ފެނަކަ ކޯޕަރޭޝަންގެ މެނޭޖިން ޑިރެކްޓަރުކަމުގެ މަގާމުން ވަކިކުރެއްވި މުހައްމަދު އަފީފް ހުސައިން، މިނިސްޓްރީ އޮފް އެންވާރަމެންޓް، ކްލައިމެޓް ޗޭންޖް އެންޑް ޓެކްނޯލޮޖީގެ ސްޓޭޓް މިނިސްޓަރުގެ މަގާމަށް 14 އޮކްޓޫބަރު 2026 ގައި އައްޔަންކުރައްވައިފިއެވެ.

އެންވާރަމެންޓް މިނިސްޓްރީގެ ސްޓޭޓް މިނިސްޓަރުގެ މަގާމަށް އައްޔަންކުރެއްވިކަން އަފީފް ވަނީ ނޫސްވެރިންނަށް ކަށަވަރުކޮށްދެއްވާފައެވެ. އޭނާ ވިދާޅުވި ގޮތުގައި އެ މަގާމަށް އޭނާ އައްޔަންކުރެއްވީ އިއްޔެގެ ވަގުތެއްގައެވެ.

އަފީފަކީ މި ސަރުކާރުގެ ދައުރުގައި ފެނަކަ ކޯޕަރޭޝަން ހިންގެވުމާ ހަވާލުވެވަޑައިގެންނެވި ތިންވަނަ މެނޭޖިން ޑިރެކްޓަރެވެ. ފެނަކައިގެ އެމްޑީކަމާ ހަވާލުވެވަޑައިގަތުމުގެ ކުރިން އޭނާ ހުންނެވީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ޗެއާމަންގެ މަގާމުގައެވެ.

އިޝްތިހާރު އިޝްތިހާރު

އަފީފް ފެނަކައިގެ އެމްޑީކަމުން ވަކިކުރެއްވީ އެ ކުންފުނި އުވާލައި، އެ ކުންފުނިން ދެމުންދިޔަ ހިދުމަތްތައް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) ގެ ދަށަށް ބަދަލުކުރުމުގެ މަސައްކަތްތައް ކުރިއަށްދާ ދަނޑިވަޅެއްގައެވެ. ފެނަކައިގެ ހިދުމަތްތައް ސްޓެލްކޯގެ ދަށަށް ބަދަލުކުރުމުގެ މަސައްކަތްތައް އަދި މުޅިން ނިމިފައެއް ނުވެއެވެ.

އަފީފްގެ ކުރިން ފެނަކައިގެ މެނޭޖިން ޑިރެކްޓަރުގެ މަގާމުގައި ހުންނެވީ މުހައްމަދު ނަޖާހެވެ. އޭނާ އެ މަގާމުން ވަކިކުރެއްވީ މިއަހަރު ބޭއްވި އިންތިހާބުތަކަށްފަހު ސަރުކާރުގެ ހިންގުމުގެ އޮނިގަނޑަށް ގެނެވުނު ބަދަލުތަކުގެ ތެރެއިންނެވެ.

ޝަރީއާގެ ދާއިރާއިން މާސްޓާސް ޑިގްރީ ހާސިލުކުރައްވާފައިވާ އަފީފަކީ ދައުލަތުގެ ތަފާތު މަގާމުތަކުގައި 40 އަހަރަށްވުރެ ދިގު މުއްދަތެއްގައި ހިދުމަތް ކުރައްވާފައިވާ ބޭފުޅެކެވެ.