނު ވަރަށް ހިތާމަކުރެއްވި ނަމަވެސް، އެއީ ކައުންސިލުގެ ނިންމުމަކަށް ވުމުން، އެ ނިންމުމަށް އިހުތިރާމުކުރައްވާފައިވާނެ ކަމަށާއި އަދި މިއަދު ވެލިދޫ ކައުންސިލާ ވެސް ބައްދަލުކުރެވިފައިވާ ކަމަށެވެ.
ރާއްޖޭގެ ހުރިހާ ކައުންސިލަކާ ބައްދަލުކުރުމާއި ހުރިހާ ރަށަކަށް ވަޑައިގެންނެވުމަކީ ރައީސްގެ ވައުދުފުޅެކެވެ.
ކިޔުންތެރިންގެ ހިޔާލު