އަބޫދާބީގެ އީގަލް ހިލްސް ކުންފުނިން ރާއްޖޭގައި އިންވެސްޓްކުރަނީ ޤާނޫނުތަކާ އެއްގޮތަށް ކަމަށާއި ރާއްޖޭގެ އެންމެ އިންޗިއެއްވެސް ބޭރުގެ ބަޔަކަށް ވިއްކާނުލާނެ ކަމަށް މާލީ ކަންކަމާއި ސަރުކާރު ކުންފުނިތަކާ ބެހޭ ވަޒީރު ޙަސަން ޒަރީރު ވިދާޅުވެއްޖެއެވެ.
ވަޒީރު މިހެން ވިދާޅުވީ ރަސްމާލޭގައި މޯލްޑިވްސް ވޯޓަރ ފްރަންޓް އެންޑް މެރީނާ މަޝްރޫއުގެ ދަށުން އިންވެސްޓަރުންނަށް އެ ސަރަހައްދު ވިއްކާލަން ސަރުކާރުން ނިންމާފައިވާ ކަމަށް ބުނެ މީސްމީޑިއާގައި ދައްކަމުންދާ ވާހަކަތަކާ ގުޅިގެން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ.
ރަސްމާލޭގައި މި މަޝްރޫއު ހިންގުމަށް އީގަލް ހިލްސްއިން ވަނީ ވިހި ބިލިއަން ޑޮލަރުގެ އިންވެސްޓްމަންޓެއް ކުރުމަށް ދިވެހި ސަރުކާރާއެކު އެއްބަސްވުމެއްގައި ސޮއިކޮށްފައެވެ. އެހެންނަމަވެސް، މި އެއްބަސްވުމުގެ ދަށުން އިންވެސްޓްމަންޓުގެ ބަދަލުގައި ރަސްމާލޭގެ ބައެއް އެ ކުންފުންޏަށް ވިއްކާލަން ސަރުކާރުން ނިންމާފައިވާ ކަމަށް ބުނެ ބައެއް ފަރާތްތަކުން ދަނީ މީސްމީޑިއާގައި ތުހުމަތު ކުރަމުންނެވެ.
މިވާހަކަތަކާ ގުޅިގެން މާލީ ވަޒީރު ޙަސަން ޒަރީރު ވިދާޅުވީ އީގަލް ހިލްސްއިން ރާއްޖޭގައި އިންވެސްޓް ކުރަނީ މިހާރުވެސް އިންވެސްޓްކޮށްގެން ހިންގާ މަޝްރޫއުތަކުގައި އިންވެސްޓްކުރެވޭ އުސޫލުން ކަމަށެވެ. އެގޮތުން ފަތުރުވެރިކަމުގެ ބޮޑެތި މަޝްރޫއުތައް ހިންގުމަށް މިހާރުވެސް ޤާނޫނުން ނުވަދިހަ ނުވަ އަހަރުގެ ލީޒް މުއްދަތަކަށް ރަށްތައް ދޫކުރާ ގޮތަށް، ރަސްމާލޭގެ މަޝްރޫއުވެސް ކުރިއަށްދާނީ އެ އުސޫލުން ކަމަށް ވަޒީރު ވިދާޅުވިއެވެ.
މި މަޝްރޫއުގެ ދަށުން ތަރައްގީކުރާ ތަންތަން ދޫކުރާނީ ލީޒް އުސޫލުން ކަމަށާއި، އެފަދަ ތަންތަނުގެ ހަރުމުދަލުގެ މިލްކުވެރިކަން އަބަދުވެސް އޮންނާނީ ދިވެހި ސަރުކާރުގެ ހައްގެއްގެ ގޮތުގައި ކަމަށް ވަޒީރު ފާހަގަކުރެއްވިއެވެ.
ރާއްޖޭގެ ބިމުން އެންމެ އަކަފޫޓެއްވެސް ވިއްކާނުލައްވާނެ ކަމަށް ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވެވަޑައިގެންފައިވާ ވައުދުފުޅާ އެއްގޮތަށް ސަރުކާރުން އަބަދުވެސް އަމަލުކުރާނެ ކަމުގެ ޔަގީންކަން މާލީ ވަޒީރު ދެއްވިއެވެ. އަދި އީގަލް ހިލްސްއާއެކު ވެފައިވާ އެއްބަސްވުމުގައިވެސް ރާއްޖޭގެ ބިމެއްގެ މިލްކުވެރިކަން އެ ފަރާތަށް ލިބޭނެ ގޮތަށް ހިމަނާފައި ނުވާނެ ކަމަށް ވަޒީރު ވިދާޅުވިއެވެ.
މި މަޝްރޫއަކީ ރާއްޖޭގައި މިހާތަނަށް ކުރެވޭ އެންމެ ބޮޑު އިންވެސްޓްމަންޓަށް ވާއިރު، މީގެ ސަބަބުން ސީދާ ގޮތުންނާއި ނުސީދާ ގޮތުން އިގްތިސާދަށް ގިނަ ފައިދާތަކެއް ލިބި، މުޅި މަޝްރޫއުގެ އެންމެ ބޮޑު މަންފާއެއް ކުރާނީ ދިވެހި ރައްޔިތުންނަށް ކަމަށް ވަޒީރު ވިދާޅުވިއެވެ.
ކިޔުންތެރިންގެ ހިޔާލު