އައިޖީއެމްއެޗުގެ އެންއައިސީޔޫއިން ފެނުނު ނުރައްކާތެރި ބެކްޓީރިއާ، މަލްޓި ޑްރަގް ރެސިސްޓެންޓް އޯގަނިޒަމްސް (އެމްޑީއާރު) އަށް ޕޮޒިޓިވް ފަސް ކުއްޖަކަށް މިވަގުތު ފަރުވާދެމުން އަންނަ ކަމަށާއި އޭގެ ތެރެއިން އިތުރު ފަރުވާއަށް ބޭނުންވާ ކުދިން ރާއްޖެއިން ބޭރަށް ފޮނުވާނެ ކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗުން ނެރުނު ބަޔާނެއްގައި ބުނީ 28 ހަފުތާއަށްވުރެ ކުރިން އުފަންވެ، އެންއައިސީޔޫގައި އެޑްމިޓްކުރެވި ފަރުވާދެމުންދިޔަ ކުއްޖެއްގެ ހަށިގަނޑުން ނެގުނު ސާމްޕަލަކުން، މިދިޔަ މާޗް މަހުގެ 27 ގައި އެމްޑީއާރުއޯ “ބާކޯލްޑޭރިއާ ސެޕޭޝިއާ” ފެނިފައިވާ ކަމަށެވެ. އެއާއެކު ވަގުތުން ކުއްޖާ އައިސޮލޭޓްކުރެވި، އެ ޖަރާސީމު އިތުރަށް ފެތުރުން ހުއްޓުވުމަށް، އެންވައިރަމަންޓަލް ސާމްޕަލް ނަގައި އިންފެކްޝަން ކޮންޓްރޯލުކުރުމުގެ އައިޕީސީ ފިޔަވަޅުތައް އެޅުނު ކަމަށް އައިޖީއެމްއެޗުން ބުންޏެވެ.
އެ ކޭސް ކުރިމަތިވުމަށްފަހު، އިތުރަށް ނެގުނު ސާމްޕަލްތަކުން އެންއައިސީޔޫގައި އެޑްމިޓްކުރެވިފައި ތިބި އިތުރު ހަތަރު ކުދިން، ދުވަސްނުފުރާ ވިހާފައިވާ ތިން ކުދިންނާއި ދުވަސްފުރާ ވިހާފައިވާ އެއް ކުއްޖެއްގެ ހަޑިގަނޑުން އެމްޑީއާރު ފެނިފައިވާ ކަމަށާއި އެ ހުރިހާ ކުދިންނަކީ ވެސް ވެންޓިލޭޓަރުގައި ފަރުވާދެމުންދިޔަ ކުދިން ކަމަށް އައިޖީއެމްއެޗުން ބުންޏެވެ.
އައިޖީއެމްއެޗުން ބުނީ ޖަރާސީމު އިތުރަށް ފެތުރުން ހުއްޓުވުމުގެ ގޮތުން އެ ހުރިހާ ކުދިން އައިސޮލޭޓްކޮށް އިންފެކްޝަން ކޮންޓްރޯލުކުރުމުގެ ފިޔަވަޅުތަކާއެކު ގާތުން ބަލަމުންދާ ކަމަށާއި އަދި އެންޓިބަޔޮޓިކް ފަރުވާ ދެވުނީ އެންޓިމައިކްރޯބިއަލް ސަސެޕްޓިބިލިޓީ ނަތީޖާތަކާއި ކޮންމެ ކުއްޖެއްގެ ކްލިނިކަލް ހާލަތަށް ބަލައިގެން ކަމަށެވެ. އެއާއެކު، އެންއައިސީޔޫގެ މާހައުލުގައި ހުރެދާނެ ކޮންޓަމިނޭޝަންގެ ސަބަބުތައް ދެނެގަތުމަށް ފުޅާދާއިރާއެއްގައި ޓެސްޓުތައް ހެދުނު ކަމަށް އެ ހޮސްޕިޓަލުން ބުންޏެވެ.
އަވަސްކަމާއެކު ވިލަރެސްކުރެވިގެން އެޅުނު ފިޔަވަޅުތަކުގެ ސަބަބުން އެ އިންފެކްޝަން އިތުރަށް ފެތުރުން ހުއްޓުވުނު ކަމަށާއި މިދިޔަ މަހުގެ 15 ގެ ފަހުން އިތުރު ކޭސްއެއް ރިޕޯޓުކުރެވިފައި ނުވާ ކަމަށް ވެސް އެ ހޮސްޕިޓަލުން ބުންޏެވެ.
“27 މާޗް 2025 އިން ފެށިގެން ޖުމުލަ 84 ނިއޯނޭޓަލް ކުދިންނަށް އެންއައިސީޔޫގައި ފަރުވާދެވި، މިވަގުތު އެންއައިސީޔޫގައި ދިހަ ކުދިންނަށް ފަރުވާދެވެމުންދެއެވެ. މީގެ ތެރޭގައި މި ޖަރާސީމަށް ފައްސިވެފައިވާ ފަސް ކުދިން ހިމެނެއެވެ. އަދި މި ފަސް ކުދިންގެ ފަރުވާގެ ކަންްކަން ކުރިއަށްދަނީ ރައްކާތެރިކަމުގެ ފިޔަވަޅުތަކާއެކު އައިސޮލޭޓްކުރެވިގެންނެވެ..،” އައިޖީއެމްއެޗުން ބުންޏެވެ.
އައިޖީއެމްއެޗުން ބުނީ އެ ޖަރާސީމަށް ޕޮޒިޓިވްވެފައިވާ ފަސް ކުދިންގެ ތެރެއިން އިތުރު ފަރުވާއަށް ބޭނުންވާ ކުދިން، ރާއްޖެއިން ބޭރަށް ފޮނުވުމުގެ އިންތިޒާމުތައް ހަމަޖެއްސުމުގެ ކަންކަން ކުރިއަށްދާނެ ކަމަށެވެ.
ކިޔުންތެރިންގެ ހިޔާލު