ޤައުމީ އެއަރލައިން މޯލްޑިވިއަންއިން މިއަހަރުގެ ތެރޭގައި ސައުތު އެފްރިކާ އަދި ޖަރުމަނުވިލާތަށް ދަތުރުތައް ފެށުމުގެ ތައްޔާރީތައް ދަނީ ކުރަމުންނެވެ. މިއީ މޯލްޑިވިއަންގެ ޚިދުމަތް ފުޅާކޮށް، ބައިނަލްއަޤްވާމީ ގިނަ މަންޒިލްތަކަށް ދަތުރުތައް ފެށުމުގެ ސަރުކާރުގެ އަމާޒުގެ ތެރެއިން ކުރެވޭ މަސައްކަތެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދާ އެއްގޮތަށް، ޤައުމީ އެއަރލައިނަށް ވައިޑް-ބޮޑީ އެއަރކްރާފްޓެއް ގެނެވުނީ މިއަހަރުގެ ޖަނަވަރީ މަހުގެ 6 ވަނަ ދުވަހުއެވެ. މި މަތިންދާބޯޓަކީ 264 މީހުންގެ ޖާގައިގެ އެއަރބަސް އޭ330-200 ވޭރިއަންޓްގެ މަތިންދާބޯޓެކެވެ.
މިހާރު މޯލްޑިވިއަންގެ ވައިޑް-ބޮޑީ މަތިންދާބޯޓުގެ ދަތުރުތައް ދަނީ ޗައިނާގެ ތިން މަންޒިލަކަށް ކުރަމުންނެވެ. އެއީ ބެއިޖިންގ، ޝަންގހާއި އަދި ޗެންގދޫއެވެ. އެއަރލައިނުން މަސައްކަތް ކުރަމުންދަނީ މިއަހަރުގެ ތެރޭގައި އިތުރު ބޯޓެއް ގެނައުމަށާއި، ޔޫރަޕްގެ އިތުރު މަންޒިލްތަކަށް ދަތުރުތައް ފުޅާކުރުމަށެވެ.
ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވެފައިވަނީ، މި އައު ދަތުރުތަކުގެ ސަބަބުން ސައުތު އެފްރިކާ އަދި ޖަރުމަނުވިލާތުން އަންނަ ފަތުރުވެރިންގެ އަދަދަށް ބޮޑު ކުރިއެރުމެއް ލިބޭނެ ކަމަށެވެ. އަދި މިއީ ދުރު މަންޒިލްތަކުން ރާއްޖެއަށް އަންނަން ބޭނުންވާ ފަތުރުވެރިންނަށް ވަގުތު ސަލާމަތްވާނެ ކަމެއްގެ ގޮތުގައި ވަޒީރު ސިފަކުރައްވާފައިވެއެވެ.
A flight between Male and Johannesburg would considerably develop Maldivian tourism! South Africa is a key market; a direct route would cut travel time from 24 hours to just 8 for travellers. It's time to unlock new opportunities—@MaldivianAero could lead the way! pic.twitter.com/09mJhVXfdF
— Mohamed Ameen (@ameen3d) March 12, 2025
ރައީސުލްޖުމްހޫރިއްޔާ ވިދާޅުވެފައިވަނީ މިއަހަރުގެ އޮކްޓޯބަރު މަހުގެ ތެރޭގައި އިތުރު ވައިޑް-ބޮޑީ އެއަރކްރާފްޓެއް ރާއްޖެ ގެންނާނެ ކަމަށެވެ. މޯލްޑިވިއަނުން ވަނީ މިހާރު ޗައިނާގެ ތިން މަންޒިލަށް ކުރަމުންދާ ދަތުރުތަކަށް އޮތް ޑިމާންޑް ވަރަށް ބޮޑުކަމަށް ފާހަގަކޮށްފައެވެ.
މޯލްޑިވިއަންގެ ދަތުރުތައް ބައިނަލްއަޤްވާމީ އިތުރު މަންޒިލްތަކަށް ފެށުމަކީ ރާއްޖޭގެ ފަތުރުވެރިކަމަށް ބޮޑު ކުރިއެރުމެއް ލިބިގެންދާނެ ކަމެއް ކަމަށް ބެލެވެއެވެ. މިއަހަރުގެ މިހާތަނަށް ރާއްޖެއަށް 500,000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
ކިޔުންތެރިންގެ ހިޔާލު