މިއަހަރުގެ ނިޔަލަށް ރާއްޖޭގެ ހުރިހާ ރަށެއްގެ ބޭސް ފިހާރަތަކުން އަސާސީ ބޭސް ލިބޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާ ކަމަށް، ޞިއްޙަތާއި ޢާއިލާއާއި އިޖްތިމާޢީ އެހީއާބެހޭ ވަޒީރު ޤީލާ ޢަލީ ވިދާޅުވެއްޖެއެވެ.
ސަރުކާރުގެ އަމާޒަކީ ރާއްޖޭގެ ހުރިހާ ސަރަޙައްދަކުން އަސާސީ ބޭސް ލިބޭނެކަން ކަށަވަރުކުރުމާއި، އެޕްރޫވްކޮށްފައިވާ ބޭސްތައް ދަތިކަމެއްނެތި ރައްޔިތުންނަށް ފޯރުކޮށްދިނުމެވެ. މި މަސައްކަތްތައް ދައުލަތުގެ ބޭސް ކުންފުނި، ސްޓޭޓް ފާމަސޫޓިކަލްސްއިން ދަނީ ކުރަމުންނެވެ.
“އަހާ ފޯރަމް”ގައި ވާހަކަދައްކަވަމުން ވަޒީރު ޤީލާ ޢަލީ ވިދާޅުވީ، ސްޓޭޓް ފާމަ މެދުވެރިކޮށް ރަށްރަށުގައި ހުރި ބޭސް ފިހާރަތަކަށް އަދި ދިގު މުއްދަތަކަށް ބޭސް ބޭނުންވާ ފަރާތްތަކަށް ބޭސް ފޯރުކޮށްދިނުމަށް މަސައްކަތް ކުރެވެމުންދާ ކަމަށެވެ. މި މަސައްކަތްތަކުގެ ނަތީޖާއެއްގެ ގޮތުން، މި އަހަރު ނިމުމުގެ ކުރިން އަސާސީ ބޭސް އަތޮޅުތެރޭގެ ހުރިހާ ފާމަސީތަކުން ލިބެން ހުންނާނެ ކަމަށް ވަޒީރު އިތުރަށް ވިދާޅުވިއެވެ.
ދައުލަތުގެ ބޭސް ކުންފުނި، ސްޓޭޓް ފާމަސޫޓިކަލްސްއިން ވަނީ އަސާސީ ބޭސް ހޯދުމަށް ރައްޔިތުންނަށް އެހީތެރިވުމުގެ ގޮތުން ޚާއްސަ ހޮޓްލައިން ނަންބަރެއް (1505) ތަޢާރަފްކޮށްފައެވެ. މި ހޮޓްލައިނަކީ 24 ގަޑިއިރު ރާއްޖޭގެ ކޮންމެ ސަރަޙައްދަކުންވެސް ޚިދުމަތް ލިބޭނެ ގޮތަށް ތައާރަފްކޮށްފައިވާ ޚިދުމަތެކެވެ. އެ ކުންފުނިން ބުނެފައިވަނީ، ދިވެހިރައްޔިތުންނަށް ބޭސް ލިބުމުގައި ހުރި ދަތިތައް ހައްލުކުރުމަށްޓަކައި މި ނަންބަރު ތައާރަފްކޮށްފައިވާ ކަމަށެވެ. އަދި ބޭސް ހޯދުމާއި އެކަމާ ގުޅޭ މައުލޫމާތު މި ނަންބަރު މެދުވެރިކޮށް ލިބޭނެކަމަށާއި، ކުންފުނި މެދުވެރިކޮށް ބޭސް އޯޑަރުކުރާ ފަރާތްތަކަށް، އެ ބޭސް އެ ފަރާތްތަކާ އެންމެ ގާތުން ހިދުމަތްދޭ ފާމަސީއަކުން ލިބޭނެ އިންތިޒާމު ހަމަޖައްސައި ދެވޭނެ ކަމަށްވެސް ސްޓޭޓް ފާމަސޫޓިކަލްސްއިން ވިދާޅުވެއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ)އިން މި އަހަރުގެ ޖުލައި މަހު ވަނީ ފާމަސީތަކުގައި ބެހެއްޓުން ލާޒިމްކުރާ އަސާސީ ބޭހުގެ ލިސްޓު މުރާޖާކޮށް، އެއަށް އަމަލުކުރަން ފެށުމަށް އަންގާފައެވެ. އަދާހަމަކޮށްފައިވާ މި ލިސްޓުގައިވާ ގޮތުން، ކޮންމެ ފާމަސީއަކުންވެސް އެ ފާމަސީއެއް ނިސްބަތްވާ ގްރޭޑަކަށް ކަނޑައެޅިފައިވާ ބޭހުގެ މަދުވެގެން 80 އިންސައްތަ ބޭސް ލިބޭނެ އިންތިޒާމު ހަމަޖައްސަން ޖެހެއެވެ.
މި ބަދަލާ ގުޅިގެން މިހާރު ހިންގަމުންދާ ފާމަސީތަކުން، ގިންތިކޮށްފައިވާ ގްރޭޑާ އެއްގޮތަށް ހުރިހާ ބޭހެއް ލިބޭނެ އިންތިޒާމު އަންނަ ޖެނުއަރީ މަހުގެ ނިޔަލަށް ހަމަޖައްސަން ޖެހޭނެއެވެ. އަދި އަލަށް ހުޅުވާ ފާމަސީތައް ރަޖިސްޓްރީ ކުރުމަށްފަހު ބޭސް ވިއްކުމުގެ ހުއްދަ ދޫކުރާނީ، އެ ގިންތިއެއްގެ ފާމަސީގައި ބަހައްޓަންޖެހޭ ބޭސްތައް ހަމަކުރުމުން ކަމަށްވެސް އެމް.އެފް.ޑީ.އޭއިން ވަނީ ހާމަކޮށްފައެވެ.
ކިޔުންތެރިންގެ ހިޔާލު