މަޑަވެލީގެ ބިން ހިއްކުމުގެ މަސައްކަތް ހަލުވި ދުވެލީގައި ކުރިއަށްދާ ކަމަށް އެމްޓީސީސީން ބުނެފިއެވެ.
ޖުމްލަ 11.3 މިލިއަން އެމެރިކާ ޑޮލަރުގެ މި މަޝްރޫޢު އެމްޓީސީސީއާ ހަވާލުކޮށްފައި ވަނީ 400 ދުވަހުގެ ތެރޭގައި ނިންމާގޮތަށެވެ. މި މަޝްރޫޢުގެ ދަށުން 19.14 ހެކްޓަރުގެ ބިން ހިއްކުމަށް ހަމަޖެހިފައިވާ ކަމަށް އެ ކުންފުނިން މައުލޫމާތުދެއެވެ.
މި މަޝްރޫޢުގެ ތެރޭގައި ގޮނޑުދޮށް ހިމާޔަތް ކުރުމުގެ މަސައްކަތް ހިމެނޭއިރު، 1625 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 125 މީޓަރުގެ ސަރަހައްދެއްގައި ގްރޮއިން ހަރުކުރުމުގެ މަސައްކަތް ކުރިއަށްދާނެއެވެ. އަދި މި މަސައްކަތްތައް ނިމުމުން ރަށުގެ ބޯހިޔާވަހިކަމުގެ ދަތިކަމަށް ބޮޑު ހައްލެއް ލިބިގެންދާނެ ކަމަށް ބެލެވެއެެވެ.
ދެހާހަށްވުރެ ގިނަ މީހުންގެ އާބާދީއެއް އޮތް މަޑަވެލީގައި ބޯހިޔާވަހިކަމުގެ ދަތިކަން ބޮޑުވެފައިވާއިރު، މި މަޝްރޫޢުގެ ސަބަބުން އެކަމަށް ލުޔެއް ލިބިގެންދާނެއެވެ. މީގެ އިތުރުން ރަށަށް ދިމާވެފައިވާ ރަށްގިރުމާއި، އުދައިގެ އަސަރުކުރުމުގެ މައްސަލަތަކަށް ގޮނޑުދޮށް ހިމާޔަތް ކުރުމުގެ މަސައްކަތްތަކުން ދާއިމީ ހައްލެއް ލިބިގެންދާނެ ކަމަށް އެމްޓީސީސީން ފާހަގަކުރެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށަށް ކުރެއްވި ދަތުރުފުޅެއްގައި ރައްޔިތުންގެ ފަރާތުން ހުށަހެޅުއްވި ކަންކަމުގެ ތެރެއިން ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫޢު ވީ އެންމެ އަވަހަކަށް ފައްޓަވާނެ ކަމަށް ވައުދުވެވަޑައިގެންފައިވެއެވެ. މި މަޝްރޫޢު ފެށިގެން ދިއުމަކީ ރައްޔިތުންގެ ކަންބޮޑުވުންތަކަށް ސަރުކާރުން އިސްކަންދީގެން ހައްލު ހޯދައިދެމުންދާކަން ހާމަވެގެންދާ ކަމެއް ކަމަށް ކަމާބެހޭ ފަރާތްތަކުން ބުނެއެވެ.
ކިޔުންތެރިންގެ ހިޔާލު