ލަމީން ޔަމާލް، ރޮޑްރީ އަދި މިކޭލް މެރީނޯގެ ލަނޑުތަކާއެކު، ނޭޝަންސް ލީގުގައި ޗެކް ރިޕަބްލިކް އަތުން ސްޕެއިން މޮޅުވެއްޖެއެވެ.
ހޮނިހިރު ދުވަހުގެ ރޭ ކުޅުނު މި މެޗުން 3-1 ގެ ނަތީޖާއަކުން ސްޕެއިން މޮޅުވިއިރު، މިއީ މި މުބާރާތުގައި އެޓީމުން ޖެހިޖެހިގެން ހޯދި ތިންވަނަ މޮޅެވެ. މީގެ ކުރިން ސްޕެއިން ވަނީ އިންގްލެންޑާއި ކްރޮއޭޝިއާ ވެސް ބަލިކޮށްފައެވެ. މި މެޗުގައި ސްޕެއިންގެ ލަނޑުތައް ޖަހައިދިނީ ލަމީން ޔަމާލް، ރޮޑްރީ އަދި މިކޭލް މެރީނޯއެވެ. ޗެކް ރިޕަބްލިކްގެ ހަމައެކަނި ލަނޑު ޖަހައިދިނީ ޖީރީ ސްލާމާއެވެ. މި ބައްޔާއެކު ޗެކް ރިޕަބްލިކް އަދިވެސް އޮތީ އެއްވެސް ޕޮއިންޓެއް ނުލިބި ގްރޫޕްގެ ފުލުގައެވެ.
އޮވިއޭޑޯގައި ކުޅުނު މި މެޗު ފެށުނީއްސުރެ ސްޕެއިންއިން ދިޔައީ މެޗު ކޮންޓްރޯލް ކުރަމުންނެވެ. މެޗުގެ ފުރަތަމަ މިނެޓުގައި ލަމީން ޔަމާލަށް ލަނޑު ޖަހާނެ ރަނގަޅު ފުރުސަތެއް ލިބުނު ނަމަވެސް، ޑެނީ އޮލްމޯ ދިން ބޯޅަ އޭނާ ފޮނުވާލުމުން ދިޔައީ ގޯލާ އަމާޒުނުވެ ބޭރަށެވެ. ނަމަވެސް އޭގެ ކުޑައިރުކޮޅެއް ފަހުން ޔަމާލް ވަނީ ލަނޑެއް ޖަހައި ސްޕެއިންއަށް ކުރިހޯދައިދީފައެވެ. ބެލޮންޑޯއަށް ވާދަކުރާ މި ހުނަރުވެރި ކުޅުންތެރިޔާ އޭރިއާގެ ބޭރުން ބޯޅަ ހޯދުމަށްފަހު، އިދިކޮޅު ކުޅުންތެރިޔާ ކައިރިން ނައްޓާލާފައި ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ.
މެޗުގެ ބޮޑު ބައެއްގައި ޗެކް ރިޕަބްލިކްގެ ކުޅުންތެރިންނަށް ޖެހުނީ ބޯޅަ ހޯދުމަށް ސްޕެއިންގެ ކުޅުންތެރިންގެ ފަހަތުން ދުވާށެވެ. ސްޕެއިންއިން ދިޔައީ ހުއްޓުމެއްނެތި ނުރައްކާތެރި ހަމަލާތައް އުފައްދަމުންނެވެ. އެގޮތުން ޔަމާލް ފޮނުވާލި ހަމަލާއެއް ގޯލުގެ ދަނޑި ކައިރިން ބޭރަށް ދިޔައިރު، ޑެނީ އޮލްމޯއަށް ލިބުނު ހުސް ފުރުސަތެއްގައި ފޮނުވާލި ބޯޅަ ޗެކް ރިޕަބްލިކްގެ ކީޕަރު އެންޓޮނީން ކިންސްކީ ދިފާއުކުރިއެވެ. ސްޕެއިންގެ ދެވަނަ ލަނޑު ފެނިގެންދިޔައީ ޕެޑްރީ އޭރިއާ ތެރެއަށް ވަދެ އުޅުމުގެ ތެރޭގައި ޗެކް ކުޅުންތެރިއަކު ބޯޅަ ދުރުކުރަން އުޅުމުގެ ތެރޭގައި ރޮޑްރީއަށް ލިބުނު ފުރުސަތެއްގައެވެ. ރޮޑްރީ ވަނީ ވަރަށް ގާތުން ބޯޅަ ގޯލުގެ ތެރެއަށް ފޮނުވާލައި ނަތީޖާ 2-0 އަށް ބަދަލުކޮށްފައެވެ.
