ޔޫރަޕިއަން އޭވިއޭޝަން ސޭފްޓީ އޭޖެންސީ (އިއާސާ) ޕާޓް-145 ސެޓްފިކެޓް އައިލެންޑް އެވިއޭޝަނަށް ލިބުމާ ގުޅިގެން ޔޫރަޕުގައި ރަޖިސްޓަރީކޮށްފައިވާ މަތިންދާބޯޓުތައް މަރާމާތުކުރުމުގެ ހުއްދަ ދިވެހިރާއްޖޭގެ ޤައުމީ އެއަރލައިން ކަމުގައިވާ އައިލެންޑް އެވިއޭޝަނަށް ލިބިއްޖެއެވެ. މިއީ ޔޫރަޕިއަން އޭވިއޭޝަން ސޭފްޓީ އޭޖެންސީ (އިއާސާ) އިން ދޫކުރާ ޕާޓް-145 ސެޓްފިކެޓް ކަމަށްވާއިރު، މި ސެޓްފިކެޓް ހާސިލުކުރި ރާއްޖޭގެ ފުރަތަމަ އެއަރލައިނަކީ އައިލެންޑް އެވިއޭޝަނެވެ.
މި ސެޓްފިކެޓް ލިބުމުގެ ސަބަބުން، ވެލާނާ އިންޓަރނޭޝަނަލް އެއަރޕޯޓަށް ޖައްސާ އިތުރު އެއަރލައިންތަކަށް އައިލެންޑް އެވިއޭޝަންގެ ފަރާތުން ޚިދުމަތް ފޯރުކޮށްދިނުމުގެ ފުރުޞަތު ތަނަވަސްވެގެންދާނެއެވެ. މިކަމަކީ ރާއްޖޭގެ އޭވިއޭޝަން ދާއިރާއަށް ލިބިގެންދިޔަ ފާހަގަކޮށްލެވޭ ކުރިއެރުމެއްގެ ގޮތުގައި ބެލެވެއެވެ.
ދަތުރުފަތުރާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން މި ކާމިޔާބީއަށް މަރުޙަބާ ކިޔުއްވައި، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޤައުމީ އެއަރލައިން ޒަމާނީކޮށް ބާރުވެރިކުރުމަށް ގެންގުޅުއްވާ ސިޔާސަތުގެ ނަތީޖާއެއް ކަމުގައި ފާހަގަކުރައްވާފައިވެއެވެ.
މި ސެޓްފިކެޓް ލިބުމާ ގުޅިގެން، އައިލެންޑް އެވިއޭޝަންގެ އިންޖިނިއަރުންނަށް ޔޫރަޕުގައި ރަޖިސްޓަރީކޮށްފައިވާ މަތިންދާބޯޓުތަކަށް ޚިދުމަތް ދިނުމުގެ ފުރުޞަތު ލިބި، އެއަރލައިންތަކަށް ފެންވަރު ރަނގަޅު ޚިދުމަތްތަކެއް ފޯރުކޮށްދެވޭނެއެވެ. އަދި މިއީ ޤައުމީ އެއަރލައިންގައި މަސައްކަތްކުރާ ފަރާތްތަކަށާއި، މި ދާއިރާއިން ކުރިއަށްދާން ބޭނުންވާ ފަރާތްތަކަށް ލިބިގެންދިޔަ މުހިންމު ފުރުޞަތެއް ކަމުގައިވެސް ބެލެވެއެވެ.
ކިޔުންތެރިންގެ ހިޔާލު