ސައުދީ އަރަބިއްޔާގެ 96 ވަނަ ޤައުމީ ދުވަހުގެ މުނާސަބަތުގައި، އެ ޤައުމުގެ ރަސްގެފާނު ސަލްމާން ބިން އަބްދުލްއަޒީޒް އަލް ސައުދު، ވަލީއަހުދު އަދި ބޮޑުވަޒީރު، ޕްރިންސް މުހައްމަދު ބިން ސަލްމާން ބިން އަބްދުލްއަޒީޒް އަލް ސައުދާއި ޝާހީ އާއިލާއާ، ސަރުކާރާއި އެ ޤައުމުގެ އަޚުވަންތަ ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތަހުނިޔާ ފޮނުއްވައިފި އެވެ.
ރައީސުލްޖުމްހޫރިއްޔާގެ މެސެޖުގައި ރާއްޖެ އާއި ސައުދީ އަރަބިއްޔާއަކީ އެތައް އަހަރުތަކެއް ކުރީން އުފެދިފައިވާ އޮތް ތާރީޚީ ގުޅުމާއި، ދެ ޤައުމު ހިއްސާވާ އިސްލާމީ އަގުތަކުގެ ތެރޭގައި ބިންވަޅު ނެގިފައިވާ ފުން ގުޅުމަކުން ގުޅިފައިވާ ދެ ޤައުމު ކަމުގައި ވިދާޅުވި އެވެ.
އަދި ސައުދީ އަރަބިއްޔާއިން، ރާއްޖޭގެ އިޖްތިމާޢީ، އިޤްތިޞާދީ ތަރައްޤީއަށް ދީލަތި އެއްބާރުލުމާއި އެކަމުގައި އޮތް ހިއްސާއަށް ވަރަށް ބޮޑަށް ޝުކުރުވެރިވާ ކަމުގައި ވިދާޅުވި އެވެ.
ރައީސުލްޖުމްހޫރިއްޔާގެ މެސެޖުގައި ކުރިއަށް އޮތް އަހަރުތަކުގައިވެސް ދެ ޤައުމުގެ މެދުގައި އެކުވެރިކަމާއި، އެއްބައިވަންތަކަމާއި، އެއްބާރުލުމުގެ ގުޅުންތައް އިތުރަށް ހަރުދަނާވާނެ ކަމުގެ ޔަޤީންކަން އޮތް ކަމުގައި ވިދާޅުވި އެވެ.
އަދި ސައުދީ އަރަބިއްޔާގެ ރަސްކަމަށް ދެމިއޮތުމާއި އެ ޤައުމަށް ހަމަޖެހުމާއި، ތަނަވަސްކަމާއި، ޝަރަފުވެރިކަމަށް އެދި ދުއާ ކުރައްވާފައިވެ އެވެ.
ކިޔުންތެރިންގެ ހިޔާލު