މެޗުގެ ދެވަނަ ހާފު ފެށުނުއިރުވެސް ކުޅުމުގެ އޮއިވަރަށް މާބޮޑު ބަދަލެއް ނާދެއެވެ. ސްޕެއިނުން މެޗު ކޮންޓްރޯލް ކުރަމުން ދިޔަ ނަމަވެސް، ލިބެމުންދިޔަ ފުރުސަތުތަކުގެ ބޭނުން ނުހިފުމުގެ ނަތީޖާއަކަށްވީ އިދިކޮޅު ޓީމަށް މެޗުގެ ތެރެއަށް އެނބުރި އައުމުގެ ފުރުސަތު ފަހިވުމެވެ. އެގޮތުން ސަލާމާ ވަނީ ގޯލުގެ ދުރު ކަނަށް ބޯޅަ ފޮނުވާލައި، ނަތީޖާ 2-1 އަށް ބަދަލުކޮށްލާފައެވެ. އޭގެ ކުޑައިރުކޮޅެއް ފަހުން، ޗެކް ރިޕަބްލިކަށް ނަތީޖާ ހަމަހަމަކުރުމުގެ ރަނުގެ ފުރުސަތެއް ލިބުނެވެ. މިއީ ކުރިން ފޭނޫޑަށް ކުޅުނު އޮންޑްރޭ ލިންގްރަށް، ކީޕަރު ރާޔާ ހެދި ގޯހެއްގެ ސަބަބުން ލިބުނު ފުރުސަތެކެވެ. ނަމަވެސް ލިންގްރ ފޮނުވާލި ބޯޅަ މަޑުވުމުގެ ސަބަބުން، ރާޔާ ވަނީ ވަގުތުން ހަމައަކަށް އެޅި ބޯޅަ ދިފާއުކޮށްފައެވެ.
ދެން ފެނިގެންދިޔައީ ޗެކް ރިޕަބްލިކުން ލަނޑެއް ޖަހައި ނަތީޖާ ހަމަހަމަކުރި މަންޒަރެވެ. މިއީ ރާޔާ އަށް އައި މަތީ ބޯޅައެއް އޭނާ އަށް ރަނގަޅަށް ދިފާއު ނުކުރެވުމުން، ރަޔާން ނާދިރީ ގޯލުގެ ތެރެއަށް ފޮނުވާލި ބޯޅައެކެވެ. ނަމަވެސް ރެފްރީ ވަސިލިސް ފޮޓިއާސް ނިންމީ ރޮބިން ލެ ނޯމަންޑަށް ފައުލްކޮށްފައިވާ ކަމަށެވެ. އެހެންކަމުން އެ ލަނޑު ބަލައިނުގަތުމަށް ރެފްރީ ނިންމިއެވެ.
މި ނިންމުމާ ގުޅިގެން މެޗުގެ ކެޕްޓަން ލަޑިސްލާވް ކްރެއިޗީ ވަރަށް ބޮޑަށް އިހުތިޖާޖު ކުރުމުން އޭނާ އަށް ރީނދޫ ކާޑެއް ދެއްކިއެވެ. އަދި އޭގެ ކުޑައިރުކޮޅެއް ފަހުން، ސްޕެއިންގެ ހަމަލާއެއް ހުއްޓުވުމަށް އޭނާ ކުރި ފައުލަކާ ގުޅިގެން ރަތް ކާޑު ދައްކައި ދަނޑުން ފޮނުވާލިއެވެ.
މެޗު ނިމެން މިނެޓަކަށް ވެފައި ވަނިކޮށް، ސްޕެއިނުން ވަނީ ތިންވަނަ ލަނޑު ޖަހައި މެޗުގެ ނަތީޖާ ކަށަވަރުކޮށްފައެވެ. ވިކްޓަރ މުނޯޒް ފޮނުވާލި ހަމަލާ ކީޕަރު ކިންސްކީ ދިފާއުކުރި ނަމަވެސް، ރީބައުންޑްގައި އައި ބޯޅަ މެރީނޯ ވަނީ ގޯލުގެ ތެރެއަށް ފޮނުވާލާފައެވެ. މި މެޗު 3-1 އިން ސްޕެއިން ކާމިޔާބުކުރިއިރު، އަންނަ އަންގާރަ ދުވަހު ސްޕެއިން ނުކުންނާނީ ކްރޮއޭޝިއާއާ ދެކޮޅަށެވެ. ހަމަ އެ ވަގުތު ޗެކް ރިޕަބްލިކް ބައްދަލުކުރާނީ އިނގިރޭސިވިލާތާއެވެ.
ކިޔުންތެރިންގެ ހިޔާލު