އަންހެނުންގެ ތަރައްގީއަށް މަސައްކަތްކުރާ ކޮމިޓީ، ޑަބްލިޔުޑީސީގެ ރައީސާ ރައްޔިތުން އިންތިހާބުކުރާގޮތަށް ގާނޫނަށް އިސްލާހު ހުށަހަޅުއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އޮފީހުން ގެނެސްދޭ ސިލްސިލާ ޕޮޑްކާސްޓް “ރައްޔިތުންނާއެކު”ގެ މިއަދުގެ އެޕިސޯޑުގައި ރައީސް ވިދާޅުވީ އަތޮޅު ކައުންސިލުތައް އުވާލައި، ލާމަރުކަޒީ ގާނޫނަށް އިސްލާހުތަކެއް ހުށަހަޅުއްވާނެ ކަމަށެވެ.
އެގޮތުން އެ ގާނޫނަށް ގެންނަ އިތުރު އިސްލާހުތަކުގެ ތެރޭގައި ރަށު ކައުންސިލުތަކުގެ ކައުންސިލަރުންގެ އަދަދަށް ބަދަލު ގެނައުމަށް ހަމަޖެހިފައިވާ ކަމަށާއި ނަމަވެސް ސިޓީ ކައުންސިލުތަކުގެ ކައުންސިލަރުންގެ އަދަދަށް ބަދަލެއް ނުގެންނަވާނެ ކަމަށެވެ. ސިޓީ ކައުންސިލުތަކުގައި ތިބޭނީ ކައުންސިލަރުންގެ އަދަދު އިތުރު ނުވާ ގޮތަށް މިހާރު ވެސް ތިބޭ އަދަދަށް ކަމަށް ރައީސް ވިދާޅުވިއެވެ.
ރައީސް ވަނީ އިތުރު ގާނޫނުތަކަށް ގެންނަން ނިންމަވާފައިވާ އިސްލާހުތަކާ ގުޅޭގޮތުން ވެސް ވާހަކަފުޅުދައްކަވައިފައެވެ. އެގޮތުން ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށް ބޭއްވުމަށް ގެންނަ އިސްލާހާއި، ރައްޔިތުންގެ މަޖިލީހުގެ މެންބަރުންގެ އަދަދު އިތުރުނުވާ ގޮތަށް ގެންނަ އިސްލާހު އަދި އިންތިހާބީ މަގާމުތަކުގައި ތިއްބަވާ ބޭފުޅުން މަގާމުން ދުރުކުރުމުގެ ބާރު ސީދާ ރައްޔިތުންނަށް ދޭ ގޮތަށް ގެންނަ އިސްލާހު ހިމެނެއެވެ.
އިންތިހާބީ މަގާމުތަކުގައި ތިއްބަވާ ބޭފުޅުން މަގާމުން ދުރުކުރުމުގެ ބާރު ސީދާ ރައްޔިތުންނަށް ދޭ ގޮތަށް ގެންނަ އިސްލާހާ ގުޅޭގޮތުން ވާހަކަފުޅުދައްކަވަމުން ރައީސް ވިދާޅުވީ ރައްޔިތުން ހަގީގީ މާނައިގައި ބާރުވެރިކުރެވޭނީ އެ އިސްލާހު ގެނެސްގެން ކަމަށެވެ.
ކިޔުންތެރިންގެ ހިޔާލު