ސަރުކާރުގެ އެހީތެރިކަމާއެކު މިހާތަނަށް 28 ތެލެސީމިއާ ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވިފައިވާ ކަމަށް ސިއްހަތާއި އާއިލާއާއި އިޖްތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ޤީލާ ޢަލީ ވިދާޅުވީ، ތެލެސީމިއާ ކުދިންނަށް ދާއިމީ ޝިފާއެއް ހޯދައިދިނުމަށްޓަކައި ޒަކާތު ފަންޑުން އެހީތެރިކަން ފޯރުކޮށްދިނުމާ ގުޅޭގޮތުން މިނިސްޓްރީ އޮފް އިސްލާމިކް އެފެއާޒާއި މިނިސްޓްރީ އޮފް ހެލްތާ ދެމެދު 21 ފެބުރުއަރީ 2024 ގައި ފަހުމުނާމާއެއްގައި ސޮއިކުރެވިފައިވާ ކަމަށެވެ.
މި އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް، ބޮލަކަށް އެއް މިލިއަން ރުފިޔާއަށް ވުރެ އިތުރުނުވާނެ ގޮތުގެ މަތީން ޖުމްލަ 10 މިލިއަން ރުފިޔާ ޚަރަދުކުރުމަށް ވަނީ ހަމަޖެހިފައެވެ. އަދި މި އިންތިޒާމުގެ ތެރެއިން މިހާތަނަށް 28 ކުއްޖަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވި، ފަރުވާގެ ކަންކަން ކުރިއަށްދާކަން ވަޒީރު ފާހަގަކުރެއްވިއެވެ.
ތެލެސީމިއާ ކުދިންނާއި އެ ކުދިންގެ ޢާއިލާތަކަށް ދިމާވެފައިވާ ގޮންޖެހުންތަކަށް ދާއިމީ އަދި ލުއިފަސޭހަ ޙައްލެއް ހޯދައިދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްޞަ އަހަންމިއްޔަތުކަމެއް ދެއްވާ މުހިންމު ސިޔާސަތެކެވެ.
ރައީސްގެ ވަޢުދުފުޅާ އެއްގޮތަށް، ދައުލަތުގެ ޚަރަދުގައި މިފަދަ އަގުބޮޑު ފަރުވާތައް ހަމަޖައްސައިދިނުމަކީ ތެލެސީމިއާ ކުދިންނަށް އުއްމީދީ އަދި ފާގަތި މުސްތަޤްބަލެއް ހޯދައިދިނުމަށް އެޅުނު ވަރަށް މުހިންމު ފިޔަވަޅެކެވެ.
ވަޒީރު ވިދާޅުވީ ސަރުކާރުގެ އަމާޒަކީ އެއްވެސް ތެލެސީމިއާ ކުއްޖަކު ބާކީނުކޮށް، އެ ކުދިންނަށް ބޭނުންވާ ޞިއްޙީ ފަރުވާއާއި އެހީތެރިކަން މެދުކެނޑުމެއްނެތި ފޯރުކޮށްދިނުމުގައި ދެމިއޮތުން ކަމަށެވެ.
ކިޔުންތެރިންގެ ހިޔާލު