ރާއްޖޭގައި އޯގަން ޓްރާންސްޕްލާންޓް ނުވަތަ ގުނަވަން ބަދަލުކުރުމުގެ ކަންކަން ކުރިއަށް ގެންދިޔުމުގެ ގޮތުން ހަދަންޖެހޭ ގާނޫނު މިހާރު ޑްރާފްޓުކޮށް ނިމިފައިވާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.
“އެސްއެސްޓީވީ” އިން ގެނެސްދޭ “ބާރު ހަތަރެއް” ޕްރޮގްރާމުގައި ވާހަކަދައްކަވަމުން ނާޒިމް ރޭ ވިދާޅުވީ އެ ޑްރާފްޓު ގާނޫނު، ސަރުކާރުގެ ފަރާތުން ރައްޔިތުންގެ މަޖިލީހަށް ފޮނުވައި، މަޖިލީހުން އެ ގާނޫނު ފާސްކުރުމުން، ރާއްޖޭގައި އޯގަން ޓްރާންސްޕްލާންޓުގެ ހިދުމަތް ފެށޭނެ ކަމަށެވެ.
“ދުނިޔޭގެ އެކްސްޕާޓުންނާއި ދިވެހިރާއްޖޭގެ ހެލްތު ޕްރޮފެޝަނަލްސްގެ ލަފަޔާއި އިރުޝާދުގެ ދަށުން އެ ގާނޫނު މިހާރު އެކުލަވާލެވި ފުރަތަމަ ޑްރާފްޓް ތައްޔާރު ކުރެވި، ދެން އަދި އިތުރަށް މަޝްވަރާ ކުރަން ޖެހޭ ފަރާތްތަކާ އަޅުގަނޑުމެން މިދަނީ މަޝްވަރާ ކުރަމުން. މަޝްވަރާތައް ނިމުމާއެކު އަޅުގަނޑުމެން ރައްޔިތުންގެ މަޖިލީހަށް އެ ގާނޫނު ފޮނުވާނަން،” ނާޒިމް ވިދާޅުވިއެވެ.
Advertisement
ނަމަވެސް އެ ޑްރާފްޓު ގާނޫނު މަޖިލީހަށް ފޮނުވޭނެ ދުވަހެއް ނާޒިމް ވިދާޅެއް ނުވެއެވެ.
ނާޒިމް ވިދާޅުވީ އޯގަން ޓްރާންސްޕްލާންޓުގެ ހިދުމަތް ދިނުމުގެ ގޮތުން ހޮސްޕިޓަލްތަކުގެ ސިއްހީ ހިދުމަތުގެ ފެންވަރު މަތިކޮށް އޮޕަރޭޝަން ތިއޭޓަރުތައް ތަރައްގީކުރުމުގެ މަސައްކަތް ސަރުކާރުން ކުރަމުންދާ ކަމަށެވެ.
ކިޔުންތެރިންގެ ހިޔާލު