ޓެސްޓު ފްލައިޓުގެ ގޮތުގައި މުލީ އެއަރޕޯޓަށް ޖައްސާލާފައިވަނީ ޤައުމީ އެއަރލައިން، މޯލްޑިވިއަންގެ ޑޭޝް-8 މަރުކާގެ މަތިންދާބޯޓެކެވެ. މި ޓެސްޓު ދަތުރަކީ ވިޔަފާރީގެ އުޞޫލުން ދަތުރުތައް ފެށުމުގެ ކުރިން، އެކަމަށް ބޭނުންވާ އެސެސްމަންޓްތައް ހެދުމަށް ކުރެވޭ ދަތުރެކެވެ. ރީޖަނަލް އެއަރޕޯޓްސް ކުންފުނިން މަޢުލޫމާތު ދެއްވާފައިވާ ގޮތުގައި، އެސެސްމަންޓްތައް ނިންމައި، ވީހާވެސް އަވަހަކަށް ވިޔަފާރީގެ އުޞޫލުން ދަތުރުތައް ފެށުމަށް މަސައްކަތްކުރަމުންދެއެވެ.
މުލީ އެއަރޕޯޓުގެ މަޝްރޫޢުގެ ދަށުން 1500 މީޓަރުގެ ރަންވޭއެއް ތަރައްޤީކޮށްފައިވާއިރު، މިއީ އެންމެ ޒަމާނީ ވަސީލަތްތަކާއެކު ތަރައްޤީކޮށްފައިވާ ޑޮމެސްޓިކް އެއަރޕޯޓެކެވެ. މި މަޝްރޫޢު ކުރިއަށް ގެންގޮސްފައިވަނީ އެމްޓީސީސީއާ ހަވާލުކޮށްގެންނެވެ.
މުލަކަތޮޅުގެ ވެރިކަން ކުރާ ރަށް މުލީގައި ވައިގެ ދަތުރުފަތުރުގެ ޚިދުމަތް ޤާއިމުވުމާ ގުޅިގެން އެ ރަށުގެ ރައްޔިތުން ވަނީ އުފާވެރިކަމުގެ ޝުޢޫރުތައް ފާޅުކޮށްފައެވެ. އަދި ފުރަތަމަ ފްލައިޓަށް މަރުޙަބާ ކިޔުމުގެ ގޮތުން ރައްޔިތުން ވަނީ ފަރިވަޅެއްވެސް އަރުވާފައެވެ.
މުލީ އެއަރޕޯޓް ތަރައްޤީކުރުމުގެ މަޝްރޫޢުއަށް ސަރުކާރުން 300 މިލިއަން ރުފިޔާއަށްވުރެ ގިނަ ފައިސާ ހޭދަކޮށްފައިވާކަން ފާހަގަކޮށްލެވެއެވެ.
ކިޔުންތެރިންގެ ހިޔާލު