މާލޭގައި ފުޅާދާއިރާއެއްގައި ބަނގުރަލުގެ ވިޔަފާރިކުރަމުންދިޔަ ނެޓްވޯކަކާ ދެކޮޅަށް ހ. މާދޫގޭގައި ފުލުހުން ހިންގި ހާއްސަ އޮޕަރޭޝަނުގައި ހައްޔަރުކުރި ތިން މީހުންގެ ބަންދުގެ މުއްދަތު ކްރިމިނަލް ކޯޓުން އިތުރުކޮށްދީފިއެވެ.
މި މައްސަލައާ ގުޅިގެން ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ ތިން ފިރިހެނުންނެވެ. އެއީ:
- އަލް އަމީން (34 އަހަރު)
- ޕޮލިން (43 އަހަރު)
- އެމްޑީ ރަކީބް ހުސައިން (25 އަހަރު)
މި މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އަލް އަމީން އަދި ޕޮލިންގެ ބަންދަށް ފަސް ދުވަސް ދީފައިވާއިރު، ރަކީބް ހުސައިން 15 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ.
ކޯޓު އަމުރެއްގެ ދަށުން ހ. މާދޫގޭގެ ދެ ފަންގިފިލާއެއް ބަލައިފާސްކުރިއިރު، އެ ތަނުން 826 ފުޅި ބަނގުރާ ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
ފުލުހުން އާންމުކޮށްފައިވާ ވީޑިއޯއިން ފެންނަ ގޮތުގައި، ސްމާޓް ލޮކް އަޅުވާފައިވާ އެ އެޕާޓްމަންޓުގެ އެތެރޭގައި ހުރި ލަކުޑި ރެކުތަކެއްގައި ގިނަ އަދަދެއްގެ ބަނގުރާ ފުޅިތައް ހުރީ ތަރުތީބުން އަތުރާފައެވެ. އަދި ބަނގުރާ ކޭސްތައް ބަހައްޓާފައި ހުރީ އޮފީހެއްގެ ގޮތުގައި ބޭނުންކުރާ ކަމަށް ބެލެވޭ ތަނެއްގައެވެ. އެ ތަނުން ޕްރިންޓަރާއި އިދާރީ މަސައްކަތްތަކަށް ބޭނުންކުރާ އެހެނިހެން ސާމާނުތައް ވެސް ވަނީ ފެނިފައެވެ.
ކިޔުންތެރިންގެ ހިޔާލު