އަސްކޮއި ހައްޖު އުމްރާ މޯލްޑިވްސްގެ ވެރިން އުމްރާއަށް ގެންދިއުމަށް ފައިސާ އަތުލުމަށްފަހު ރާއްޖެ ދޫކޮށް ފިލި މައްސަލައެއް އިސްލާމިކް މިނިސްޓްރީން ބަލަން ފަށައިފިއެވެ.

ސޯޝަލް މީޑިއާގައި ބައެއް މީހުން ކަންބޮޑުވުން ފާޅުކޮށް ބުނެފައިވަނީ، އަސްކޮއި ހައްޖު އުމްރާ މޯލްޑިވްސްގެ ވެރިން، ގިނަ ބައެއްގެ އަތުން އުމްރާއަށް ގެންދިއުމަށް ފައިސާ ނެގުމަށްފަހު، އެންމެފަހު ވަގުތު ނުދެވޭނެ ކަމަށް އަންގާފައިވާ ކަމަށެވެ. އަދި އެ ކުންފުނީގެ ވެރިން ޕާސްޕޯޓާއި ފައިސާއާއެކު ރާއްޖެ ދޫކޮށް ގޮސްފައިވާ ކަމަށް ވެސް ބުނެފައިވެއެވެ.

ބައެއް މީޑިއާތަކަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އެ މައްސަލަ މިނިސްޓްރީގެ ސަމާލުކަމަށް އައުމާ ގުޅިގެން، އެކަން ބަލަމުން އަންނަ ކަމަށެވެ.

މީގެ ކުރިން ވެސް އުމްރާއަށް ގެންދިއުމަށް މީހުން އަތުން ފައިސާ އަތުލުމަށްފަހު، އުމްރާއަށް ނުގެންދާ މައްސަލަތަކެއް ވަނީ ކުރިމަތިވެފައެވެ. މިނިސްޓްރީން އަންނަނީ އެފަދަ މައްސަލަތައް ބަލައި، ފިޔަވަޅު އަޅަމުންނެވެ. އެގޮތުން މީގެ ކުރިން ބައެއް ކުންފުނިތައް ވަނީ ޖޫރިމަނާކޮށް، އުމްރާއަށް މީހުން ގެންދިއުމުގެ ލައިސަންސް ވެސް ހިފަހައްޓައިފައެވެ.