ސޭފްޓީ އެންޑް ސެކިޔުރިޓީ ދާއިރާގެ އެންމެންގެ އަޒުމަކަށްވާންވީ ދުނިޔޭގެ އެންމެ ރައްކާތެރި ޤައުމަށް ދިވެހިރާއްޖެ ހެދުން ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ވަޒީރު މިހެން ވިދާޅުވީ މޯލްޑިވްސް އެސޯސިއޭޝަން އޮފް ފަޔަރ، ސޭފްޓީ އެންޑް ސެކިޔުރިޓީ އިންޑަސްޓްރީ (މަފްސީން) އިން އިންތިޒާމްކޮށްގެން ފެށި ދެ ދުވަހުގެ ސޭފްޓީ އެންޑް ސެކިޔުރިޓީ ކޮންފަރެންސް އިފްތިތާޙުކޮށްދެއްވައި ދެއްކެވި ވާހަކަފުޅުގައެވެ. ވަޒީރު ފާހަގަކުރެއްވި ގޮތުގައި، ދުނިޔޭގެ އެންމެ މަޤުބޫލު މަންޒިލްގެ ގޮތުގައި ރާއްޖެ އޮތްއިރު، ފަތުރުވެރިންގެ ރައްކާތެރިކަން ކަށަވަރުކުރެވޭނީ ސަރުކާރާއި، ފަތުރުވެރިކަމުގެ ދާއިރާ އަދި އަމިއްލަ ސެކިއުރިޓީ ކުންފުނިތައް ގުޅިގެންނެވެ.
އަލިފާނާއި ކަނޑުމަތީގެ ހާދިސާތަކާއި، ސައިބަރ އެޓޭކް، އޮންލައިން ފްރޯޑް، މަސްތުވާތަކެތި އަދި އާންމު ސިއްޙަތާ ގުޅުންހުރި ކަންކަމަށް ޚާއްޞަ ސަމާލުކަމެއް ދޭންޖެހޭކަން ފާހަގަކުރައްވަމުން ވަޒީރު ވިދާޅުވީ، ކަމެއް ވުމުގެ ކުރިން ދުރާލައި ތައްޔާރުވެފައި ތިބުމަކީ މުހިންމު ކަމެއް ކަމަށެވެ. އަދި ރައްކާތެރި އަދި ވިލުންތެރި މަންޒިލެއްގެ ގޮތުގައި ރާއްޖެ ބޭއްވުމަށްޓަކައި ހަރުދަނާ ސިޔާސަތުތަކާއި ޓެކްނޮލޮޖީ ބޭނުންކުރުމުގައި ސަރުކާރުގެ ފުރިހަމަ އެއްބާރުލުން ލިބޭނެ ކަމުގެ ޔަޤީންކަން ވަޒީރު ދެއްވިއެވެ.
މަފްސީންއިން ބާއްވާ މި ކޮންފަރެންސަކީ ރާއްޖޭގެ ފަތުރުވެރިކަމުގެ ދާއިރާއަށް ޚާއްޞަކޮށްގެން ސޭފްޓީ އެންޑް ސެކިއުރިޓީއާ ގުޅޭގޮތުން ބާއްވާ މިފަދަ ފުރަތަމަ ކޮންފަރެންސެވެ. ދެ ދުވަހުގެ މުއްދަތަށް ކުރިއަށްދާ މި ކޮންފަރެންސްގައި ދައުލަތުގެ މުއައްސަސާތަކާއި، ފަތުރުވެރިކަމުގެ ދާއިރާގެ ކުންފުނިތަކުގެ އިތުރުން ރާއްޖެއާއި ރާއްޖޭން ބޭރުގެ ތަޖުރިބާކާރުން ދަނީ މަޝްވަރާކޮށް ސެޝަންތައް ނަގައިދެމުންނެވެ.
ކިޔުންތެރިންގެ ހިޔާލު