އުޒްބަކިސްތާނުގެ ސަމަރކަންޑް ސްޕޯޓްސް ކޮމްޕްލެކްސްގައި ކުރިއަށްދިޔަ 46 ވަނަ ޗެސް އޮލިމްޕިއާޑުގައި “އީ” ކެޓަގަރީއިން ރަން މެޑަލް ހޯދައި، ތާރީޚީ ކާމިޔާބީއެއް ހޯދި ރާއްޖޭގެ ޤައުމީ އަންހެން ރާޒުވާ ޓީމު އެނބުރި ރާއްޖެ އަތުވެއްޖެއެވެ.
މި މުބާރާތުގައި ރާއްޖޭގެ އަންހެން ޓީމުގައި ހިމެނެނީ ރާއްޖޭގެ އެއްވަނަ އަންހެން ކުޅުންތެރިޔާ ނިހާޔާ އަހްމަދު، އީނާ ޢަބްދުﷲ ހަސަން، މަރްޔަމް ލައިސާ ޢަބްދުއްރަޝީދް، ޢާއިޝަތު އަލްޔާ މުހައްމަދު ޝަރީފް އަދި ޢާއިޝަތު ނޯޔާ ޝަހުރުއްދީން އަފީފެވެ. މީގެއިތުރުން، ރާއްޖޭގެ ފިރިހެން ޓީމުގެ އެންމެ ވަރުގަދަ ފަސް ކުޅުންތެރިންވެސް ވަނީ މުބާރާތުގައި ވާދަކޮށްފައެވެ.
އެއާޕޯޓުގައި ހުރެ މައުލޫމާތު ދެމުން، ޓީމުގެ ތަޖުރިބާކާރު ކުޅުންތެރިޔާ ނިހާޔާ ބުނީ 37 ގައުމަކާ ދެކޮޅަށް ކުޅެ ހޯދި މި ކާމިޔާބީއާމެދު ވަރަށް ފަޚުރުވެރިވާ ކަމަށާއި، މިއީ އެންމެ ފަހު ވަގުތާ ހަމައަށް ހިތްވަރު ދޫނުކޮށް ކުޅުންތެރިން ކުރި ބުރަ މަސައްކަތުގެ ނަތީޖާ ކަމަށެވެ.
މި މުބާރާތުން ރަން މެޑަލް ހޯދުމުގެ އިތުރުން، ޤައުމީ އަންހެން ޓީމުގެ ދެ ކުޅުންތެރިއަކު ވަނީ “ވުމަން ކެނޑިޑޭޓް މާސްޓާ” (ޑަބްލިއުސީއެމް) ލަގަބު ހޯދާފައެވެ. އެއީ މަރްޔަމް ލައިސާ ޢަބްދުއްރަޝީދާއި، އުމުރުން އެންމެ 14 އަހަރުގެ އީނާ ޢަބްދުﷲ ހަސަންއެވެ. މިއީ ރާއްޖޭގެ އަންހެން ރާޒުވާ ޓީމަކުން މިހާތަނަށް ހޯދި އެންމެ ފުރިހަމަ ކާމިޔާބީއެވެ.
ކިޔުންތެރިންގެ ހިޔާލު