ބޭރުގެ ކުންފުނިތަކަކަށް ސައްހަ ނޫން ޓީޓީ ފޮނުވައިގެން މަކަރާއި ހީލަތުން ގިނަ އަދަދެއްގެ މުދާ ހޯދި މައްސަލާގައި، ހުސައިން ޝިފާއުގެ މައްޗަށް އިއްވާފައިވާ 109 އަހަރުގެ ޖަލު ހުކުމަކީ ގާނޫނާ ޚިލާފަށް ކަނޑައަޅާފައިވާ އަދަބެއް ކަމަށް އޭނާގެ ދިފާއީ ވަކީލު އަދި ކުރީގެ އުއްތަމަ ފަނޑިޔާރު ހުސްނުއްސުއޫދު ހައި ކޯޓުގައި ވިދާޅުވެއްޖެއެވެ.
އޮޅުވާލައިގެން 1.9 މިލިއަން ރުފިޔާގެ މުދާ އެތެރެކުރި މި މައްސަލައާ ގުޅިގެން 2023 ވަނަ އަހަރު ޝިފާއު ފުރަތަމަ ހައްޔަރުކުރުމަށްފަހު ދަޢުވާކުރިއެވެ.
ދައުލަތުން ޝިފާއުގެ މައްޗަށް އުފުލި 23 ދައުވާ ވެސް ކްރިމިނަލް ކޯޓުގައި ސާބިތުވެ، ރާއްޖޭގެ ތާރީޚުގައި ވެސް އެކަކަށް އިއްވި އެންމެ ދިގު ހުކުމް އޭނާއަށް ވަނީ އައިސްފަ އެވެ. އެއީ މަނީ ލޯންޑްރިންގެ ހަތް ދައުވާއަކަށް 70 އަހަރު، މަކަރާއި ހީލަތުގެ ހަތް ދައުވާއަކަށް 30 އަހަރު އަދި ފޯޖަރީގެ ނުވަ ދައުވާއަކަށް ނުވަ އަހަރާއެކު ޖުމްލަ 109 އަހަރުގެ ޖަލު ހުކުމަކާއި ހަތް މިލިއަން ރުފިޔާގެ ޖޫރިމަނާއެކެވެ. މައްސަލައިގެ ކުރީކޮޅު ލުއި ހޯދުމަށް އިއުތިރާފުގެ އެއްބަސްވުމެއް ހެދި ނަމަވެސް، ކޯޓުން ވަނީ އެ އެއްބަސްވުން ބަލައިނުގަނެ ބޭރުކޮށްލައިފަ އެވެ.
މި މައްސަލައިގެ އިސްތިއުނާފު އަޑުއެހުމުގައި ހައި ކޯޓުގައި ވާހަކަދައްކަވަމުން ސުއޫދު ވިދާޅުވީ، އެއް މީހަކަށް މިފަދަ ބުއްދި ގަބޫލުނުކުރެވޭ ވަރުގެ ބޮޑު އަދަބެއް ކަނޑައެޅިގެން ދިޔައީ ގާނޫނުލްއުގޫބާތުގެ 1006 ވަނަ މާއްދާގެ މަގުސަދާ ޚިލާފަށް ކަމަށެވެ. އެ މާއްދާގައި ބުނަނީ ކޮންމެ ކުށަކަށް ވަކިން އަދަބު ކަނޑައަޅަންވާނީ އެއީ އެ މީހަކު ކުރި ހަމައެކަނި ކުށް ކަމަށް ބަލައިގެން ކަމަށެވެ.
ގާނޫނުގައި އެންމެ ބޮޑު ކުށް ކަމަށްވާ މަރުގެ މައްސަލަތަކުގައި ވެސް އެންމެ ބޮޑު އަދަބަކީ 25 އަހަރުކަން ފާހަގަކުރައްވައި ސުއޫދު ވިދާޅުވީ، އަމަލީ ގޮތުން ތަންފީޒު ނުކުރެވޭނެ އަދަބެއް ކަނޑައެޅުމަކީ ގާނޫނު ތަސައްވުރުކުރާ ގޮތެއް ނޫން ކަމަށާއި އޭގެ އެއްވެސް ފައިދާއެއް ނެތް ކަމަށެވެ. އަދި އިންސާފު ގާއިމުކުރުމަށްޓަކައި މި ހުކުމްތައް ބާތިލުކޮށް، އަލުން އަދަބު ކަނޑައެޅުމަށް ދަށު ކޯޓަށް މައްސަލަ ފޮނުވައިދިނުމަށް އޭނާ އެދިވަޑައިގެންނެވި އެވެ.
މިކަމާ ގުޅިގެން ދައުލަތުން ބުނީ، ދައުވާތައް އެއްކޮށް ހުށަހެޅީ ޝަރީއަތް އަވަސްކުރުމަށް ކަމަށާއި، ވަކިވަކިން ހިންގި ނަމަވެސް ނުކުންނާނީ ހަމަ މި ނަތީޖާ ކަމަށެވެ. އެހެންކަމުން ދަށު ކޯޓުގެ 109 އަހަރުގެ ހުކުމަކީ ގާނޫނާ އެއްގޮތަށް ކަނޑައަޅާފައިވާ ސައްހަ ނިންމުމެއް ކަމަށް ހައި ކޯޓުން ކަނޑައަޅައިދިނުމަށް ދައުލަތުގެ ވަކީލު އެދިވަޑައިގެންނެވި އެވެ.
ކިޔުންތެރިންގެ ހިޔާލު